រាជធានីភ្នំពេញ ៖ មានមនុស្សជាច្រើននៅក្នុងស្រុកបានគិតថា ទាល់តែសន្សំលុយគ្រប់ទើបធ្វើអាជីវកម្ម ទាល់តែមានលុយរាប់ម៉ឺនដុល្លារ ចាំបើអាជីវកម្ម ក្នុងន័យនេះអ្នកជំនាញបានណែនាំថា អ្នកមិនគួររងចាំការសន្សំលុយទាល់តែគ្រប់នោះទេ ពីព្រោះទម្រាំអ្នកសន្សំលុយគ្រប់ អ្នកចាស់ជរាបាត់ទៅហើយ ។
លោកឧកញ៉ាវេជ្ជបណ្ឌិត គួច ម៉េងលី ដែលជាប្រធានក្រុមប្រឹក្សាភិបាលនៃក្រុមហ៊ុន Mengly J. Quach Education បានថ្លែងបន្តថា កុំចាំទាល់តែមានលុយគ្រប់ទើបធ្វើអាជីវកម្ម ព្រោះអ្នកនឹងមិនអាចមានលុយគ្រប់នោះទេ ជីវិតមនុស្ស គឺត្រូវចំណាយគ្រប់សព្វបែបយ៉ាង ដូចនេះគ្រាន់តែការចំណាយទៅលើជីវិតប្រចាំថ្ងៃអ្នក អ្នកសឹងតែមិនមានលុយសល់បាត់ទៅហើយ ។
លោកឧកញ៉ា គួច ម៉េងលី បានបន្តថា យុវជនយុវតី ដែលមានបំណងធ្វើអាជីវកម្ម គួរចាប់ផ្តើមតាមលទ្ធភាពដែលខ្លួនមាន តិចក្តីច្រើនក្តីត្រូវចាប់ផ្តើមពីតូចទៅ ប្រសិនបើអ្នករងចាំមានលុយច្រើននោះអ្នកចំណាយស្ទើតែមួយជីវិតមិនបានផង ។ មួយវិញទៀតអ្នកធ្វើអ្វីក៏ដោយ កុំចូលរួមច្រើនពេក កុំស្តាប់ច្រើនពេក ប៉ុន្តែអ្នកត្រូវស្តាប់តែអ្នកជោគជ័យ និងការអានសៀវភៅនានា បន្ទាប់មកចាប់ផ្តើមធ្វើ ទើបអ្នកដឹងថា វាយ៉ាងមិច ។ ទ្រឹស្តីនរណាក៏អាចនិយាយបានដែរ ប៉ុន្តែការអនុវត្តន៍ពិតមិនដូចគ្នានោះទេ ។
ខាងក្រោមនេះជាចំណុចសំខាន់ៗ ដែលលោកឧកញ៉ា គួច ម៉េងលី បានចែករំលែក ៖
១. កុំចាំទាល់តែសន្សំលុយគ្រប់ទើបធ្វើ ៖ បងប្អូនខ្លះបានគិតថា ចាំសន្សំលុយគ្រប់ចាំចាប់ផ្តើមរកស៊ី អ្នកគួរដឹងសន្សំទាល់តែចាស់សក់សក៏មិនបានដែរ ពីព្រោះយើងម្នាក់ៗមិនងាយសល់លុយទេ ។ អ្នកខ្លះទៀត គិតថា ចាំខ្ញុំជោគជ័យចាំខ្ញុំការប្រពន្ធ មិនងាយជោគជ័យទេ ប្រសិននៅកំលោះម្នាក់ឯងចាយខ្ទេច ប្រសិនបើមានប្រពន្ធគ្រាន់រឹតត្បិតខ្លះ គេគាបសង្កត់ គេទុកដាក់ទើបបានជោគជ័យ ។
២. មានលុយតិចក្តី ច្រើនក្តីចាប់ផ្តើមធ្វើ ៖ មានតិចធ្វើតិចមានច្រើនធ្វើច្រើន ឧទាហរណ៍ថា អ្នកចង់ដាំដើមឈើ ដូចនេះអ្នកត្រូវដាំតាំងពីមិនទាន់មានស្លឹក ដាំរហូតដល់តែដុះជាមេឃឈើ ចេញផ្លែផ្លាធំឱបមិនជុំ បែបនឹងទើបវាមាំ ប៉ុន្តែប្រសិនបើយើងចង់ធំ ភ្លាមទៅទិញដើមឈើមកផ្សាំដាក់ វាមាំប៉ុន្តែខ្យល់មករលំបាត់ ព្រោះមិនមានគ្រឹះពីក្រោមមក ។
