- ភ្នំពេញ
ភ្នំពេញ៖ ចាប់ពីថ្ងៃទី១ ខែកក្កដា ឆ្នាំ២០២១នេះតទៅ រាជធានីភ្នំពេញ បានបន្ថែមក្រុមហ៊ុនប្រមូល និងដឹកជញ្ជូនសំរាម ២ក្រុមហ៊ុនទៀត បន្ថែមលើក្រុមហ៊ុនស៊ីនទ្រី ដែលបាន…
ភ្នំពេញ៖ ចាប់ពីថ្ងៃទី១ ខែកក្កដា ឆ្នាំ២០២១នេះតទៅ រាជធានីភ្នំពេញ បានបន្ថែមក្រុមហ៊ុនប្រមូល និងដឹកជញ្ជូនសំរាម ២ក្រុមហ៊ុនទៀត បន្ថែមលើក្រុមហ៊ុនស៊ីនទ្រី ដែលបាន និងកំពុងប្រតិបត្តិការយូរឆ្នាំមកហើយ។ ទន្ទឹមនឹងការបន្ថែមចំនួនក្រុមហ៊ុនប្រមូល និងដឹកជញ្ជូនសំរាម នៅភ្នំពេញ ដោយបែងចែកជា ៣តំបន់នេះ ក៏គួរតែបន្ថែមធុងសំរាម និងការដឹកជញ្ជូនសំរាមឲ្យបានរៀងរាល់ថ្ងៃ នៅគ្រប់ផ្លូវ និងគ្រប់ទីកន្លែងផងដែរ។
កាលពីថ្ងៃទី៣០ ខែមិថុនា ឆ្នាំ២០២១ រដ្ឋបាលរាជធានីភ្នំពេញ បានប្រកាសថា ចាប់ពីថ្ងៃទី១ ខែកក្កដា ឆ្នាំ២០២១ តទៅ ប្រតិបត្តិករថ្មី ចំនួន ៣ក្រុមហ៊ុន នឹងចាប់ផ្តើមសម្អាត ប្រមូល និងដឹកជញ្ជូនសំរាម សំណល់រឹង នៅរាជធានីភ្នំពេញ។
ប្រតិបត្តិករថ្មីចំនួន ៣ក្រុមហ៊ុន ដែលចាប់ផ្តើមសម្អាតប្រមូល និងដឹកជញ្ជូនសំរាម សំណល់រឹង នៅរាជធានីភ្នំពេញ ចាប់ពីថ្ងៃទី០១ ខែកក្កដាតទៅ ត្រូវបានបែងចែក ជា ៣តំបន់ដាច់ដោយឡែកពីគ្នា ក្នុងខណ្ឌទាំង១៤ នៅភ្នំព
តាមសេចក្តីជូនដំណឹង ប្រតិបត្តិករថ្មី ទាំង ៣ក្រុមហ៊ុននោះ រួមមាន៖ ១-ក្រុមហ៊ុន ៨០០ Super/GAEA នឹងត្រូវផ្តល់សេវា ក្នុងតំបន់ទី១ ដែលមាន ៥ខណ្ឌ គឺខណ្ឌទួលគោក ខណ្ឌឫស្សីកែវ ខណ្ឌសែនសុខ ខណ្ឌជ្រោយចង្វារ និងខណ្ឌព្រែកព្នៅ។ ២-ក្រុមហ៊ុន Mizuda នឹងត្រូវផ្តល់សេវា ក្នុងតំបន់ទី២ ដែលមាន ៥ខណ្ឌ គឺខណ្ឌដូនពេញ ខណ្ឌ៧មករា ខណ្ឌដង្កោ ខណ្ឌពោធិ៍សែនជ័យ និងខណ្ឌកំបូល។ ៣-ក្រុមហ៊ុន ស៊ិនទ្រី/Everbright (China) នឹងត្រូវផ្តល់សេវា ក្នុងតំបន់ទី៣ ដែលមាន ៤ខណ្ឌ គឺខណ្ឌចំការមន ខណ្ឌបឹងកេងកង ខណ្ឌមានជ័យ និងខណ្ឌច្បារអំពៅ។
រដ្ឋបាលរាជធានីភ្នំពេញ ក៏បានអំពាវនាវដល់បងប្អូនប្រជាពលរដ្ឋទាំងអស់ នៅរាជធានីភ្នំពេញ មេត្តាវេចខ្ចប់ ទុកដាក់ និងបញ្ចេញសំរាម សំណល់រឹងរបស់ខ្លួន តាមការកំណត់ឱ្យបានត្រឹមត្រូវ ដើម្បីចូលរួម ថែរក្សា អនាម័យ និងបរិស្ថាននៅរាជធានីភ្នំពេញឱ្យបានស្អាតល្អជានិច្ច និងមេត្តាយោគយល់ចំពោះភាពរអាក់រអួល នៃការចាប់ផ្តើមដំបូងនេះ។
