សារព័ត៌មានពីក្រុងញូវដេលី ប្រទេសឥណ្ឌា កាលពីពេល ថ្មីៗ កន្លងមកផ្សាយថា លោកខេខេ សាម៉ា ប្រធានគណៈកម្មការផ្នែកគ្រោះហានិភ័យនៅក្រុងញូវដេលី បានថ្លែងក្រោយពីកិច្ចប្រជុំដើម្បីដោះស្រាយពីវិបត្តិជាតិពុលក្នុងអាកាសធាតុថា ជារៀងរាល់ឆ្នាំស្ថានភាពអាកាសធាតុនៅរដូវរងានឹងកើនខ្ពស់ និងស្ថិតក្នុងរយៈពេលជាច្រើនសប្តាហ៍ ។ ហេតុដូច្នេះត្រូវប្រើប្រាស់ចំណាត់ការដ៏បន្ទាន់មួយ ដើម្បីដោះស្រាយនិងដាក់បញ្ជាឱ្យរថយន្តផ្ទាល់ខ្លួនរបស់ពលរដ្ឋដែលបើកបរក្នុងក្រុងញូវដេលី ត្រូវបើកបរក្នុងថ្ងៃគូឬថ្ងៃសេស អាស្រ័យលើស្លាកលេខរបស់យានយន្ត កំណត់អនុវត្តចាប់ពីខែមករា ឆ្នាំ២០១៦ តទៅ និងជាបទដ្ឋានបណ្តោះអាសន្នមួយដើម្បីពិនិត្យមើលថា អាចដោះស្រាយបញ្ហាសារធាតុពុលនៅក្នុងអាកាសធាតុ ឬអត់ ?
រដ្ឋាភិបាលបានកែទម្រង់ប្រព័ន្ធដឹកជញ្ជូនសាធារណៈ បិទរោងចក្រអគ្គិសនីប្រើធ្យូងថ្ម និងចាប់ផ្តើមប្រើម៉ាស៊ីនបឺតធូលីនៅលើដងផ្លូវដើម្បីរិះរកវិធីសាស្ត្រកាត់បន្ថយជាតិពុល ។
បច្ចុប្បន្នមានរថយន្តនៅក្រុងញូវដេលីជាង៨,៥លានគ្រឿង និងមានរថយន្តថ្មីបិទស្លាកលេខបានកើនឡើង១ថ្ងៃ១៤០០គ្រឿង ។ ការសម្រេចចិត្តគ្រប់គ្រងការប្រើយានយន្តផ្ទាល់ខ្លួននៅក្រុងញូវដេលី បានកើតឡើងបន្ទាប់ពីខាងបរិស្ថានរបស់ឥណ្ឌាស្នើសុំដល់រដ្ឋបាលញូវដេលីកំណត់ពីយុទ្ធសាស្ត្រសម្រាប់ដោះស្រាយបញ្ហាផ្សែងពុលដែលគ្របដណ្តប់នៅទូទាំងក្រុងក្នុងរយៈពេលជាច្រើនសប្តាហ៍កន្លងមក ៕
ចែករំលែកព័តមាននេះ