ខេត្តក្រចេះ ៖ អាជ្ញាធរខេត្តក្រចេះ នៅព្រឹកថ្ងៃទី០៥ កក្កដា ឆ្នាំ២០២១នេះ បានសម្រេចអនុញ្ញាតឲ្យបើកដំណើរការផ្សារសាមគ្គីក្រុងក្រចេះឡើងវិញ បន្ទាប់ពីត្រូវបានបិទអស់មួយរយៈពេលខ្លីកន្លងទៅ ។ ជាក់ស្ដែង…
ខេត្តក្រចេះ ៖ អាជ្ញាធរខេត្តក្រចេះ នៅព្រឹកថ្ងៃទី០៥ កក្កដា ឆ្នាំ២០២១នេះ បានសម្រេចអនុញ្ញាតឲ្យបើកដំណើរការផ្សារសាមគ្គីក្រុងក្រចេះឡើងវិញ បន្ទាប់ពីត្រូវបានបិទអស់មួយរយៈពេលខ្លីកន្លងទៅ ។
ជាក់ស្ដែង នៅព្រឹកនេះ មានបងប្អូនអាជីវករលក់នៅក្នុងផ្សារសាមគ្គី ក្រុងក្រចេះ មួយចំនួនធំ បានមកបើកតូបរៀបចំអីវ៉ាន់លក់ដូរដូចធម្មតា ដោយអនុវត្តតាមវិធានការណែនាំរបស់ក្រសួងសុខាភិបាល ៣កុំ និង៣ការពារ ដើម្បីចូលរួមទប់ស្កាត់ការរីករាលដាលនៃជំងឺកូវីដ-១៩។ ប៉ុន្តែ នៅមានអាជីវករមួយចំនួនតូចនៅតែបន្តបិទទីតាំងតូបរបស់ខ្លួន បើទោះបីជារដ្ឋបាលខេត្តក្រចេះបានសម្រេចអនុញ្ញាតឲ្យបើកដំណើរការផ្សារសាមគ្គីក្រុងក្រចេះនេះឡើងវិញក៏ដោយ។
ទន្ទឹននឹងនោះ គេសង្កេតឃើញថា ការលក់ដូរពីសំណាក់អាជីវករនៅក្នុងផ្សារសាមគ្គីក្រុងក្រចេះនៅពុំទាន់បានគ្រប់គ្នានៅឡើយទេ ដោយសារកត្តាព្រួយបារម្ភនៃការឆ្លងរីករាលដាលនៃជំងឺកូវីដ-១៩។ ដោយឡែក សម្រាប់ប្រជាពលរដ្ឋដែលពួកគាត់និយមដើរផ្សារទិញបន្លែ ផ្លែឈើ ត្រី សាច់ និងទំនិញផ្សេងៗទៀត គឺមានសភាពស្ងប់ស្ងាត់ជាងមុន លុះត្រាតែមានតម្រូវការចាំបាច់ទើបពួកគាត់មកទិញតែម្តង។
ជាមួយគ្នានេះ យោងតាមរបាយការណ៍បញ្ជាក់ពីមន្ទីរសុខាភិបាលខេត្តក្រចេះ បានឲ្យដឹងថា ស្ថានភាពជំងឺកូវីដ-១៩ ក្នុងខេត្តក្រចេះ គិតត្រឹមថ្ងៃទី០៤ ខែកក្កដា ឆ្នាំ២០២១ ករណីវិជ្ជមាន សរុបចំនួន ១៣០នាក់ ស្រី ៦៧នាក់ ជាសះស្បើយ ២០នាក់ ស្រី ១១នាក់ ករណីស្លាប់ ៣នាក់ ស្រី២នាក់ និងកំពុងព្យាបាល ១០៧នាក់ ស្រី៥៤នាក់។ គូសបញ្ជាក់ថា នៅក្នុងថ្ងៃទី៤ ខែកក្កដដា ឆ្នាំ២០២១នេះ ក្រុមការងារជំនាញនៃមន្ទីរសុខាភិបាលខេត្ត បានរកឃើញអ្នកវិជ្ជមានកូវីដ-១៩ ចំនួន ៦នាក់ ដែលជាតួលេខមួយអាចបញ្ជាក់បានថា ចំនួនអ្នកឆ្លងមានការថយចុះ ក្នុងអំឡុងនៃការផ្ទុះជំងឺកូវីដ-១៩ ជាសហគមន៍លើកដំបូងក្នុងខេត្តក្រចេះ៕
ចែករំលែកព័តមាននេះ