រដ្ឋបាលរាជធានីភ្នំពេញ បានប្រកាសថា ក្នុងដំណាក់ការអន្តរកាល នៃការផ្ទេរការផ្តល់សេវាប្រមូល និងដឹកជញ្ជូនសំរាម សំណល់រឹង ពីប្រតិបត្តិករចាស់ ទៅប្រតិបត្តិករថ្មី គឺអាចនឹងមានភាពរអាក់ រអួលខ្លះៗនៃការផ្តល់សេវា ជាពិសេស នៅតំបន់ ដែលទទួលខុសត្រូវ ដោយប្រតិបត្តិករថ្មី។
កាលពីខែតុលា ឆ្នាំ២០១៩ សម្តេចតេជោ ហ៊ុន សែន បានប្រកាសដកសិទ្ធិពីក្រុមហ៊ុន ស៊ីនទ្រី ដែលបានដេញថ្លៃប្រមូលសំរាមផ្តាច់មុខតែឯង នៅភ្នំពេញ ចាប់តាំងពីឆ្នាំ២០០៨។ កាលពីឆ្នាំ២០០៨ ក្នុងរាជធានីភ្នំពេញ មានប្រជាពលរដ្ឋប្រហែល ១លាននាក់ ហើយសំរាម ដែលបញ្ចេញជារៀងរាល់ថ្ងៃ មានប្រមាណជិត ១០០០តោនប៉ុណ្ណោះ ក្នុង ១ថ្ងៃ។ ប៉ុន្តែពេលនេះ ភ្នំពេញ កាន់តែធំ ហើយប្រជាពលរដ្ឋ ក៏កាន់តែច្រើន។
រដ្ឋបាលរាជធានីភ្នំពេញ លើកឡើងថា នៅភ្នំពេញ សព្វថ្ងៃ ប្រជាពលរដ្ឋ កើនដល់ជាង ៣លាននាក់ ដែលធ្វើឲ្យបរិមាណសំរាម ក៏កើនឡើង រហូតដល់ ២៨០០ តោន ទៅជាង ៣០០០ តោន ក្នុង ១ថ្ងៃ។
ក្រៅពីរៀបចំការប្រមូលសំរាមជា ៣តំបន់ ក្នុងខណ្ឌទាំង១៤ ក្នុងរាជធានីភ្នំពេញ ដោយក្នុងមួយតំបន់ មានមួយក្រុមហ៊ុន ជាអ្នកទទួលខុសត្រូវ ហើយនោះ រដ្ឋបាលរាជធានីភ្នំពេញ ក៏ត្រូវតែរៀបចំតារាងពេលវេលាជាក់លាក់ ក្នុងការប្រមូលសំរាមពីគ្រប់ច្រកផ្លូវ និងតម្រូវឲ្យប្រជាពលរដ្ឋ បង់ថ្លៃសេវានេះផងដែរ។
នៅក្នុងដំណាក់ការអន្តកាល កន្លងមកនេះ គឺអាជ្ញាធររាជធានីភ្នំពេញ បានបន្តឲ្យក្រុមហ៊ុនស៊ីនទ្រី ប្រមូល ដឹកជញ្ជូនសំរាម ហើយការបង់លុយ ធ្វើឡើងតាមធនាគារ ឬកន្លែងវេរលុយ ដោយសាលារាជធានីភ្នំពេញ ជាអ្នកទទួលបន្ទុក។
នៅពេលមានក្រុមហ៊ុនថ្មីបន្ថែម ២ទៀត បូកទាំងស៊ីនទ្រី គឺ ៣ក្រុមហ៊ុន ចាប់ពីថ្ងៃទី១កក្កដាតទៅនេះ គេជឿជាក់ថា ការផ្តល់សេវាប្រមូលសំរាម និងសំណល់រឹង នៅភ្នំពេញ នឹងមានភាពល្អប្រសើរ ជាងមុន។ ប៉ុន្តែទន្ទឹមនឹងបន្ថែមក្រុមហ៊ុនថ្មី ទទួលបន្ទុកលើការងារប្រមូល ដឹកជញ្ជូនសំរាមនេះ អាជ្ញាធរសមត្ថកិច្ច គួរតែសហការជាមួយក្រុមហ៊ុនប្រមូលសំរាម បន្ថែមធុងសំរាម បង្ហើនចំនួនបុគ្គលិកកម្មករបោសសំអាតប្រចាំថ្ងៃ បង្កើនចំនួនឡាន និងពិសេសរៀបចំឲ្យឡាន ដឹកជញ្ជូនសំរាម រៀងរាល់ថ្ងៃ។
