សត្វតោដែលជនជាតិចិនចិញ្ចឹមទាក់ទាញភ្ញៀវទេស ចរទៅទស្សនា ហើយឈ្មោះតោវិញម៉ាអែម
- តាកែវ
ខេត្តតាកែវ ៖ មិនបានប៉ុន្មានថ្ងៃផង សត្វតោ ដែលជនជាតិចិនចិញ្ចឹមនៅផ្ទះដោយដៃផ្ទាល់នោះ បានត្រូវក្រុមមន្ត្រីចម្រុះចុះទៅ
ខេត្តតាកែវ ៖ មិនបានប៉ុន្មានថ្ងៃផង សត្វតោ ដែលជនជាតិចិនចិញ្ចឹមនៅផ្ទះដោយដៃផ្ទាល់នោះ បានត្រូវក្រុមមន្ត្រីចម្រុះចុះទៅដកហូត និងយកទៅមជ្ឈមណ្ឌលថែទាំនិងសង្គ្រោះសត្វព្រៃភ្នំ តាម៉ៅ កំពុងមានការចាប់អារម្មណ៌ពីសំណាក់បងប្អូន ប្រជាពលរដ្ឋជាខ្លាំង និងមានការអាណិតអាសូរ ថែមទៀតផង ។
ប្រជាពលរដ្ឋដែលទៅទស្សនាមើលសត្វតោក្នុងទឹកមុខក្រៀមក្រំបានប្រាប់កោះសន្តិភាព នៅរសៀលថ្ងៃទី៣០ ខែមិថុនា ឆ្នាំ២០២១អោយដឹងថា ពួកគាត់ពិតជាអាណិតសត្វតោនោះខ្លាំងពិតមែន ពេលឮដំណឹងតៗគ្នាថា សត្វតោ ដែលជនជាតិចិនចិញ្ចឹមតាំងពីតូច អស់រយះពេលជាច្រើនឆ្នាំដោយដៃផ្ទាល់នៅក្នុងផ្ទះនោះ បានយកមកទុកនៅសួនសត្វ ភ្នំ តាម៉ៅ ។ ពួកគាត់ក៌បានធ្វើដំណើរមកមើលផ្ទាល់ ឃើញថាសត្វតោនោះស្លូតមែន ។ ពេលលឺសម្លេងមនុស្សនិយាយ សត្វតោនោះក្រោកមកមើល ក្រែងលោ ស្គាល់ម្ចាស់វា ។ ពួកគាត់ក៏លាន់មាត់ថា មិនដឹងលំបាកមេចទៅ ពេលនៅផ្ទះមានម្ចាស់បីបាច់ ថែរក្សា ងូតទឹក បោះទឹកដោះគោ ដេកលើគ្រែ មានម៉ាស៊ីនត្រជាក់ ។
ដោយឡែកលោកពូលក់ដូងម្នាក់ប្រចាំនៅទីនោះក៏បានប្រាប់កោះសន្តិភាព អោយដឹងដែរថា សត្វតោនោះត្រូវបានគេយកមកចិញ្ចឹមបន្តអស់រយះពេល៣ថ្ងៃមកហើយ គឺចាប់ពីថ្ងៃទី២៧ ខែមិថុនា មកដល់ថ្ងៃទី៣០ ខែមិថុនា នេះ ។ កាលពីម្សិលមិញឃើញម្ចាស់របស់សត្វតោ ជាជនជាតិចិន និងសាច់ញាត្តិបានធ្វើដំណើរមកមើលសត្វតោ ដោយកាន់ភ្ជាប់សត្វគោ និងចំណីអាហារ ជាច្រើនមុខទៀត ដើម្បីផ្គត់ផ្គង់ សត្វរបស់គាត់ ។ សត្វតោនោះពេលឃើញម្ចាស់វា វារត់ហក់ទៅអោប ថើប លិឍ ម្ចាស់វា ចេះដូចមនុស្សអញ្ចឹង ។
គាត់បន្ថែមថា សត្វតោ ហាក់ចម្លែកពេលម្ចាស់វានៅវាសប្បាយលេងជាមួយម្ចាស់វា ពេលម្ចាស់វាអតនៅវាធ្វើទឹកមុខក្រៀមក្រំ ស្រងូត ស្រងាត់ គួរអាណិតណាស់ ។ ពេលអ្នកមើកថែ ដាក់សាច់គោអោយស៊ី ក៌វាស៊ីអតបានច្រើនដែរ ។ ក្នុងមួយថ្ងៃ សត្វតោនោះត្រូវបានអ្នកមើលថែ អោយអាហារ ពីពេលក្នុងមួយថ្ងៃ ។
