ត្រឹមតែរយៈពេលប្រមាណ១០នាទីប៉ុណ្ណោះ មានឧប្បត្តិហេតុគ្រោះថ្នាក់ចរាចរណ៍កើតឡើងរហូតដល់ទៅចំនួន៣លើកនៅទីកន្លែងតែមួយ និងបានបណ្ដាលឲ្យមនុសមួយចំនួនរងរបួសធ្ងន់ និងស្រាល ហើយម៉ូតូ៤គ្រឿងរងការខូចខាត និងរថយន្ត
រាជធានីភ្នំពេញ ៖ ត្រឹមតែរយៈពេលប្រមាណ១០នាទីប៉ុណ្ណោះ មានឧប្បត្តិហេតុគ្រោះថ្នាក់ចរាចរណ៍កើតឡើងរហូតដល់ទៅចំនួន៣លើកនៅទីកន្លែងតែមួយ និងបានបណ្ដាលឲ្យមនុសមួយចំនួនរងរបួសធ្ងន់ និងស្រាល ហើយម៉ូតូ៤គ្រឿងរងការខូចខាត និងរថយន្ត១គ្រឿងបានក្រឡាប់ធ្លាក់ចូលទៅក្នុងប្រឡាយទឹកផងដែរ ។
ឧប្បត្តិហេតុខាងលើនេះ បានកើតឡើងជាបន្តបន្ទាប់កាលពីវេលាម៉ោង៦និង៣០នាទីព្រឹក ថ្ងៃទី៨ ខែកក្កដា ឆ្នាំ២០២១ នៅលើកំណាត់ផ្លូវ៥០ម៉ែត្រ ស្ថិតនៅក្នុងភូមិអន្លូងគងចាស់ សង្កាត់ព្រៃស ខណ្ឌដង្កោ រាជធានីភ្នំពេញ ។
តាមប្រភពព័ត៌មានបានឲ្យដឹងថា នៅមុនពេលកើតហេតុ គឺមានរថយន្តទ្រុងដឹកទឹកសុទ្ធ១គ្រឿងខាងលើ បានបើកបរធ្វើដំណើរក្នុងល្បឿនលឿនពីត្បូងទៅជើង លុះពេលទៅដល់ត្រង់ចំណុចកើតហេតុ ស្រាប់តែមានម៉ូតូ២គ្រឿងបុកគ្នា បណ្ដាលឲ្យដួលរួចខ្ទាតទាំងមនុស្ស និងម៉ូតូពេញផ្លូវតែម្តង ។ ខណៈពេលនោះ បានធ្វើឲ្យរថយន្តខាងលើវ៉ាក់អើ ហើយអ្នកបើកបររថយន្តខំកាច់ចង្កូតគេចចេញ ព្រោះខ្លាចកិនអ្នកជិះម៉ូតូដែលកំពុងដួលលើផ្លូវនោះស្លា.ប់ ទើបបណ្ដាលឲ្យរថយន្តធ្លាក់ផ្លូវ រួចក្រឡាប់ចូលប្រឡាយទឹកតែម្ដង។
ប្រភពដដែលបានបន្តទៀតថា ពេលនោះអ្នកជិះម៉ូតូទាំងសងខាងរងរបួសស្រាលប៉ុណ្ណោះ ចំណែកម៉ូតូបានរងការខូចខាតគួរសម ហើយក៏បានសម្របសម្រួលគ្នាចប់រឿង និងបានចាកចេញពីកន្លែងកើតហេតុអស់បាត់ទៅ នៅសល់តែរថយន្តក្រឡប់ក្នុងប្រឡាយ ហើយអ្នកបើកបររងរបួសស្រាល ។
ប្រភពដដែលបន្តថា លុះបន្តិចក្រោយមក ខណៈពេលដែលមនុស្សម្នាកំពុងតែចោមរោមមើលរថយន្តក្រឡាប់នោះ ស្រាប់តែមានម៉ូតូ២គ្រឿងទៀតបើកបរបញ្ច្រាស់ទិសគ្នា លុះមកដល់កន្លែងកើតហេតុនេះ ក៏រវល់តែងាកមើលរថយន្តក្រឡាប់ភ្លេចមើលទៅមុខ ក៏បានបុកគ្នាពេញទំហឹងទៀត បណ្ដាលឲ្យដួលពេញផ្លូវ ហើយអ្នកជិះម៉ូតូ គឺរងរបួសធ្ងន់ម្នាក់ និងស្រាលម្នាក់ទៀត។
ក្រោយពេលកើតហេតុ នគរបាលប៉ុស្តិ៍ព្រៃ.ស និងនគរបាលចរាចរណ៍ខណ្ឌដង្កោ បានចុះទៅសម្របសម្រួលរវាងភាគីអ្នកជិះម៉ូតូទាំងសងខាងបញ្ចប់រឿង ព្រមទាំងឲ្យម្ចាស់រថយន្តដឹកទឹកសុទ្ធស្ទូចយករថយន្តនេះ ទៅធ្វើការជួសជុលឡើងវិញដោយខ្លួនឯង ព្រោះរថយន្តនេះពុំបានបុកប៉ះជាមួយអ្នកដំណើរ ឬទ្រព្យសម្បត្តិរដ្ឋឡើយ៕
ចែករំលែកព័តមាននេះ