គន្លឹះទាំងអស់នេះគ្រាន់តែជាពន្លឺ និងការបង្ហាញផ្លូវសម្រាប់អ្នក ហើយអ្នកមិនចាំបាច់អនុវត្តន៍តាមទាំងអស់ក៏បាន ប៉ុន្តែប្រសិនបើអ្នកអាចទទួលយកនូវគន្លឹះទាំងនេះ ហើយព្យាយាមអនុវត្តន៍តាម នោះវាជួយទាំងសុខភាព និងការសន្សំប្រាក់របស់អ្នក ប្រសិនបើអ្នកកំពុងស្វែងរកព័ត៌មានអំពីការសន្សំប្រាក់ ។
គន្លឹះទាំង ៥ គឺដើម្បីផ្លាស់ប្តូរទម្លាប់នៃការរស់នៅ ដែលទទួលបានទាំងសុខភាព និងជួយទាំងការសន្សំប្រាក់ ៖
គន្លឹះទី ១ ព្យាយាមផ្លាស់ប្តូរខ្លួនឬអភិវឌ្ឍន៍ខ្លួន ៖ ការហាត់ប្រាណអាចជួយអ្នកឱ្យមានសុខភាពប្រសើរឡើង ហើយវាក៏ជាវិធីសាស្ត្រមួយដើម្បីផ្លាស់ប្តូរការរស់នៅរបស់អ្នក ប្រសិនបើចង់សន្សំប្រាក់ក្នុងពេលតែមួយនេះ ។ ដើម្បីធ្វើវាឱ្យបានសម្រេចអ្នកត្រូវរៀបចំផែនការ និងការប្តេជ្ញាចិត្តក្នុងការសម្រកទម្ងន់ ខណៈដែលយើងនឹងអាចសន្សំប្រាក់បានខ្លះដែរ ។ អ្នកប្រាកដជាដឹងថា បច្ចុប្បន្នមនុស្សជាច្រើនបានចំណាយថវិកាប្រចាំខែ ប្រចាំឆមាស និងឆ្នាំ ដើម្បីបង់ថ្លៃសេវាកម្មហាត់ប្រាណនៅក្លិបនានា ប៉ុន្តែបើយើងគិតទៅលើការហាត់ប្រាណ មិនមែនទាល់តែហាត់នៅក្លិបទើបហាត់បាននោះទេ វាមានវិធីសាស្ត្រជាច្រើនដែលអ្នកអាចហាត់ខ្លូនឯងបាន ប្រសិនបើអ្នកមិនចង់ចំណាយទៅលើរបស់ហាត់ប្រាណនៅផ្ទះដែលថ្លៃៗ នោះអ្នកអាចហាត់ជ្រើសរើសបាន ដូចជាការជិះកង់ ហែលទឹក ឬការធ្វើសកម្មភាពណាមួយដែលធ្វើឱ្យអ្នកមានសកម្មភាពជានិច្ច ។
គន្លឹះទី ២ បោះចោលទម្លាប់អាក្រក់មួយចោល ៖ ប្រសិនបើអ្នកកំពុងរកវិធីដើម្បីសន្សំប្រាក់ ហើយផ្តល់សុខភាពល្អឡើងវិញនោះ អ្នកគួរបោះបង់ទម្លាប់ចូលចិត្តផឹកស្រា ស្រាបៀ និងការជក់បារី ។ មនុស្សគ្រប់គ្នាសុទ្ធតែដឹងថា របស់អស់ទាំងនេះធ្វើឱ្យខូចសុខភាព និងបំផ្លាញលុយរបស់យើង ដូចនេះអ្នកគួរតែកាត់បន្ថយ ឬបញ្ឈប់តែម្តងប្រសិនជាអាច ។
គន្លឹះទី ៣ គួរតែផ្អាកការចេញទៅបរិភោគអាហារខាងក្រៅ ៖ ធម្មតាការបរិភោគខាងក្រៅតែងតែមានតម្លៃថ្លៃជាងរបស់យើងធ្វើខ្លួនឯងនៅផ្ទះ ហើយក៏មិនប្រាកដថាអាហារទាំងនោះផ្តល់ឱ្យសុខភាពល្អដែរ វាអាចជាអាហារឆាប់ធ្វើឱ្យយើងឡើងទំងន់ ឬមានហានិភ័យផ្សេង (មិនសំដៅលើអាហារនៅក្រៅទាំងអស់នោះទេ) ។ ការបរិភោគអាហារនៅផ្ទះអាចជួយអ្នកសន្សំលុយ និងបានទាំងសុខភាព ។ ហើយអ្នកជំនាញណែនាំឱ្យអ្នកស្វែងយល់អំពីអាហារ និងបរិភោគតែអាហារប្រភេទជំនួយនិងបំប៉នសុខភាព ល្អជាងការដើរហើរទៅញុំាខាងក្រៅ ។ អ្នកអាចជ្រើសរើសបាន រវាងការញុំាខាងក្រៅ និងមិនទទួលបានសុខភាពល្អ និងការធ្វើម្ហូបនៅផ្ទះហើយបានទទួលបានសុខភាព និងសន្សំប្រាក់ ។
