- ភ្នំពេញ
ភ្នំពេញ៖ ការទប់ស្កាត់កូវីដ នៅតាមព្រំដែន ត្រូវបានរឹតបន្តឹងជាថ្មី នៅពេលនេះ ដោយក្រសួងសុខាភិបាល សម្រេចកំណត់ឲ្យរាល់អ្នកធ្វើដំណើរឆ្លងព្រំដែនទាំងអស់ ពិសេសមកពីប្រទេសថៃ ត្រូវធ្វើចត្តាឡីស័ក ១៤ថ្ងៃ…
ភ្នំពេញ៖ ការទប់ស្កាត់កូវីដ នៅតាមព្រំដែន ត្រូវបានរឹតបន្តឹងជាថ្មី នៅពេលនេះ ដោយក្រសួងសុខាភិបាល សម្រេចកំណត់ឲ្យរាល់អ្នកធ្វើដំណើរឆ្លងព្រំដែនទាំងអស់ ពិសេសមកពីប្រទេសថៃ ត្រូវធ្វើចត្តាឡីស័ក ១៤ថ្ងៃ នៅខេត្តជាប់ព្រំដែននោះតែម្តង ដោយមិនអនុញ្ញាតឲ្យដឹកជញ្ជូន មកធ្វើចត្តាឡីស័កតាមភូមិឃុំ ដែលសាមីជននោះ រស់នៅទៀតឡើយ។
ការអនុវត្តដូច្នេះ បន្ទាប់ពីមួយរយៈចុងក្រោយនេះ មានពលករខ្មែរយើង កាន់តែច្រើនឡើងៗ ដែលបានឆ្លងដែន មកពីប្រទេសថៃ ត្រូវបានរកឃើញកើតជំងឺកូវីដ១៩ ប្រភេទបំប្លែងថ្មី Delta ក្នុងពេលធ្វើចត្តាឡីស័ក នៅតាមខេត្ត ជាស្រុកកំណើតរបស់ខ្លួន។
នោះគឺកាលពីថ្ងៃទី១៩ ខែមិថុនា ឆ្នាំ២០២១ ក្រសួងសុខាភិបាល បានប្រកាសពីការរកឃើញករណីឆ្លងវីរុសកូវីដ១៩ ដែលបំប្លែងថ្មី ប្រភេទ B.1.617-2 ( Delta ) ចំនួន ៧នាក់ ដែលជាអ្នកដំណើរវិលត្រឡប់មកពីប្រទេសថៃ នៅខេត្តបន្ទាយមានជ័យ ឧត្តរមានជ័យ ខេត្តសៀមរាប កំពង់ចាម និងខេត្តកំពត។ ថ្មីៗនេះទៀត អាជ្ញាធរខេត្តសៀមរាប ក៏បានប្រកាសពីការរកឃើញមេរោគកូវីដបំប្លែងថ្មី Delta លើពលករខ្មែរ មកពីថៃផងដែរ។
ដូច្នេះហើយ បានជាកាលពីយប់ថ្ងៃទី២៥ ខែមិថុនា ឆ្នាំ២០២១ រដ្ឋមន្ត្រីក្រសួងសុខាភិបាល និងជាប្រធានគណៈកម្មការអន្តរក្រសួង ដើម្បីប្រយុទ្ធនឹងជំងឺកូវីដ១៩ លោក ម៉ម ប៊ុនហេង បានចេញលិខិត ជាការប្រញាប់ ជូនអភិបាលរាជធានីខេត្ត និងជាប្រធានគណៈកម្មការប្រយុទ្ធនឹងជំងឺកូវីដ១៩ ថ្នាក់រាជធានីខេត្ត។ ក្នុងលិខិត លោករដ្ឋមន្ត្រី ម៉ម ប៊ុនហេង បានជម្រាបជូនអភិបាលរាជធានីខេត្ត ពីការពង្រឹងវិធានការចត្តាឡីស័ក នៅតាមបណ្តាច្រកព្រំដែននានា