ដោយឡែកប្រជាពលរដ្ឋ អ្នករស់នៅភ្នំពេញ ក៏គួរតែចូលរួម ដោយទុកដាក់សំរាម ក្នុងធុង កញ្ឆេ ច្រកថង់ ទុកដាក់កន្លែងសមគួរ ដែលភ្លៀងមក មិនលិច អណ្តែត ខ្យល់មិនប៉ើង ហើយឆ្កែ ក៏មិនហែកហួរកាកសំណល់ទាំងនោះ បានឡើយ។
ខែនេះ ជាខែភ្លៀង បើសំរាមរសាត់អណ្តែត រាយប៉ាយ ពេលភ្លៀង នោះអាចនឹងបង្កការកកស្ទះលូ ហើយក៏ស្អុយរលួយ សំរាម ជះក្លិន មិនល្អ មកដល់អ្នករស់នៅ និងអ្នកដំណើរតាមផ្លូវ ជាមិនខាន។ ដូច្នេះទាមទារឲ្យទុកដាក់សំរាមត្រឹមត្រូវ ហើយក៏ត្រូវដឹកជញ្ជូនទៀងពេលរៀងរាល់ថ្ងៃផងដែរ។
ក្រៅពីនេះ ការគ្រប់គ្រងសំរាមអនាថា មិនមានម្ចាស់ ក៏ជារឿង ត្រូវគិតគូរដែរ។ កន្លងមក មានប្រជាពលរដ្ឋមួយចំនួន ហាក់ដូចជា យកតែរួចខ្លួន តែខ្លួនឯង។ នោះគឺមានអ្នកខ្លះ បញ្ចេញសំរាមឲ្យផុតៗ តែពីផ្ទះខ្លួនឯង តែបែរជាយកសំរាមទាំងថង់ៗ ទៅបោះចោល នៅកៀនរបងសាលារៀន នៅដីទំនេរ ដីវាល ឬក៏ក្បែររបងផ្ទះអ្នកផ្សេងទៅវិញ។
ធ្វើដូច្នេះ ចេះតែបានហើយ តែចូរអ្នកបោះសំរាមទាំងនោះ គិតផងថា យករួចខ្លួនតែខ្លួនឯង ហើយបង្កជាគំនរសំរាម យូរៗ អាចកកស្ទះហៀរ និងប៉ើងរសាត់ពេញផ្លូវថែមទៀត។ មួយវិញទៀត ក្លិនសំរាម ដែលត្រូវទឹកភ្លៀងទាំងនោះ ក៏ជះក្លិនអសោចដល់អ្នកដំណើរ អ្នករស់នៅជិតគំនរសំរាម និងជាពិសេស បើសិស្សរៀនទៀត គឺប៉ះពាល់ដល់កូនគេកូនយើង ដែលអង្គុយរៀននៅជិតគំនរសំរាមនោះថែមទៀត។
ជាដំណោះស្រាយលើក្រុមអ្នកនិយមយកសំរាម មកបោះចោលតាមផ្លូវ ជិតរបងសាលារៀន ឬនៅដីវាល ទំនេរចោល ដែលបានកើតឡើងច្រើនកន្លែង នៅភ្នំពេញ គួរតែប្រជាពលរដ្ឋទាំងនោះ ភ្ញាក់រលឹក ហើយទុក ដាក់សំរាមឲ្យមានរបៀបនៅកៀនរបងមុខផ្ទះ ព្រោះឡានសំរាម តែងតែមកប្រមូល យកសំរាមទាំងនោះ ហើយបើទោះបីជាអ្នកទាំងនោះ យកសំរាម បោះចោលផុតៗពីផ្ទះខ្លួនឯងដូច្នេះមែន ក៏អ្នកទាំងនោះ នៅតែត្រូវ បង់លុយថ្លៃសំរាមប្រចាំខែដដែល។
