រាជធានីភ្នំពេញ ៖ ក្រសួងធនធានទឹក និងឧតុនិយម បានបញ្ជាក់ថា ចាប់ពីថ្ងៃទី៧ ដល់ថ្ងៃទី១៣ ខែកក្កដា ឆ្នាំ២០២១ ខាងមុខនេះ តំបន់មួយចំនួននឹងមានភ្លៀងធ្លាក់ខ្លាំងលាយឡំ ផ្គរ រន្ទះ និងខ្យល់កន្ត្រាក់។
យោងតាមសេចក្តីជូនដំណឹងស្តីពីស្ថានភាពធាតុអាកាសរបស់ក្រសួងធនធានទឹកនៅថ្ងៃទី៦ ខែកក្កដា ឆ្នាំ២០២១នេះ បានឲ្យដឹងថា នៅម៉ោង១យប់ថ្ងៃទី៦ ខែកក្កដា ប្រព័ន្ធសម្ពាធទាប ITCZ បានកើតឡើងដោយអូសបន្លាយពីភាគខាងជើងថៃ ភ្ជាប់ជាមួយសម្ពាធទាបសកម្មមួយនៅលើសមុទ្រចិនខាងត្បូង ។
ក្រសួងថា នៅថ្ងៃទី៧-១១ ខែកក្កដា ប្រព័ន្ធសម្ពាធទាបនឹងរំកិលចុះមកក្រោមអូសបន្លាយកាត់លើតំបន់ ជួរភ្នំដងរែក និងភាគឦសានកម្ពុជា ។ ទន្ទឹមនឹងនោះ ខ្យល់មូសុងនិរតីបក់ក្នុងល្បឿនបង្គួរ ។ ដោយ ឡែកសម្ពាធទាបសកម្មនៅលើសមុទ្រចិនខាងត្បូង អាចនឹងវិវត្តទៅជាវិសម្ពាធទាបរយៈពេលខ្លីមុននឹង ថមថយឥទ្ធិពលពេលដើរចូលដល់ប៉ែកខាងក្រោមនៃភាគខាងជើងវៀតណាម នៅថ្ងៃទី៨ ខែកក្កដា ។
ក្រសួងបន្ថែមថា ស្ថានភាពបែបនេះ នឹងធ្វើឲ្យបណ្តាខេត្តនៅតំបន់វាលទំនាបកណ្ដាលមាន សីតុណ្ហភាពអប្បបរមា ចាប់ពី ២៤-២៦ °C នឹងសីតុណ្ហភាពអតិបរមា មានពី ២៨-៣០ ºC នឹងអាចមានភ្លៀងធ្លាក់ក្នុងកម្រិតពីបង្គួរទៅច្រើនលាយឡំនឹងផ្គររន្ទះ ខ្យល់កន្ត្រាក់ផងដែរ។
ទន្ទឹមនឹងនោះ ក៏អាចមានផ្នែកមួយចំនួននៃបណ្តាខេត្តនៅក្នុងភូមិសាស្ត្រជាប់ជួរភ្នំក្រវាញ និងជួរភ្នំដងរែក មានភ្លៀងធ្លាក់ខ្លាំង ។ ចំណែកបណ្តាខេត្តដាប់ជួរភ្នំដងរែក និងខ្ពង់រាបឦសានមានសីតុណ្ហភាពអប្បបរមា មានពី ២២-២៤ °C នឹងសីតុណ្ហភាពអតិបរមា មានពី ២៧-២៩ °C នឹងអាចមានភ្លៀងធ្លាក់ក្នុងកម្រិតពីបង្គួរទៅខ្លាំង ។
ដោយឡែកតំបន់មាត់សមុទ្រ មានសីតុណ្ហភាពអប្បបរមា មានពី ២៤-២៦ °C និងសីតុណ្ហភាពអតិបរមា មានពី ២៧-២៩ °C នឹងអាចមានភ្លៀងធ្លាក់ពីបង្គួរទៅខ្លាំង ។ នៅលើផ្ទៃសមុទ្រនឹងអាចមានភ្លៀងខ្យល់ខ្លាំង និងរលកសមុទ្រខ្ពស់ៗ ។
ដោយសារស្ថានភាពបែបនេះ ក្រសួងបានសូមសាធារណជនជ្រាបជាព័ត៌មាន និងសូមប្រុងប្រយ័ត្នចំពោះបាតុភូតភ្លៀងផ្គរ រន្ទះ និងខ្យល់កន្ត្រាក់ ជាពិសេសអ្នកនេសាទ និងអ្នកដំណើរសមុទ្រ សូមប្រុងប្រយ័ត្នចំពោះភ្លៀងខ្យល់ខ្លាំង និងរលកសមុត្រខ្ពស់ៗ ចាប់ពីថ្ងៃទី៧ -១០ ខែកក្កដា ឆ្នាំ២០២១ ៕
ចែករំលែកព័តមាននេះ