និងការពង្រឹងវិធានការរដ្ឋបាលចាំបាច់នានា ដើម្បីប្រយុទ្ធទប់ស្កាត់ការរីករាលដាលជំងឺកូវីដ១៩ បំប្លែងខ្លួនថ្មី ប្រភេទ Delta ក្នុងសហគមន៍។ នោះគឺអ្នកដំណើរទាំងអស់ ពិសេសពលករមកពីប្រទេសថៃ ត្រូវធ្វើចត្តាឡីស័ក នៅតាមព្រំដែន ចាប់ពីថ្ងៃទី២៦មិថុនាតទៅ។
ក្នុងលិខិត លោករដ្ឋមន្ត្រី ម៉ម ប៊ុនហេង លើកឡើងថា ដោយផ្អែកតាមសភាពការណ៍នៃការរីករាលដាលជំងឺកូវីដ១៩ បំប្លែងខ្លួនថ្មីប្រភេទ Delta មានវត្តមាននៅកម្ពុជា តាមរយៈការនាំចូលពីតាមបណ្តាច្រកព្រំដែននានា និងដើម្បីបង្ការទប់ស្កាត់ការរីករាលដាលជំងឺកូវីដ១៩ បំប្លែងខ្លួនថ្មីប្រភេទ Delta នេះ ចូលក្នុងសហគមន៍ គណៈកម្មការអន្តរក្រសួងប្រយុទ្ធនឹងជំងឺកូវីដ១៩ សូមធ្វើការណែនាំ ៣ចំណុច រួមមាន៖ ១-អនុវត្តវិធានការធ្វើចត្តាឡីស័ក នៅមណ្ឌលធ្វើចត្តាឡីស័កមាត់ច្រកព្រំដែន ចំពោះអ្នកដំណើរទាំងអស់ ដែលធ្វើដំណើរឆ្លងចូលមកក្នុងប្រទេសកម្ពុជា ដោយមិនធ្វើការដឹកជញ្ជូនបន្ត ដើម្បីយកទៅធ្វើចត្តាឡីស័ក នៅតាមភូមិឃុំទៀតទេ។ គណៈកម្មការប្រយុទ្ធនឹងជំងឺកូវីដ១៩ ថ្នាក់រាជធានីខេត្ត ត្រូវសហការជាមួយអនុគណៈកម្មការគ្រប់គ្រងច្រកទ្វារចេញចូល និងការធ្វើចត្តាឡីស័ក ដើម្បីកំណត់ទីតាំងមណ្ឌលចត្តាឡីស័ក ដែលនៅជិតបំផុត សម្រាប់ការធ្វើចត្តាឡីស័កនេះ។ ទន្ទឹមនឹងនេះ អាជ្ញាធរមានសមត្ថកិច្ចទាំងអស់ ត្រូវបង្កើនការយកចិត្តទុកដាក់បន្ថែមទៀត ក្នុងការពង្រឹងវិធានការចត្តាឡីស័កនេះ នៅតាមមណ្ឌលឲ្យានម៉ឺងម៉ាត់ ស្របតាមគោលការណ៍ណែនាំផ្នែកសុខាភិបាល។
២-បង្កើនការពង្រឹងការគ្រប់គ្រងច្រកព្រំដែន ជាពិសេសច្រករបៀង ចៀសវាងការជ្រៀតឆ្លងព្រំដែនចូលមកក្នុងប្រទេសកម្ពុជាដោយខុសច្បាប់ ដែលបង្កហានិភ័យក្នុងការចម្លងមេរោគបំប្លែងខ្លួនថ្មី ចូលក្នុងសហគមន៍។ គណៈកម្មការប្រយុទ្ធនឹងជំងឺកូវីដ១៩ ថ្នាក់រាជធានីខេត្ត ត្រូវចាត់វិធានការពង្រឹងការគ្រប់គ្រងប្រជាពលរដ្ឋ ធ្វើដំណាកស្រុក ដែលវិលត្រឡប់មកភូមិឃុំវិញ និងត្រូវអនុវត្តវិធានការចត្តាឡីស័ក នៅមណ្ឌលចត្តាឡីស័កឲ្យបានម៉ឺងម៉ាត់ ក្នុងករណី ដែលរកឃើញថា ប្រជាពលរដ្ឋទាំងនោះ ពុំបានឆ្លងកាត់ការធ្វើចត្តាឡីស័កនៅតាមព្រំដែន។