៣.កុំអាងអីចូលហ៊ុនគ្នា ៖ ពេលរកស៊ី ក្មួយៗចាប់ផ្តើមកុំអាងអីចូលហ៊ុនគ្នា នៅស្រុកយើងមិនដូចគ្នាទេ នៅស្រុកគេមានច្បាប់ទម្លាប់ មានវិន័យ មានកិច្ចព្រមព្រៀងច្បាស់លាស់តាមច្បាប់ ហើយគេគោរព ។ ប៉ុន្តែស្រុកយើងមិនគោរពទេ ដល់ពេលមានបញ្ហា អ្នកលុយច្រើនជាងអ្នកនោះទៅហើយ ។
៤. រកស៊ីពីតូច ប៉ុន្តែត្រូវធ្វើវាឱ្យមាននិរន្តភាព ៖ បើទោះបីអ្នកចាប់ផ្តើមពីតូចមែន ប៉ុន្តែអ្នកធ្វើបែបណាក៏ដោយកុំឱ្យមានរឿង និងមាននិរន្តភាពដល់កូនចៅទៅក្នុងថ្ងៃអនាគត ។ តើត្រូវធ្វើបែបណា? ដូចនេះអ្នកត្រូវធ្វើយ៉ាងណាឱ្យត្រូវធ្វើតាមផ្លូវច្បាប់ ចុះឈ្មោះក្រុមហ៊ុន ចុះឈ្មោះប៉ាតង់ ចុះឈ្មោះឡូហ្គោ និងមានលក្ខខណ្ឌច្បាស់លាស់ ។
៥ មានផែនការអាជីវកម្មច្បាស់លាស់ ៖ មិនថាអ្នកតូចប៉ុណ្ណា ឬធំប៉ុណ្ណា ត្រូវមានរៀបចំផែនការអាជីវកម្ម មានការគ្រប់គ្រងហិរញ្ញវត្ថុច្បាស់លាស់ មានទីផ្សារអាជីវកម្មត្រឹមត្រូវ មានអ្នកលកត្រឹមត្រូវ និងទំនាក់ទំនងត្រឹម ។ ទាំងនេះមិនចាំបាច់មានទាំងអស់នោះទេ ប៉ុន្តែយើងត្រូវធ្វើវាម្តងបន្តិចៗ រហូតដល់ក្រុមហ៊ុន ឬអាជីវកម្មរបស់យើងរឹងមាំ ។
៦. ពង្រឹងការងារឱ្យកាន់តែមានស្តង់ដា ៖ នៅពេលអ្នកមានលទ្ធភាពពង្រីកក្រុមហ៊ុន ឬអាជីវកម្មឱ្យធំ អ្នកត្រូវមានប្រធានមានមេមានកើយ មានរបាយការណ៍ហិរញ្ញវត្ថុ មានផ្នែកធនធានមនុស្ស មិនចាំបាច់មានទាំងអស់នោះទេ មានប៉ុនណាយើងបន្ថែមប៉ុណ្ណឹង ។
លោកឧកញ៉ា គួច ម៉េងលី បានបន្ថែមថា ៖ «ខ្ញុំឃើញអ្នកចង់ធ្វើអាជីវកម្ម ១០ នាក់ ត្រូវបានបរាជ័យ ៩នាក់បាត់ទៅហើយ ឬក្ស័យធន់ ពីព្រោះពួកគេប្រើក្បាច់ ដំរីជុះជុះតាមដំរី ធ្វើតាមគ្នា ធ្វើឱ្យដូចគ្នាដើម្បីប្រកួតប្រជែងទីផ្សារចុងក្រោយក្ស័យធន់ទាំងអស់ ។ ដោយសារសង្គមយើងវាមានទិដ្ឋភាពបែបនឹង មិនបន្ទោសនរណាគេទេ ដោយយើងគ្រប់គ្នាល្ងិតល្ងង់ មិនរឹងបុឹងមិនមានម្ចាស់ការ ធ្វើម្នាក់ឯងធ្វើមិនកើត មិនចេះយោគយល់គ្នា បើបានស៊ីច្រើនពេកសុខចិត្តកប់ក្រោមដី ។ បងប្អូនគួរដឹងអ្នកជោគជ័យទម្រាំបានដល់ថ្ងៃនេះ គេលំបាកខ្លាំងណាស់ គេឆ្លងកាត់ឧបសគ្គរាប់លានជំពូក» ៕
ចែករំលែកព័តមាននេះ