ខេត្តរតនគិរី៖ ឯកឧត្តម ថង សាវុន អភិបាលនៃគណៈអភិបាលខេត្តរតនគិរី និងជាប្រធានគណៈកម្មការទប់ស្កាត់ជំងឺកូវីដ-១៩ ខេត្ត អមដំណើរដោយអភិបាលរងខេត្តអភិបាលក្រុង និងចៅសង្កាត់ ពិនិត្យស្ថានភាពតំបន់បិទខ្ទប់ ក្នុងភូមិសាស្រ្ដក្រុងបានលុង ខេត្តរតនគិរី។
ការចុះពិនិត្យស្ថានភាពតំបន់បិទខ្ទប់នោះ នារសៀលថ្ងៃទី១ ខែកក្កដា ឆ្នាំ២០២១ ហើយឯកឧត្តម បានធ្វើការកោតសរសើរដល់កម្លាំងគណៈបញ្ជាការឯកភាពក្រុងទាំងអស់ ដែលបានសហការគ្នា បានល្អ ក្នុងការបិទខ្ទប់តំបន់នេះ បានទាន់ពេលវេលា ដើម្បីកាត់បន្ថយ និងកាត់ផ្ដាច់ការចម្លង កុំអោយរីករាលដាលកាន់តែច្រើនថែមទៀត។
ឯកឧត្តម ក៏បានមានប្រសាសន៍ផ្ដាំផ្ញើអោយបងប្អូនប្រជាពលរដ្ឋ រស់នៅក្នុងតំបន់បិទខ្ទប់ទាំងអស់ ត្រូវយកចិត្តទុកដាក់ តាមដានសុខភាព បរិភោគអោយបានគ្រប់គ្រាន់ សូមបន្ដអនុវត្តវិធានការ ៣ការពារ ៣កុំ រួមមានលាងដៃ ពាក់ម៉ាស់ រក្សាគម្លាតអោយបានត្រឹមត្រូវ បើមិនមានភារកិច្ចចាំបាច់កុំទាន់ចេញក្រៅផ្ទះ។
នៅក្នុងតំបន់មួយចំនួន នៃខេត្តរតនគិរី ត្រូវបានបិទជាបណ្ដោះអាសន្ន និងអនុវត្តវិធានការ ដោយកំណត់ជាតំបន់លឿងទុំ និងតំបន់លឿង ដែលត្រូវអនុវត្ត ចាប់ពីថ្ងៃទី២៥ ខែមិថុនា ឆ្នាំ២០២១ រហូតដល់មានការសម្រេចជាថ្មី ដែលក្នុងនោះ តំបន់លឿងទុំ៖ ១/ សង្កាត់ឡាបានសៀក៖ ផ្សារបានលុង ផ្នែកខ្លះនៃភូមិថ្មី ភូមិអូរមៀត ភូមិអភិវឌ្ឍន៍ និងភូមិជ័យជំនះ។ ២/ សង្កាត់យក្ខឡោម៖ ផ្នែកខ្លះ នៃភូមិជ្រី ៣/ សង្កាត់កាចាញ៖ ផ្នែកខ្លះនៃភូមិ៤។
ចំណែកតំបន់លឿង រួមមាន៖ ១/ សង្កាត់ឡាបានសៀក៖ ផ្នែកខ្លះនៃភូមិថ្មី ភូមិអូររមៀត និងភូមិជ័យជំនះ។ ២/ សង្កាត់យក្ខឡោម៖ ផ្នែកខ្លះ នៃភូមិឡាប៉ូ។ ៣/ សង្កាត់កាចាញ៖ ផ្នែកខ្លះ នៃភូមិ៤ ៤/ សង្កាត់បឹងកន្សែង៖ ផ្នែកខ្លះ នៃភូមិទេសអន្លុង ភុមិអូរកន្ដិល និងភូមិអូរកន្សែង។
ឆ្លៀតក្នុងឱកាសនោះផងដែរ ឯកឧត្តម ក៏បានអញ្ជើញត្រួតពិនិត្យទីតាំងដាក់អោយអាជីវករ លក់ដូរជាបណ្ដោះអាសន្ន នៅទីតាំងមុខមន្ទីរវប្បធម៌ខេត្តរតនគិរីផងដែរ។
ឯកឧត្តម ក៏បានផ្ដាំផ្ញើដល់អាជីវករ និងបងប្អូនប្រជាពលរដ្ឋទាំងអស់បន្ដពាក់ម៉ាស់ លាងដៃ និងរក្សាគម្លាតអោយបានត្រឹមត្រូវ ដើម្បីយើងទាំងអស់គ្នាឆាប់រួចផុតពីស្ថានការណ៍ដ៏លំបាកនេះ៕ ផង់ វិន
ចែករំលែកព័តមាននេះ