លោក យ៉ាន វីរះ ភេទប្រុស អាយុ២៨ឆ្នាំ ជាអ្នកមើលថែសត្វតោនោះ បានអោយដឹងថា សត្វតោ ពួកគាត់កំពុងអោយហូបសាច់ឆៅ ២០ភាគរយ ដើម្បីផ្សោមវាអោយយូៗទៅក្លាយជាសត្វតោ ព្រៃ។ ពីព្រោះសត្វតោនោះ កន្លងមកម្ចាស់របស់វា អោយស៊ីសាច់ឆ្អិន ។ សត្វតោនោះបើគិតជាទម្ងន់ ប្រហែល៧០ គីឡូ ។ ក្នុងមួយថ្ងៃសត្វតោនោះស៊ីអស់ប្រហែលសាច់ឆៅ៤គីឡូ ។
លោកបានបញ្ជាក់ថា ចំពោះសត្វតោទាំងអស់នៅក្នុងសួនសត្វ ភ្នំតាម៉ៅ នេះមាន៥ក្បាល ។ សរុបទាំងសត្វតោ ដែលទើបយកមក១ក្បាល ថ្មីនេះ ។
សូមបញ្ជាក់ថា សត្វតោឈ្មោល១ក្បាលខាងលើនេះឈ្មោះឃី ម៉ា មានទម្ងន់ជាង៧០គីឡូក្រាម ត្រូវបានបុរសជនជាតិចិនចិញ្ចឹមតាំងពីតូច រហូតដល់ពេលនេះ មានអាយុប្រមាណ១ឆ្នាំកន្លះ ដោយឲ្យវាស៊ីសាច់ប្រមាណ៦គីឡូក្រាមក្នុងមួយថ្ងៃ។
សូមរំលឹកទៀតថា ក្រុមមន្ត្រីចម្រុះ កាលពីព្រឹកថ្ងៃទី២៧ មិថុនា ឆ្នាំ២០២១ បានធ្វើការដកហូតតោឈ្មោល១ក្បាលពីជនជាតិចិន ដែលបានចិញ្ចឹមដោយខុសច្បាប់ នៅក្នុងលំនៅឋានរបស់ខ្លួនលេខ២២ ផ្លូវលេខ៣០៦ ភូមិ៧ សង្កាត់បឹងកេងកងទី១ ខណ្ឌបឹងកេងកង ។ ក្នុងការចុះទៅដកហូតតោ ដែលជាប្រភេទសត្វព្រៃកម្រនេះ ដឹកនាំដោយលោក គាំ សីហា នាយខណ្ឌរដ្ឋបាលព្រៃឈើភ្នំពេញ សហការជាមួយព្រះរាជអាជ្ញារងអមសាលាដំបូងរាជធានីភ្នំពេញ និងមានការចូលរួមពីអង្គការសម្ព័ន្ធមិត្តសត្វព្រៃ(Wildlife Alliance) ព្រមទាំងសមត្ថកិច្ចចម្រុះមូលដ្ឋាន ដែលជនជាតិចិនខាងលើបានចិញ្ចឹមសត្វព្រៃនៅក្នុងផ្ទះដោយខុសច្បាប់ ។
លោកនាយខណ្ឌរដ្ឋបាលព្រៃឈើភ្នំពេញបានឱ្យដឹងថា ដោយសារមានប្រជាពលរដ្ឋជិតខាងបានរាយការណ៍ប្រាប់ថា មានបុរសជនជាតិចិនចិញ្ចឹមតោនៅក្នុងផ្ទះវីឡាខាងលើ ទើបសមត្ថកិច្ចជំនាញសហការជាមួយអាជ្ញារមូលដ្ឋានធ្វើការស្រាវជ្រាវ និងឈានដល់ការចុះទៅដកហូតយកតោឈ្មោលមួយក្បាលនោះ ដើម្បីបញ្ជូនទៅថែរក្សាទុក ។
លោកបន្តថា ពលរដ្ឋមិនមានសិទ្ធិក្នុងការចិញ្ចឹមសត្វព្រៃដែលជាប្រភេទសត្វកម្រនោះទេដែលផ្ទុយពីមាត្រា៤៩ នៃច្បាប់ស្តីពីព្រៃឈើ កថាខណ្ឌ២ ត្រង់ចំណុច៣ ដែលបានចែងថា ការយកធ្វើជាកម្មសិទ្ធិ សន្និធិ ឬថែរក្សាជាលក្ខណៈសួនសត្វ ឬគ្រួសារនូវប្រភេទសត្វក្នុងក្រុមជិតផុតពូជត្រូវបានហាមឃាត់ ។
ក្រសួងបរិស្ថាន សូមអំពាវនាវដល់បងប្អូនប្រជាពលរដ្ឋចូលរួមថែរក្សា និងអភិរក្សសត្វព្រៃ និងកុំព្យាយាមចាប់សត្វកម្រៗមកចិញ្ចឹម នៅតាមផ្ទះ ដែលជាសកម្មភាពខុសច្បាប់ គួរទុកសត្វទាំងនោះឲ្យនៅរស់នៅក្នុងព្រៃធម្មជាតិដើម្បីបង្កើនការបន្តពូជបង្កើនចំនួនប្រភេទសត្វកម្រៗ ៕
ចែករំលែកព័តមាននេះ