ខេត្តប៉ៃលិន ៖ នៅក្នុងកម្មវិធីផ្សព្វផ្សាយបច្ចេកទេសកសិកម្មថ្មី ដែលធន់នឹងការប្រែប្រួលអាកាសធាតុ កម្មវិធី (ASPIRE) នៃមន្ទីរកសិកម្ម រុក្ខាប្រមាញ់ និងនេសាទខេត្តប៉ៃលិន បានរៀបចំពិធីប្រគល់ទុនសហវិនិយោគសម្រាប់បណ្តុំអាជីវកម្មចិញ្ចឹមឃ្មុំជូនដល់បណ្តុំអាជីវកម្ម ចិញ្ចឹមឃ្មុំសហគមន៍ព្រៃឈើភ្នំដោះក្រមុំ ដែលមានគ្រូសារគោលដៅជាសមាជិកសរុប៤០គ្រូសារ កាលពីថ្ងៃទី២៩ ខែមិថុនា ២០២១ ស្ថិតនៅភូមិបុស្អំ ឃុំស្ទឹងកាច់ ស្រុកសាលាក្រៅ ខេត្តប៉ៃលិន ក្រោមការដឹកនាំពីលោក សាយ សុផាត ប្រធានមន្ទីរកសិកម្ម រុក្ខាប្រមាញ់ និង នេសាទ ខេត្តប៉ៃលិន និងជាប្រធានអនុកម្មវិធី ASPIRE ដោយមានការចូលរួមពីលោក ឡាយ ពិសិដ្ឋ នាយរងខណ្ឌរដ្ឋបាលព្រៃឈើ លោក លោកស្រី ទីប្រឹក្សាកម្មវិធី អាស្បាយ (ASPIRE) ។
ក្នុងឳកាសនោះលោក សាយ សុផាត ប្រធានមន្ទីរកសិកម្ម បានសំណេះសំ ណាលថ្លែងជម្រាបជូន ទៅកាន់សមាជិកបណ្តុំអាជីវកម្មពីសកម្មភាពសំខាន់របស់កម្មវិធីអាស្បាយ គឺផ្សព្វផ្សាយបច្ចេកទេសថ្មីដែលធន់ទៅនឹងការប្រែប្រួលអាកាសធាតុ ដើម្បីឲ្យកសិករចេះអនុវត្តការងារកសិកម្ម តាមបរិបទនៃការប្រែប្រួលអាកាសធាតុផងដែរ ។ លោកប្រធានមន្ទីរក៏បានណែនាំដល់បណ្តុំអាជីវកម្ម ជាពិសេសក្រុមការងារដឹកជញ្ចូនឃ្មុំ ត្រូវខិតខំយកចិត្តទុកដាក់ ក្នុងការចិញ្ចឹមសត្វឃ្មុំ និងមានផែនការពង្រីកផលិតកម្មពី១៧ធុង ទៅ៣០ធុង នាដំណាច់ឆ្នាំ២០២១ ដោយអនុវត្តតាមបច្ចេកទេស ដែលបានណែនាំបង្ហាត់បង្ហាញកន្លងមក ។ ក្នុងបរិបទកូវីដ ១៩ នាពេលបច្ចុប្បន្ននេះ តម្រូវការទឹកឃ្មុំ ពិតជាមានតម្រូវការខ្ពស់ ព្រោះថាទឹកឃ្មុំជាឱសថខ្មែរបុរាណ ដែលមាននៅក្នុងផ្ទះជាចាំបាច់។
លោក ឡាយ ពិសិដ្ឋ នាយរងខ័ណ្ឌរដ្ឋបាលព្រៃឈើ បានណែនាំដល់សមាជិកនៃបណ្តុំអាជីវកម្មចឹញ្ចឹមសត្វឃ្មុំត្រូវជួយមើលថែទាំអោយបានល្អ និងរកទីតាំងចំការឈើហូបផ្លែ ដែលមានផ្កាច្រើន ដើម្បីអោយឃ្មុំក្រេបឆាប់ទទួលបានទឹកច្រើន នៅពេលខាងមុខនេះឆាប់ៗ និងសំណូមពរអោយសមាជិកសហគមន៍ចូលរួមដោយភាពទទួលខុសត្រូវ និងឆន្ទៈខ្ពស់ ។ លោកបានរំពឹងទុកថា បណ្តុំអាជីវកម្មនឹងមានលទ្ធភាពប្រមូលទឹកឃ្មុំ ប្រមាណ ៥០០គីឡូក្រាម ទៅ ១០០០គីឡូក្រាម (ប្រមាណ៤០០លីត្រ-៧០០លីត្រ) ក្នុងរយៈពេលមួយឆ្នាំ ។
គួរបញ្ជាក់ផងដែរថា ៖ បណ្តុំអាជីវកម្មនេះត្រូវបានទទួលវគ្គបណ្តុះបណ្តាលពីបច្ចេកទេសនៃការចិញ្ចឹមសត្វឃ្មុំ មុននឹងទទួលបានទុនសហវិនិយោគ ជាធាតុចូលដូចជា (១). ពូជឃ្មុំចំនួន១៧ធុង (២).ឧបករណ៍សម្ភារៈចិញ្ចឹមឃ្មុំ ៖ អាវ២ មួក២ ធុងបាញ់ផ្សែង១ និងធុងវាយចម្រាញ់ទឹកឃ្មុំ១ផងដែរ ៕
ចែករំលែកព័តមាននេះ