ខេត្តប៉ៃលិន ៖ មានសេចក្តីរាយការណ៍ពីប្រជាពលរដ្ឋបានឱ្យដឹងកាលពីល្ងាចថ្ងៃទី២ធ្នូ២០១៥នេះថា ដើមឈើតូចធំជាច្រើននៅត្រង់ចំណុចភ្នំប៉ោត ក្នុងភូមិរថក្រោះឆេះ ឃុំស្ទឹងកាច់ ស្រុកសាលាក្រៅ ត្រូវជនខិលខូចមួយចំនួនឃុបឃិតគ្នាបន្តរុករានកាប់ដុតបំផ្លាញ រួចយកដីធ្វើជាកម្មសិទ្ធិផ្ទាល់ខ្លួន ដោយដាំដំណាំពោត និងដំឡូងមីយ៉ាងរំភើយ មិនគិតខ្វល់អំពីផលប៉ះពាល់ដល់បរិស្ថាន ហើយជាការបំផ្លិចបំផ្លាញធនធានធម្មជាតិដ៏សំខាន់សម្រាប់មនុស្ស សត្វ និងធ្វើឱ្យអាកាសធាតុគ្មានលំនឹង ពោលគឺមិនទៀងទាត់ ។
ពលរដ្ឋបន្តទៀតថា បើគេសង្កេតមើលមកភ្នំខាងខ្មែរភាគច្រើនឃើញមានសុទ្ធតែដុំថ្ម ដែលមានដំណាំពោត ដំឡូងមីប៉ុណ្ណោះ តែបើគេមើលទៅទិសខាងលិច ជាប់នឹងព្រំដែនកម្ពុជាថៃវិញ មានពោរពេញទៅដោយរុក្ខជាតិពណ៌ខៀវស្រងាត់បញ្ចេញសម្រស់គួរឱ្យចង់គយគន់ ដែលជាទីទាក់ទាញទឹកភ្លៀងធ្លាក់ស្រោចស្រពដំណាំរបស់គេតាមរដូវកាលផងដែរ ។ ចំណែកឯខាងយើងវិញរដូវវស្សាក៏ដូចជារដូវប្រាំងដែរ ស្ទើរតែគ្មានភ្លៀងធ្លាក់ ដើម្បីឱ្យដំណាំរស់នោះឡើយ ហើយអាកាសធាតុមានការប្រែប្រួលខុសប្រក្រតី ព្រោះតែដើមឈើក្នុងព្រៃត្រូវបានគេលួចកាប់បំផ្លាញ និងដើមឈើសេសសល់នៅលើភ្នំតិចតួចក៏នាំគ្នាឡើងទៅកាប់ ដើម្បីយកដីដាំដំណាំដែរ បើទោះបីជាអ្នកខ្លះមានដីរហូតដល់រាប់សិបហិកតាហើយ ក៏មិនទុកឱ្យធម្មជាតិទាំងនោះជួយផ្តល់លំនឹងអាកាសធាតុដែរ ពោលគឺកាប់ទាល់តែខ្ទេចខ្ទីរគ្មានសល់អ្វីនោះឡើយ ។
ម្យ៉ាងវិញទៀត បើសិនជាពលរដ្ឋខ្លួនឯង និងអាជ្ញាធរមូលដ្ឋាន មិនព្រមនាំគ្នាថែរក្សាព្រៃឈើឱ្យបានគង់វង់ទេ នៅថ្ងៃខាងមុខភ្នំទាំងអស់នៅក្នុងខេត្តប៉ៃលិននឹងក្លាយទៅជាដំបូកដុំថ្ម គ្មានដើមឈើសូម្បីតែ១ដើមនោះឡើយ ព្រោះគេមិនឃើញការពារនោះឡើយ ពូកែតែកាប់បំផ្លាញប៉ុណ្ណោះ ។
ពលរដ្ឋបញ្ជាក់ទៀតថា កាលពីដើមឈើនៅដុះទ្រុបទ្រុល គេសង្កេតឃើញមានភ្លៀងធ្លាក់ញឹកញាប់ធ្វើឱ្យដំណាំពោត ដំឡូងមី របស់ពួកគាត់ដុះលូតលាស់យ៉ាងល្អ ប៉ុន្តែដោយសារឥឡូវនេះក្លាយទៅជាវាលស្ទើរអស់រលីង ទើបម្នាក់ៗលំបាកក្នុងការពឹងទៅលើទឹកភ្លៀងសម្រាប់ដំណាំដាំដុះយ៉ាងខ្លាំង ដោយជួនកាលរាំងយូរពេក ហើយពេលខ្លះភ្លៀងញឹកញាប់ខ្លាំងពេក ព្រោះអាកាសធាតុលែងមានលំនឹងតទៅទៀតហើយ ។
ពាក់ព័ន្ធនឹងបញ្ហានេះ «កោះសន្តិភាព»បានទាក់ទងទៅលោក កឹម សុខា ប្រធានមន្ទីរបរិស្ថានខេត្តប៉ៃលិន ដើម្បីធ្វើការបំភ្លឺដែរ តែលោកបានឱ្យដឹងថា ព្រៃឈើនៅលើភ្នំនេះជាតួនាទីរបស់រដ្ឋបាលព្រៃឈើ ខាងលោកអត់ពាក់ព័ន្ធនោះឡើយ ។ ចំណែកលោក ជូ ចាន់ដារ៉ាឫទ្ធិ នាយខណ្ឌរដ្ឋពាលព្រៃឈើខេត្តប៉ៃលិន មិនអាចទាក់ទងដើម្បីបំភ្លឺបានឡើយ ព្រោះលោកបិទទូរស័ព្ទ ៕
ចែករំលែកព័តមាននេះ