សារព័ត៌មានបទេសកាលពីពេល ថ្មីៗកន្លងមកផ្សាយថា រដ្ឋាភិបាលម៉ាឡេស៊ី មានផែនការកំណត់អាយុអ្នកផឹកគ្រឿងស្រវឹង ដែលពីមុនអាយុ១៨ឆ្នាំទៅ២១ឆ្នាំ ។ វាជាផ្នែកមួយនៃយុទ្ធសាស្ដ្រការពារយុវជនពីការផឹកស្រា និងកំណត់ជាតិស្រវឹងដល់ក្រុមយុវជនដែលមានហានិភ័យខ្ពស់ ។
ក្រៅពីនេះអាជ្ញាធរមានគម្រោងកំណត់ឱ្យបិទស្លាកបន្ថែមលើផលិតផលគ្រឿងស្រវឹង ដើម្បីក្រើនរំលឹកពីផលប៉ះពាល់សុខភាព ។ ទោះបីបែបណាក៏ដោយ គម្រោងនេះ ផ្ញើទៅអង្គការសុខភាពពិភពលោកនៅក្រុងហ្សឺណែវ កាលពីថ្ងៃទី១ ធ្នូ ២០១៥ ដោយមិនបានបញ្ជាក់ច្បាស់ថា បម្រែបម្រួលពីស្ថានភាពនោះនឹងកើតឡើងនៅពេលណានៅឡើយទេ?
នៅក្នុងឯកសារមានអញ្ជើញដល់បណ្ដាប្រទេសជាសមាជិករបស់អង្គការសុខភាពពិភពលោក ត្រូវចូលរួមផ្ដល់យោបល់នៅក្នុងរយៈពេល៦០ថ្ងៃខាងមុខ ។
ម៉ាឡេស៊ី ជាប្រទេសដែលពលរដ្ឋភាគច្រើនប្រហែល៦១,៣% ជាអ្នកកាន់សាសនាមូស្លុីម ប៉ុន្ដែជាទីតាំងរបស់ក្រុមហ៊ុនស្រាបៀរ ធំៗចំនួន២ គឺក្រុមហ៊ុន Guinness Anchor និង Carlsberg Brewery Malaysia Berhad ។
តាមលទ្ធផលនៃការធ្វើអាជីវកម្ម កាលពីថ្ងៃទី៣០ វិច្ឆិកា បង្ហាញឱ្យឃើញពីប្រាក់ចំណេញប្រចាំត្រីមាស កើនឡើងប្រហែល១១% ភេជ្ជៈជាគ្រឿងស្រវឹងមាននៅពាសពាញប្រទេស និងផឹកដោយពលរដ្ឋប្រហែល៣,៥លាននាក់ពីចំនួនសរុប៣០លាននាក់របស់ម៉ាឡេស៊ី។
តាមទិន្នន័យរបស់អាជ្ញាធរម៉ាឡេស៊ី បង្ហាញថា ផ្នែកមួយក្នុងប្រទេសមានចំណូលពីពន្ធស្រាច្រើនបំផុតនៅអាស៊ី ទោះបីជាការផឹកគ្រឿងស្រវឹងនៅក្នុងប្រទេសគ្មានការពេញនិយមក៏ដោយ ខណៈពេលនៅឥណ្ឌូណេស៊ី ជាប្រទេសជិតខាងដែលមានពលរដ្ឋម៉ូស្ល៊ីមច្រើនបំផុតនៅលើពិភពលោក សភាបានស្នើច្បាប់ហាមពិសាគ្រឿងស្រវឹងគ្រប់ប្រភេទ និងកំណត់ដាក់ពន្ធនាគារក្នុងរយៈពេល២ឆ្នាំ ចំពោះអ្នកប្រព្រឹត្តបទល្មើស កាលពីឆ្នាំមុន ។
ម៉ាឡេស៊ី បាននាំចេញស្រាមានតម្លៃសរុប២៦៩លានដុល្លារ ភាគច្រើននាំចេញទៅសិង្ហបុរី វៀតណាម និងថៃ រីឯស្រាបៀរមានតម្លៃ១៥៦លានដុល្លារ នាំទៅសិង្ហបុរី និងថៃ៕
ចែករំលែកព័តមាននេះ