៣-ពង្រឹងការអនុវត្តវិធានការ ទាំងផ្នែករដ្ឋបាល ទាំងផ្នែកសុខាភិបាល សំដៅបង្ការ គ្រប់គ្រង និងកាត់ផ្តាច់នូវខ្សែរយៈចម្លងនៃមេរោគកូវីដ១៩ ប្រភេទថ្មីនេះ នៅតាមមូលដ្ឋាន ដែលត្រូវបានរកឃើញអ្នក ដែលបានឆ្លងជំងឺនេះ។
គេនៅចាំបានថា អំឡុងពេលប្រទេសថៃ ផ្ទុះការឆ្លងកូវីដក្នុងសហគមន៍ជាថ្មីទៀត កាលពីថ្ងៃទី២០ ខែធ្នូ ឆ្នាំ២០២០ រាជរដ្ឋាភិបាលកម្ពុជា បានដាក់ចេញនូវវិធានការរឹតបន្តឹងតាមព្រំដែន ដោយត្រូវពិនិត្យសុខភាព ធ្វើតេស្តរកកូវីដ និងធ្វើចត្តាឡីស័ក លើអ្នកដំណើរទាំងអស់នៅតាមព្រំដែន ពិសេសពលករខ្មែរយើង ដែលវិលត្រឡប់មកពីប្រទេសថៃ។ ការធ្វើចត្តាឡីស័ក លើអ្នកដំណើរឆ្លងដែន ត្រូវបានធ្វើឡើង នៅតាមខេត្តជាប់ព្រំដែនទាំងនោះតែម្តង។
ប៉ុន្មានខែក្រោយមក អំឡុងខែមីនា ឆ្នាំ២០២១ ដោយសារតែបន្ទុករបស់ខេត្តនិមួយៗ ជាប់ព្រំដែនថៃ ច្រើនពេកលើក្រុមអ្នកធ្វើចត្តាឡីស័ក ទើបមានគោលការណ៍ជាថ្មី ឲ្យអ្នកដែលពិនិត្យធ្វើតេស្ត ពេលឆ្លងព្រំដែន មិនមានកូវីដទេ គឺត្រូវបានអាជ្ញាធរខេត្តសាមីនិមួយៗ រៀបចំដឹកជញ្ជូនតាមរថយន្តយោធា យកអ្នកទាំងនោះ ទៅធ្វើចត្តាឡីស័ក នៅតាមភូមិឃុំ ស្រុក ឬខេត្ត ដែលសាម៉ីជនទាំងនោះ រស់នៅ។
យ៉ាងណាក៏ដោយ វិធានការរឹតបន្តឹងកូវីដឆ្លងដែនពេលនេះ បានធ្វើឡើង ស្របពេលដែលផ្ទៃក្នុងប្រទេសយើង បន្តឆ្លងរាលដាលជំងឺកូវីដ១៩ ជាបន្តបន្ទាប់ រៀងរាល់ថ្ងៃ មិនថា នៅភ្នំពេញ និងនៅតាមបណ្តាខេត្តនានា នៅទូទាំងប្រទេសនោះទេ។ មេរោគបំប្លែងថ្មី ប្រភេទ Delta ដ៏កាចសាហាវ ដែលមានប្រភពមកពីប្រទេសថៃ ក៏ត្រូវបានរកឃើញថែមទៀត លើពលករខ្មែរ មកពីប្រទេសថៃ ហើយធ្វើចត្តាឡីស័ក នៅតាមខេត្ត ដែលជនទាំងនោះ រស់នៅ។
