ខេត្តក្រចេះ ៖ លោក វ៉ា ថន អភិបាលខេត្តក្រចេះ រួមទាំងក្រុមការងារ កាលពីរសៀលថ្ងៃទី២៦ ខែមិថុនា ឆ្នាំ២០២១នេះ បានចុះពិនិត្យ និងបិទទីតាំងភោជនីយដ្ឋាន និងអាហារដ្ឋានជាច្រើនកន្លែងនៅក្នុងទីរួមខេត្តក្រចេះ ក្រោយផ្ទុះករណីឆ្លងកូវីដ-១៩ថ្មី ដែលមានអ្នកឆ្លងប្រមាណជាង២៧នាក់។
ជាក់ស្ដែង នៅថ្ងៃទី២៦ ខែមិថុនានេះ អាជ្ញាធរខេត្តក្រចេះ បានរកឃើញអ្នកវិជ្ជមានជំងឺកូវីដ-១៩ថ្មីបន្ថែមទៀត សរុប២៧នាក់ ក្នុងនោះស្រី២០នាក់ ជាបុគ្គលិកបម្រើការងារ នៅក្នុងភោជនីយដ្ឋានកំសាន្ត យីហោ «ដាយ៍មិន KTV» និង «ដាយ៍មិនរើវើផាប់» រួមទាំងប្រជាពលរដ្ឋ និងមន្ត្រីរាជការ មានទីតាំងនៅកណ្តាលក្រុងក្រចេះផងដែរ។
ឆ្លើយតបភ្លាមៗ បន្ទាប់ពីរកឃើញករណីឆ្លងកូវីដ-១៩ថ្មីនេះ អាជ្ញាធរខេត្ត បានសម្រេចបិទជាបណ្ដោះអាសន្ន ទីតាំងភោជនីយដ្ឋានកំសាន្តខាងលើ រួមទាំងហាងអាហារដ្ឋាន និងតូបលក់ដូរឥវ៉ាន់ជាច្រើនកន្លែង ដែលស្ថិតនៅតាមបណ្តោយផ្លូវព្រះសុរារឹទ្ធ ចាប់ពីផ្លូវកែងមន្ទីរសុខាភិបាលខេត្តក្រចេះ (ផ្លូវមាត់ទន្លេ) រហូតដល់ផ្លូវជាតិលេខ៧៣ ត្រង់ចំណុច «ដាយ៍មិន KTV» ស្ថិតក្នុងសង្កាត់ក្រចេះ ក្រុងក្រចេះ ខេត្តក្រចេះ។
នៅខណៈវេលាដែលលោក វ៉ា ថន ចុះពិនិត្យទីតាំងផ្ទាល់ ហើយលោកក៏បានជួបសំណេះសំណាលជាមួយបងប្អូនអាជីវករលក់ដូរនៅតាមតូប ហាង និងភោជនីយដ្ឋានទាំងនោះ និងបានពន្យល់អប់រំណែនាំដល់ពួកគាត់អោយយល់អំពីបញ្ហានៃជំងឺកូវីដ-១៩ និងចូលរួមអនុវត្តនូវវិធានការ «៣កុំ និង៣ការពារ» អោយបានម៉ឺងម៉ាត់ទាំងអស់គ្នា ដើម្បីខ្លួនឯង គ្រួសារ និងសហគមន៍។
លោក វ៉ា ថន បានបញ្ជាក់ថា ក្រុមការងារបានទទួលដឹងករណីឆ្លងកូវីដ-១៩ថ្មីនេះ តាំងពីល្ងាចថ្ងៃទី២៥ និងបានបិទទីតាំងនេះបណ្ដោះអាសន្ន ដោយក្រុមការងារបានស្រាវជ្រាវ អ្នកពាក់ព័ន្ធយកមកធ្វើតេស្ដរហ័សរកឃើញមានអ្នកវិជ្ជមានកូវីដ-១៩ សរុបចំនួន២៧នាក់ ក្នុងនោះស្រី២០នាក់ ជាបុគ្គលិក មន្ត្រីរាជការ និងប្រជាពលរដ្ឋផងដែរ ។
ដោយឡែក សម្រាប់ខេត្តក្រចេះ គិតចាប់ពីព្រឹត្តការណ៍ ២០កុម្ភៈ រហូតដល់មកត្រឹមថ្ងៃទី២៦ មិថុនានេះ ករណីរកឃើញអ្នកវិជ្ជមានជំងឺកូវីដ-១៩ សរុបមានចំនួន ៥២នាក់/ករណី ក្នុងនោះបានជាសះស្បើយ សរុប ១៣នាក់/ករណី ស្លា.ប់ម្នាក់ និងកំពុងសម្រាកព្យាបាលចំនួន ៣៨នាក់/ករណី ក្នុងនោះដែរសម្រាប់មន្ទីរពេទ្យបង្អែក ខេត្តក្រចេះមានចំនួនច្រើនជាងគេផងដែរ ។
ជាមួយគ្នានោះ ឯកឧត្តមក៏បានអំពាវនាវសូមអោយបងប្អូនប្រជាពលរដ្ឋចូលរួមការពារ និងមានការប្រុងប្រយ័ត្នខ្ពស់ក្នុងក្រុមគ្រួសារមួយៗ ពិសេសអុវត្តតាមវិធានការ «៣ការពារ ៣កុំ» ជាថ្មីម្ដងទៀត មន្ត្រីរាជការ បងប្អូនទាំងអស់អោយយល់ស្មារតីជាតិនិយមន័យមួយថា បើយើងអាចទ្រាំបាន ត្រូវអត់ធ្មត់ទាំងគ្នា មិនលើសពី៣សប្ដាហ៍ ទៅ១ខែ អ្នកផ្ទុកកូវីដ-១៩ ទាំងអស់នឹងចេញជំងឺអស់ហើយ យើងនឹងដឹងថា អ្នកណាកើត អ្នកណាមិនកើត ពេលនោះយើងអាចទប់ស្កាត់បាន៕
ចែករំលែកព័តមាននេះ