គន្លឹះទី ៤ ការជ្រើសរើសអាហារបរិភោគឱ្យត្រឹមត្រូវ ៖ ការជ្រើសរើសអាហារដែលត្រឹមត្រូវ វានឹងមិនធ្វើឱ្យអ្នកចំណាយលុយខ្ជះខ្ជាយ ហើយតម្រូវតាមសុខភាពរបស់អ្នកទៀត ។ អ្នកគួរស្វែងយល់អាហារដែលងាយធ្វើឱ្យអ្នកធាត់ឬឡើងទម្ងន់លឿន អ្នកជំនាញណែនាំឱ្យអ្នកបរិភោគបន្លែ ផ្លែឈើ ទឹកដោះគោស្រស់ ឱ្យបានច្រើន ។ នៅពេលដែលយើងកំណត់បានអាហារត្រឹមត្រូវនោះយើងគួរតែទិញរបស់សម្រាប់បរិភោគ ចៀសវាងការទិញរបស់ដែលមិនផ្តល់សុខភាព ហើយត្រូវបោះចោល ដូចនេះអ្នកអាចសន្សំប្រាក់បានដោយមិនទិញអាហារផ្តេសផ្តាស់ ហើយទទួលបានសុខភាពល្អបានទៀតផង ។
គន្លឹះទី ៥ ទាញអត្ថប្រយោជន៍ពីកន្លែងធ្វើការ ៖ ប្រសិនបើនៅកន្លែងធ្វើការរបស់អ្នក មានផ្តល់ជូនអ្នកនូវអត្ថប្រយោជន៍ នៃកម្មវិធីសុខភាព ដូចជាមានការបញ្ចុះតម្លៃនៅក្លឹបហាត់ប្រាណ ការរៀនអំពីកម្មវិធីសុខភាពដោយឥតគិតថ្លៃ ។ល។ សម្រាប់អ្នកធ្វើការក្នុងក្រុមហ៊ុននេះ ក្រុមហ៊ុននោះ ដូចនេះប្រសិនបើក្រុមហ៊ុនអ្នកមានប្រម៉ូសិននេះដែរ អ្នកគួរចូលជាសមាជិកនិងរួមជាមួយពួកគេ (គួរបញ្ជាក់ផងដែរ មានក្រុមហ៊ុនខ្លះគេ ព្យាយាមធ្វើយ៉ាងណាដើម្បីឱ្យបុគ្គលិកគេយល់ដឹងអំពីការថែរក្សាសុខភាព) ។ មួយវិញទៀត ប្រសិនបើនៅក្នុងក្រុមហ៊ុនផ្តល់ជាសេវាធនារ៉ាប់រងសុខភាព health insurance អ្នកគួរតែទាញយកផលប្រយោជន៍ពីវា ដូចជាឧស្សាហ៍ពិនិត្យសុខភាព និងជួបពិភាក្សាជាមួយគ្រូពេទ្យ (បញ្ជាក់ ៖ សេវា health insurance មានប្រភេទរបស់វា) ។ ដូចនេះវាបានទាំងចំណេះដឹង និងការសន្សំប្រាក់ផងដែរ ។
គួរបញ្ជាក់ផងដែរថា ការចាប់ផ្តើមពីទម្លាប់តូចៗទៅ វាអាចផ្លាស់ប្តូររបៀបរស់នៅរបស់អ្នក ឱ្យចេះសន្សំសំចៃ ។ អ្នកត្រូវដឹងថា ការផ្លាស់ប្តូរទម្លាប់ដែលនាំឱ្យប្រាក់របស់អ្នកមិនដែលសល់ វាមានសារៈសំខាន់ណាស់ ប្រសិនបើអ្នកកំពុងមានបំណង ដើម្បីឆ្ពោះទៅគោលដៅណាមួយ ៕ ប្រភព៖ Dicover
ចែករំលែកព័តមាននេះ