ដូច្នេះការប្តូរគោលនយោបាយធ្វើចត្តាឡីស័ក ដោយឲ្យអ្នកដំណើរទាំងអស់ ធ្វើចត្តាឡីស័ក ១៤ថ្ងៃ នៅតាមខេត្តជាប់ព្រំដែនថៃ ត្រូវគេមើលឃើញថា កម្ពុជានឹងអនុវត្តបានដោយងាយ ហើយជោគជ័យបន្តទៀត លើការទប់ស្កាត់ មិនឲ្យមេរោគកូវីដឆ្លងដែន រីកសាយភាយ តាមរយៈការដឹកជញ្ជូនមនុស្សពីព្រំដែន ចូលដល់ផ្ទៃក្នុងប្រទេស ក្នុងពេលនៅផ្ទៃក្នុងសព្វថ្ងៃ ក៏ឆ្លងរាតត្បាតខ្លាំង ហើយខ្លះ រកប្រភពមិនដឹងថា ឆ្លងមកពីណាថែមទៀត។
ដើម្បីសម្រាលបន្ទុកចំណាយលើក្រុមពលករខ្មែរ និងអ្នកដំណើរមកពីថៃ ដែលត្រូវធ្វើចត្តាឡីស័ក នៅតាមខេត្តជាប់ព្រំដែនថៃ គឺសាមីខេត្ត ដែលពលករ ឬអ្នកដំណើរទាំងនោះ រស់នៅ ត្រូវតែទទួលខុសត្រូវរៀងៗខ្លួន ព្រោះថា កន្លងមក និងមកដល់សព្វថ្ងៃ រាជរដ្ឋាភិបាល បានទម្លាក់ថវិការាប់រយលានរៀល ដល់បណ្តាខេត្តទាំងអស់ សម្រាប់ចំណាយលើការធ្វើចត្តាឡីស័កនេះឯង។
តាមខេត្តជាប់ព្រំដែនថៃ ត្រូវបង្កើន និងបែងចែកកន្លែងចត្តាឡីស័ក សម្រាប់ខេត្តរាជធានីទាំង ២៥ នៅតាមមណ្ឌលចត្តាឡីស័ក ដែលខេត្តជាប់ព្រំដែនថៃ បានរៀបចំ។ ឧទាហរណ៍ថា នៅមណ្ឌលចត្តាឡីស័កមួយ ដែលយកសាលារៀន ធ្វើជាកន្លែងចត្តាឡីស័ក គឺចែកអគារ ឬចែកបន្ទប់សាលារៀននោះ សម្រាប់ខេត្តរាជធានីទាំង ២៥ ហើយបែងចែកអ្នកធ្វើចត្តាឡីស័ក តាមខេត្តនិមួយៗ។ ខេត្តនិមួយៗ សហការជាមួយខេត្តជាប់ព្រំដែន រ៉ាប់រងលើការចំណាយប្រចាំថ្ងៃ ថ្លៃម្ហូបអាហារ អំណោយ ឬក៏ថ្នាំពេទ្យ ជាដើម នៅក្នុងអំឡុងពេលធ្វើចត្តាឡីស័ក ១៤ថ្ងៃ។ លុះពេលចប់ចត្តាឡីស័កហើយ ខេត្តនិមួយៗ រៀបចំដឹកជញ្ជូនពួកគាត់ ទៅកាន់លំនៅដ្ឋាន ដូចបានអនុវត្តកន្លងមក។
ដូច្នេះខេត្តនិមួយៗ នៅតែមានភារកិច្ច និងការទទួលខុសត្រូវលើអ្នកដំណើរ ដែលត្រូវធ្វើចត្តាឡីស័កដដែល។ គ្រាន់តែចាប់ពីពេលនេះតទៅ ត្រូវបែងចែកមន្ត្រីទទួលបន្ទុក ទៅប្រចាំការនៅតាមខេត្តជាប់ព្រំដែន ពិសេសនៅជាប់ប្រទេសថៃ និងខេត្ត ដែលមានអ្នកឆ្លងដែនច្រើន ហើយសហការជាមួយខេត្តជាប់ព្រំដែន រៀបចំចាត់ចែងការធ្វើចត្តាឡីស័កដូចពេលកន្លងមកឡើងវិញ។
