រាជធានីភ្នំពេញ ៖ បន្ទាប់ពីមានករណីប្លន់សម្លាប់នៅចំណុចគល់ស្ពានលីយ៉ុងផាត់ ត្រើយខាងកើតកាលពីថ្ងៃទី២៧ វិច្ឆិកា ២០១៥ បណ្ដាលឲ្យជនរងគ្រោះបាត់ខ្លួនរយៈពេល២ថ្ងៃទើបប្រទះឃើញសាកសពយ៉ាងអាណោចអាធ័មក្នុងប្រឡាយទឹក និងករណីប្រើកាំបិតប៉័ងតោកាប់ប្លន់ម៉ូតូក្នុងភូមិសាស្ត្រខណ្ឌដង្កោកាលពីថ្ងៃទី២៧ វិច្ឆិកា ២០១៥ដែរនោះ អាវុធហត្ថរាជធានីភ្នំពេញបានបើកយុទ្ធនាការស្រាវជ្រាវជាបន្ទាន់ រហូតឈានដល់ការឃាត់ខ្លួនជនសង្ស័យជាបន្តបន្ទាប់ រួមជាមួយចោរលួច ឆក់ យ៉ាងសកម្មក្នុងរាជធានីភ្នំពេញ២ក្រុមទៀតសរុប៧នាក់ ។
ជាក់ស្តែង នៅថ្ងៃទី២៨ វិច្ឆិកា ២០១៥ កម្លាំងអន្តរាគមន៍ និងកម្លាំងជំនាញមន្ទីរស្រាវជ្រាវយុត្តិធម៌ នៃកងរាជអាវុធហត្ថរាជធានីភ្នំពេញ សហការជាមួយសមត្ថកិច្ចមូលដ្ឋានអាវុធហត្ថខណ្ឌជ្រោយចង្វារបានធ្វើការឃាត់ខ្លួនជនសង្ស័យម្នាក់ក្នុងចំណោមបក្ខពួកចំនួន៧នាក់ពាក់ព័ន្ធករណីប្លន់សម្លាប់កាលពីថ្ងៃទី២៧ វិច្ឆិកា ២០១៥ ខណៈដែលជនរងគ្រោះ៤នាក់បានបើករថយន្តដឹកផ្លែឈើដល់ចំណុចគល់ស្ពានលីយ៉ុងផាត់ត្រើយខាងកើតក៏ឈប់ចុះបត់ជើង ពេលនោះក្រុមជនសង្ស័យមានគ្នា៧នាក់ដែលឈប់ចាំពួនស្ទាក់ប្លន់ដូចសព្វដង បានធ្វើសកម្មភាពប្រើដាវ កាំបិត ដុំថ្ម ភ្ជង់គំរាម និងដេញកាប់ជនរងគ្រោះប្លន់យកប្រាក់ ទូរស័ព្ទដៃទំនើប និងគ្រឿងអលង្ការមួយចំនួន រួចនាំគ្នារត់គេចខ្លួនបាត់តែម្តង ។
ក្នុងហេតុការណ៍នោះ ជនរងគ្រោះម្នាក់ក្នុងចំណោម៤នាក់បានបាត់ខ្លួនរយៈពេល២ថ្ងៃ ទើបប្រទះឃើញសាកសពយ៉ាងអាណោចអាធ័មក្នុងប្រឡាយទឹក ។
រីឯករណីប្រើកាំបិតប៉័ងតោកាប់ប្លន់ម៉ូតូកាលពីថ្ងៃទី២៧ វិច្ឆិកា ២០១៥ នៅចំណុចរបងផ្លូវចូលវត្តធុដុង្គ ចំការដូង ស្ថិតនៅភូមិសំបួរ សង្កាត់ដង្កោ ខណ្ឌដង្កោ ខណៈជនរងគ្រោះ២នាក់កំពុងអង្គុយជជែកគ្នាលេង ត្រូវអាវុធហត្ថខណ្ឌដង្កោ ធ្វើការឃាត់ខ្លួនបានជនសង្ស័យម្នាក់ក្នុងចំណោម២នាក់នៅថ្ងៃទី៣០ វិច្ឆិកា ២០១៥ ។
គួរបញ្ជាក់ផងដែរថា ជនសង្ស័យទាំង២ក្រុមខាងលើនេះតែងតែប្រើដាវ កាំបិត ដុំថ្ម ដេញកាប់ និងគប់អ្នកដំណើរប្លន់ជាច្រើនលើកច្រើនសារមកហើយ ។
ទន្ទឹមគ្នានោះដែរ នៅថ្ងៃទី៣០ វិច្ឆិកា ២០១៥ កម្លាំងល្បាតអាវុធហត្ថខណ្ឌដូនពេញ បានធ្វើការឃាត់ខ្លួនជនសង្ស័យចំនួន២នាក់នៅចំណុចផ្លូវលេខ១០៨ កែងផ្លូវលេខ៥១ សង្កាត់វត្តភ្នំ ពាក់ព័ន្ធនឹងបទល្មើសឆក់ទូរស័ព្ទដៃពីជនបរទេសនៅចំណុចផ្លូវលេខ៥៣ កែងផ្លូវលេខ១១៨ សង្កាត់ផ្សារថ្មី១ ខណ្ឌដូនពេញ ខណៈដែលជនបរទេសរូបនោះកំពុងតែឈប់ម៉ូតូដើម្បីមើល GPS រកទីកន្លែងដែលត្រូវធ្វើដំណើរ និងនៅថ្ងៃដដែលនោះអាវុធហត្ថខណ្ឌច្បារអំពៅ បានធ្វើការឃាត់ខ្លួនជនសង្ស័យចំនួន៣នាក់ផ្សេងទៀតដែលជាចោរលួចយ៉ាងសកម្មនៅចំណុចភូមិបឹងឈូក សង្កាត់និរោធ ខណ្ឌច្បារអំពៅ បន្ទាប់ពីក្រុមនេះបានលួចគាស់ផ្ទះប្រជាពលរដ្ឋកាលពីថ្ងៃទី២៧ វិច្ឆិកា ២០១៥ ក្នុងភូមិសាស្ត្រខណ្ឌច្បារអំពៅ ។
បច្ចុប្បន្ន ជនសង្ស័យទាំង៧នាក់ត្រូវបានកងរាជអាវុធហត្ថរាជធានីភ្នំពេញកសាងសំណុំរឿងបញ្ជូនទៅតុលាការដើម្បីចាត់ការតាមនិតិវិធីច្បាប់ រីឯបក្ខពួកដែលនៅសេសសល់ កម្លាំងអាវុធហត្ថរាជធានីភ្នំពេញកំពុងកំណត់មុខសញ្ញាតាមចាប់ជាបន្តបន្ទាប់បន្ថែមទៀត ៕
ចែករំលែកព័តមាននេះ