ខេត្តកំពង់ឆ្នាំង៖ បន្ទាប់ពីផ្អាកដំណើរការ មិនឲ្យភ្ញៀវទេសចរ ចូលទៅទស្សនាលេងកម្សាន្តនៅរមណីយដ្ឋានទឹកធ្លាក់ស្រែអំពិល មួយរយៈ ដោយសារតែបញ្ហាកូវីដ គឺចាប់តាំងពីថ្ងៃអាទិត្យ ទី២៧ ខែមិថុនា ប្រធានសហគមន៍ទេសចរណ៍ទឹកធ្លាក់ស្រែអំពិល បានបញ្ជាក់ថា ទឹកធ្លាក់ស្រែអំពិល បើកឲ្យដំណើរការឡើងវិញហើយ និងបានអំពាវនាវឲ្យភ្ញៀវទេសចរ ទៅលេងកម្សាន្ត តែត្រូវអនុវត្តនូវវិធានការ ៣កុំ ៣ការពារ តាមការណែនាំរបស់សហគមន៍ទេសចរណ៍ផងដែរ។
លោក សោ ភា ប្រធានសហគមន៍ទេសចរណ៍ ទឹកធ្លាក់ស្រែអំពិល បានមានប្រសាសន៍ថា រមណីយដ្ឋានទឹកធ្លាក់ស្រែអំពិល ទើបបានបើកឲ្យដំណើរការឡើងវិញ ក្នុង ២សប្ដាហ៍កន្លងទៅនេះ បន្ទាប់បិទទ្វារមួយរយៈ ដោយសារកូវីត។ មុនឈានដល់ការបើកដំណើរការឡើងវិញនេះ សហគមន៍ទេសចរណ៍ទឹកធ្លាក់ស្រែអំពិល ក៏បានទទួលការណែនាំពីអាជ្ញាធរឃុំ.ស្រុកនិងខេត្ត ពិសេស ឯកឧត្តម ស៊ុន សុវណ្ណារិទ្ឋ អភិបាលរងខេត្ត ទទួលបន្ទុកទេសចរណ៍ បានណែនាំឱ្យរៀបចំទីតាំងទេសចរណ៍ឡើងវិញ ឲ្យមានសណ្ដាប់ធ្នាប់ ជាមួយគ្នានេះត្រូវ អនុវត្តតាមគោលការណ៍របស់ក្រសួងសុខាភិបាល ដោយត្រូវរៀបចំឱ្យមានកន្លែងត្រួតពិនិត្យ វាស់កំដៅ និងបាញ់អាកុល ព្រមទាំងរក្សាគម្លាត ជាដើម។ ភ្ញៀវទេសចរ ដែលបានមកលេងកំសាន្ត ត្រូវចូលទៅវាស់កំដៅ និងបាញ់អាល់កុល មុននឹងអនុញ្ញាត្តិឱ្យចូលលេងកំសាន្ត។ បើសិនឃើញភ្ញៀវ មានភាពមិនប្រក្រតី ដូចជាកំដៅឡើងក្តៅលើសពីធម្មតា ចាប់ពី៣៧អង្សារឡើងទៅ គឺមិនអនុញ្ញាតឱ្យចូលទេ ត្រូវឱ្យត្រឡប់ទៅក្រោយ ទៅមណ្ឌលសុខភាព ក្តុល ដើម្បីឱ្យគ្រូពេទ្យពិនិត្យ និងព្យាបាល។
ជាមួយគ្នានេះ ក្នុងនាមប្រធានសហគមន៍ទេសចរណ៍ទឹកធ្លាក់ស្រែអំពិល លោក ភា សូមអំពាវនាវដល់ប្រជាពលរដ្ឋ និងភ្ញៀវទេសចរទាំងអស់ សូមអញ្ជើញមកលេងកម្សាន្ត ដោយទំនុកចិត្ត ព្រោះថា សហគមន៍បានរៀបចំក្នុងការទប់ស្កាត់ការរីករាលដាលនៃជំងឺកូវីដ១៩ បានយ៉ាងត្រឹមត្រូវ។
គួរបញ្ជាក់ផងដែរថា សហគមន៍ទេសចរណ៍ទឹកធ្លាក់ស្រែអំពិល ត្រូវបានបង្កើតឡើង នៅឆ្នាំ២០១៦ ប៉ុន្តែទើបបានដំណើរការ នៅឆ្នាំ២០១៩ ដោយកិច្ចខិតខំប្រឹងប្រែងរបស់ឯកឧត្តម ស៊ុន សុវណ្ណារិទ្ធិ ដែលកាលណោះ ជាអភិបាលរងខេត្តកំពង់ឆ្នាំង ទទួលបន្ទុកទេសចរណ៍ តែពេលនេះ ឯកឧត្តម ស៊ុន សុវណ្ណារិទ្ធិ ត្រូវបានព្រះមហាក្សត្រ ត្រាស់បង្គាប់តែងតាំងជាអភិបាលខេត្តកំពង់ឆ្នាំង ព្រមទាំងអាជ្ញាធរ ស្រុកទឹកផុស និងឃុំក្តុលសែនជ័យ ផងដែរ។
បច្ចុប្បន្ន សហគមន៍ទេសចរណ៍ ស្រែអំពិល មានសមាជិកសរុបជាង ៤០០គ្រួសារ ក្នុងនោះ សមាជិកសកម្ម មានចំនួន ៣៣គ្រួសារ គ្រប់គ្រងលើទំហំផ្ទៃដី សរុប ៣៦០ហិកតា ដោយបានចងក្រង ជាសហគមន៍គ្រប់គ្រង និងអភិវឌ្ឍន៍តំបន់ទឹកធ្លាក់ ឱ្យស្របតាមស្តង់ដាររបស់ក្រសួងទេសចរណ៍ ដោយមានផ្លូវចូលថ្មីប្រវែង ៧គីឡូម៉ែត្រ ដោយរៀបចំទីកន្លែងលេងកំសាន្តឡើងវិញ មានខ្ចោះអង្គុយលំហែកាយ ចំនួន ៣៥ខ្ចោះ មានបន្ទប់ សម្រាប់ផ្លាស់ខោអាវ និងបង្គន់អនាម័យចំនួន២ ស្មើនឹង ១០បន្ទប់។
ជាមួយគ្នានេះ សហគមន៍ ក៏បានកំណត់តម្លៃសេវាចូលលេងកំសាន្ត និងម្ហូបអាហារឱ្យបានសមរម្យផងដែរ។ រមណីយដ្ឋានទឹកធ្លាក់ស្រែអំពិល ស្ថិតក្នុងភូមិក្តុល ឃុំក្តុលសែនជ័យ ស្រុកទឹកផុស មានចម្ងាយជាង ៦៨គីឡូម៉ែត្រ ពីទីរួមខេត្តកំពង់ឆ្នាំង៕ ពៅ សុខហ៊ាន
ចែករំលែកព័តមាននេះ