អាជ្ញាធរសមត្ថកិច្ច ពិសេសអាជ្ញាធរភូមិឃុំសង្កាត់ ក៏គួរតែចុះធ្វើអនាម័យកន្លែង ដែលប្រជាពលរដ្ឋមួយចំនួន និយមបោះចោលសំរាម ក្លាយជាគំនរចល័ត និងសំរាមអនាថាទាំងនោះ ហើយអប់រំ ណែនាំ។ បើនៅតែមិន ស្តាប់ទេ ឈានដល់ការផាកពិន័យ ព្រោះយើងមានច្បាប់ ក្នុងការផាកពិន័យ អ្នកបោះចោលសំរាម ពាសវាល ពាសកាល ដោយត្រូវពិន័យពី ១ម៉ឺនរៀល ទៅ ១០ម៉ឺនរៀល ហើយក្នុងករណី មិនរៀងចាល ត្រូវទទួលការពិន័យជាប្រាក់ទ្វេរដង។
អាជ្ញាធរសមត្ថកិច្ច ក៏គួរតែតម្រូវឲ្យក្រុមហ៊ុនប្រមូលសំរាមទាំអ ៣នេះ រៀបចំកន្លែងស្តុកសំរាម នៅទីកន្លែង សមគួរណាមួយ និងបន្ថែមធុងសំរាមធំៗ តាមផ្លូវ តាមភូមិ ពិសេសតាមសាលារៀន របងវត្ត ជាដើម។ កន្លងមក អាចថា ផ្ទះរបស់ប្រជាពលរដ្ឋ ដែលតែងតែយកសំរាមមកបោះចោលទាំងនោះ តូចចង្អៀត ដែលឡាន សំរាម ចូលមិនដល់។
ក្រុមហ៊ុនប្រមូលសំរាមវិញ ក៏គួរតែមកប្រមូល និងដឹកជញ្ជូនសំរាមឲ្យបានទៀងទាត់ បើមិនបានរៀងរាល់ថ្ងៃទេ សូមត្រឹមតែ ២ ឬ ៣ថ្ងៃម្តង ព្រោះថា បើដូចសព្វថ្ងៃ មានដល់ទៅ ១អាទិត្យ ទើបមកយកសំរាមម្តង ដែលនាំឲ្យតំបន់ខ្លះ ត្រូវកកស្ទះសំរាម ស្អុយរលួយ កើតដង្កូវ ហើយហៀរស្ទះផ្លូវ ដោយសារតែសំរាមថែមទៀត។ ការងារមិនពេញដៃ មិនពេញជើងដូច្នេះហើយ បានជាស៊ីនទ្រី ត្រូវបានដកសិទ្ធិប្រមូលសំរាម នៅភ្នំពេញ កាលពីខែតុលា ឆ្នាំ២០១៩។
ដូច្នេះ ពេលមានក្រុមហ៊ុនប្រមូល និងដឹកជញ្ជូនសំរាម ដល់ទៅ ៣ក្រុមហ៊ុនហើយនោះ គួរតែសេវាដឹកជញ្ជូន និងប្រមូលសំរាមនៅភ្នំពេញ ដែលជាបញ្ហារ៉ាំរ៉ៃ ដូចជំងឺមហារីកយូរឆ្នាំមកហើយ បានប្រសើរឡើងវិញ។ បើទោះបីជាត្រូវឡើងថ្លៃសំរាមជាងរាល់ថ្ងៃនេះ ដែលផ្ទះខ្លះត្រឹម ១ដុល្លារ និង ២ដុល្លារ ក្នុង ១ខែ ក៏អ្នកនៅភ្នំពេញ គួរតែចូលរួមវិភាគទាន ព្រោះថា បើសំរាមនៅកកស្ទះ ដូចកាលពីពេលកម្មករស៊ីនទ្រី ធ្វើបាតុកម្ម មិនធ្វើការ កាលពីអំឡុងខែតុលា ឆ្នាំ២០២០ គឺពិបាកទ្រាំនឹងក្លិនសំរាមកាកសំណល់ទាំងនោះខ្លាំងណាស់។ តម្លៃត្រឹម ២ដុល្លារ ឬក៏ ១ម៉ឺនរៀល សម្រាប់១ផ្ទះ ក៏អ្នករស់នៅភ្នំពេញ មិនខ្លាចនឹងចំណាយទេ បើសិនជាសេវាដឹកជញ្ជូន ប្រមូលសំរាម ធ្វើឡើងបានទៀងទាត់នោះ៕
ចែករំលែកព័តមាននេះ