សម្រាប់អ្នកដំណើរ ឆ្លងដែន ដែលត្រូវបានពិនិត្យរកឃើញកូវីដ នៅពេលមកដល់មាតុប្រទេស គឺនៅតែត្រូវបាននាំទៅសម្រាកព្យាបាល តាមមន្ទីរពេទ្យខេត្តជាប់ព្រំដែនទាំងនោះ ដូចអ្វីដែលបានអនុវត្តកន្លងមកដដែល។
សរុបមក ការរៀបចំធ្វើចត្តាឡីស័កលើអ្នកដំណើរទាំងអស់ នៅតាមខេត្តព្រំដែន ជាការងារដែលអាជ្ញាធរខេត្តជាប់ព្រំដែន និងបណ្តាខេត្តរាជធានី ដែលអ្នកឆ្លងដែនរស់នៅ បានអនុវត្តដោយជោគជ័យរួចហើយកន្លងមក។ អ្វីដែលគេនៅតែបារម្ភ ហើយត្រូវតែខិតខំទប់ស្កាត់នោះ គឺការលួចឆ្លងដែនខុសច្បាប់ គេចពីការធ្វើចត្តាឡីស័ក។
ប៉ុន្តែបុគ្គល ដែលគេចវេះ មិនឆ្លងដែនតាមច្រកព្រំដែនស្របច្បាប់ ចាប់ពីពេលនេះតទៅ គួរតែត្រូវមានទោស។ ពោលគឺមានទោសទាំងអ្នកលួចឆ្លងដែន និងទាំងមេខ្យល់ ដែលកន្លងមក យើងដាក់ទោសតែលើមេខ្យល់ប៉ុណ្ណោះ។
កន្លងមក ពេលលួចឆ្លងដោយខុសច្បាប់ចេញពីថៃ បើសិនជាកងកម្លាំងសមត្ថកិច្ចយើង ចាប់បាននៅព្រំដែន គឺទាំងមេខ្យល់ និងទាំងអ្នកលួចឆ្លងដែន ត្រូវនាំទៅធ្វើតេស្ត និងធ្វើចត្តាឡីស័ក ហើយមេខ្យល់ ត្រូវបានបញ្ជូនទៅតុលាការ កាត់ទោស។ រីឯអ្នកលួចឆ្លងដែន ត្រូវបញ្ជូនទៅធ្វើចត្តាឡីស័ក។ តែចាប់ពីពេលនេះតទៅ គួរតែអនុវត្តនូវការផ្តន្ទាទោសទាំងលើអ្នកលួចឆ្លងដែនដែរ ព្រោះច្បាប់បានកំណត់រួចហើយថា អ្នកគេចវេះមិនធ្វើចត្តាឡីស័ក ត្រូវមានទោស ដោយការផាកពិន័យជាប្រាក់ផង ហើយបើសិនជារកឃើញថា កើតកូវីដ គឺត្រូវផ្តន្ទាទោសដាក់ពន្ធនាគារ នៅពេលព្យាបាលកូវីដជាសះស្បើយ។
កន្លងមក ករណីគេចវេះ មិនធ្វើចត្តាឡីស័កនេះ ក៏ត្រូវបានអនុវត្តរួចមកហើយ លើអ្នកជំងឺកូវីដ១៩ នៅភ្នំពេញ។ នោះគឺក្រោយព្យាបាលជាសះស្បើយកូវីដហើយ ត្រូវបាននាំទៅដាក់ពន្ធនាគារ ចំពោះទង្វើគេចវេះ មិនធ្វើចត្តាឡីស័កនេះឯង៕
ចែករំលែកព័តមាននេះ