ខេត្តកំពង់ធំ ៖ លោកគ្រូ អ្នកគ្រូ និងសិស្សានុសិស្ស សរុបចំនួន២០០នាក់ ទទួលបានសម្ភារសិក្សា និងប្រាក់ពីសម្បុរសជនខ្មែរ មកពីប្រទេសកាណាដា កាលពីព្រឹកថ្ងៃទី៨ ធ្នូ ២០១៥ នៅសាលាបឋមសិក្សាទក់ ស្ថិតនៅក្នុងឃុំក្រយា ស្រុកសន្ទុក ។
លោក ពេជ្យ សុធា អភិបាលស្រុកសន្ទុក ក្នុងនាមអាជ្ញាធរស្រុក និងតំណាងឲ្យលោកគ្រូ អ្នកគ្រូ និងសិស្សនុសិស្សនៃសាលាបឋមសិក្សាទក់ សូមថ្លែងអំណរគុណយ៉ាងជ្រាលជ្រៅចំពោះ លោក គា នី និងភរិយា ជាអាណិកជនខ្មែរ រស់នៅប្រទេសកាណាដា ព្រមទាំងសាច់ញាតិ ដែលតែងតែនាំយកសម្ភារសិក្សាមកជួយឧបត្ថម្ភដល់សិស្សានុសិស្ស ដែលកំពុងសិក្សានៅក្នុងប្រទេសកម្ពុជា ទោះបីជារូបលោកមានមុខរបរជាកម្មករកាត់ស្មៅនៅប្រទេសគេក៏ដោយ ក៏លោកមិនភ្លេចជាតិកំណើតរបស់ខ្លួនដែរ ។
សម្ភារសិក្សាទាំងនោះ រួមមាន សៀវភៅ២៣៥ក្បាល ប៊ិក២០០ដើម គូល័រ៤២៥ដើម ខ្មៅដៃ៧១០ដើម និងស្ករគ្រាប់៤៥កញ្ចប់ ចំណែកលោកគ្រូ អ្នកគ្រូ ក្នុងម្នាក់ៗទទួលបានប្រាក់ចំនួន៤០.០០០រៀលផងដែរ ។
លោក គា នី បានមានប្រសាសន៍ប្រកបដោយមនសិការថា លោករស់នៅប្រទេសកាណាដា៣០ឆ្នាំហើយ និងមានមុខរបរជាអ្នកកាត់ស្មៅ ត្រូវបានអ្នកផងសើចចំអកឲ្យគ្រប់គ្នា ប៉ុន្តែទោះបីជាយ៉ាងណាក៏ដោយ លោកមិនដែលខ្វល់ខ្វាយនឹងពាក្យនិន្ទារបស់គេនោះទេ ពីព្រោះលោកយល់ថា ការងារអ្វីក៏ដោយសុទ្ធតែជាការងារថ្លៃថ្នូរ ធ្វើយ៉ាងណាឲ្យបានលុយចិញ្ចឹមជីវិត និងក្រុមគ្រួសារ នៅសល់មួយចំនួនទុកសម្រាប់មកលេងស្រុកខ្មែរ និងទិញសម្ភារសិក្សាយកមកជួយឧបត្ថម្ភដល់សិស្សានុសិស្ស ។
លោកបានបន្តថា រយៈពេល១០ឆ្នាំមកហើយដែលលោកតែងតែមកលេងស្រុកខ្មែរជារៀងរាល់ឆ្នាំ និងទិញសម្ភារសិក្សាចែកជូនសិស្សស្រុកខ្មែរ ហើយនៅថ្ងៃទី៣១ ខែធ្នូ លោកនឹងនាំយកសម្ភារមួយចំនួនទៅចែកជូនដល់សិស្សក្រីក្រនៅសាលាអន្តរជាតិដំណឹងល្អនៅឯរាជធានីភ្នំពេញ លោកក៏បានសន្យាជាមួយអាជ្ញាធរថា ឆ្នាំក្រោយលោក នឹងនាំយកអំណោយជាសម្ភារសិក្សាមកជួយឧបត្ថម្ភដល់សិស្សានុសិស្សស្រុកខ្មែរជាបន្តទៀត ៕
ចែករំលែកព័តមាននេះ