អាជ្ញាធរហ្វាំងឡង់កំពុងពិចារណាចំណាយប្រាក់ជីវភាពគោលប្រចាំខែដោយមិនគិតពន្ធដល់ពលរដ្ឋគ្រប់រូបក្នុងមួយខែ៨០០អឺរ៉ូ ។
របាយការណ៍បញ្ជាក់ថា គម្រោងនោះបានស្នើឡើងដោយវិទ្យាស្ថានធានារ៉ាប់រង
អាជ្ញាធរហ្វាំងឡង់កំពុងពិចារណាចំណាយប្រាក់ជីវភាពគោលប្រចាំខែដោយមិនគិតពន្ធដល់ពលរដ្ឋគ្រប់រូបក្នុងមួយខែ៨០០អឺរ៉ូ ។
របាយការណ៍បញ្ជាក់ថា គម្រោងនោះបានស្នើឡើងដោយវិទ្យាស្ថានធានារ៉ាប់រងជាតិហ្វាំងឡង់ ។ លោកអាឡិចសានឌ័រ ស្ទប រដ្ឋមន្ត្រីក្រសួងហិរញ្ញវត្ថុហ្វាំងឡង់បញ្ជាក់ថា ប្រាក់ចំណូលគោលប្រភេទនេះ គួរយកទៅប្រើជំនួសប្រព័ន្ធចំណាយលើផលប្រយោជន៍ផ្នែកសង្គមកិច្ចផ្សេងៗដែលមានសរុប ក្នុងបំណងដើម្បីជំរុញដល់ពលរដ្ឋដែលគ្មានការងារគួរយល់ព្រមចូលទៅទីផ្សារការងារជាថ្មី ក្រោយពីអត្រាគ្មានការងារកើនខ្ពស់ជាប្រវត្តិសាស្ត្រ ។ អ្នកដែលគ្មានការងារភាគច្រើនរមែងជ្រើសយកការរង់ចាំប្រាក់ឧបត្ថម្ភជាច្រើនរូបភាពពីរដ្ឋាភិបាល ឬរកការងារនៅក្រៅម៉ោងជំនួសការខ្វល់ខ្វាយក្នុងការរកការងារអចិន្ត្រៃយ៍ ។
ផែនការកាត់បន្ថយប្រាក់ឧបត្ថម្ភក្នុងរូបភាពផ្សេងទាំងអស់នឹងនៅសល់តែប្រាក់សម្រាប់ជីវភាពគោលដែលរដ្ឋាភិបាលនឹងផ្តល់ប្រចាំខែ គឺស្ថិតក្រោមការដឹកនាំរបស់លោកនាយករដ្ឋមន្ត្រីជូហា ស៊ីពីឡា ។ ផែនការនោះបានកើតឡើងក្រោយពីអត្រាគ្មានការងារធ្វើនៅក្នុងប្រទេសកើនខ្ពស់ដល់ទៅ១០% ខណៈពេលអត្រាគ្មានការងារនៅក្នុងក្រុមយុវជនហ្វាំឡង់មានអាយុទាបជាង២៥ឆ្នាំ បានកើនខ្ពស់ដល់២២,៧%ក្នុងពេលបច្ចុប្បន្ន ។
សម្រាប់លទ្ធផលនៃការអង្កេតលើការយល់ឃើញរបស់ពលរដ្ឋកាលពីពេល ថ្មីៗកន្លងមកនៅហ្វាំងឡង់ ដែលរៀបចំដោយវិទ្យាស្ថានធានារ៉ាប់រងជាតិ ឃើញថា ប្រជាពលរដ្ឋជិត៦៩%យល់ស្របជាមួយរដ្ឋាភិបាលក្នុងការកំណត់អត្រាចំណូលគោលជាមូលដ្ឋាននោះ និងរំពឹងថា នឹងចូលជាធរមានចាប់ពីខែវិច្ឆិកា ២០១៦ តទៅ។ ផែនការនេះនឹងធ្វើឱ្យរដ្ឋាភិបាលហ្វាំងឡង់ ត្រូវទទួលបន្ទុកលើថវិកាខ្ពស់ដល់ទៅ៤៦.៧០០លានអឺរ៉ូក្នុងមួយឆ្នាំ ៕
ចែករំលែកព័តមាននេះ