រាជធានីភ្នំពេញ ៖ មន្ត្រីជាន់ខ្ពស់ក្រសួងសេដ្ឋកិច្ច និងហិរញ្ញវត្ថុ បានអះអាងថា ទោះកូវីដ-១៩ ក៏សេដ្ឋកិច្ចកម្ពុជារឹងមាំដដែល ក្នុងរយៈពេល៥ខែ ខណៈសង្ឃឹមថា កំណើនសេដ្ឋកិច្ច៤% នៅតែសម្រេចបាន។
លោក វង្ស៉ី វិស្សុត រដ្ឋលេខាធិការប្រចាំការ ក្រសួងសេដ្ឋកិច្ច និងហិរញ្ញវត្ថុ បានអះអាងថា ក្នុងរយៈពេល៥ខែ ឆ្នាំ២០២១ សេដ្ឋកិច្ចកម្ពុជាប៉ះពាល់ដោយព្រឹត្តិការណ៍២០កុម្ភៈ ក៏នៅតែរឹងមាំដដែល ហើយលោកសង្ឃឹមថា សេដ្ឋកិច្ចកម្ពុជាកើន៤% ឆ្នាំ២០២១នោះ នៅតែសម្រេចបានដដែល។
លោករដ្ឋលេខាធិការបានថ្លែងប្រាប់ក្រុមអ្នកសារព័ត៌មាន ក្នុងពិធីទទួលវ៉ាក់សាំងប្រឆាំងកូវីដ-១៩ ចំនួន១លានដូស ដែលរាជរដ្ឋាភិបាលកម្ពុជាបញ្ជាទិញពីចិន នាថ្ងៃទី២៦ ខែមិថុនា ឆ្នាំ២០២១ ថា ក្នុងស្ថានភាពជំងឺកូវីដ-១៩ នាពេលបច្ចុប្បន្ននេះ សេដ្ឋកិច្ចរបស់កម្ពុជា អាចទប់ទល់បាន ប៉ុន្ដែមិនល្អដូចតាមការរំពឹងទុកទាំងស្រុងឡើយ។
លោកបានគូសបញ្ជាក់ថា៖ «ក្នុងរយៈពេល៥ខែឆ្នាំនេះ ឆ្លុះកញ្ចាំងថា សេដ្ឋកិច្ចកម្ពុជា ទោះបីជារងផលប៉ះពាល់ពីការផ្ទុះ ព្រឹត្តិការណ៍២០កុម្ភៈ ក៏ដោយ ពីការបិទខ្ទប់ក៏ដោយ ប៉ុន្ដែនៅតែមានសមត្ថភាពមួយរស់បាន។ ការនាំចេញ៥ខែនេះ បានឆ្លុះបញ្ចាំងថា កម្ពុជានៅរឹងមាំត្រង់ថា ទំនិញដែលយើងនាំចេញទៅក្រៅនៅកើន១៧% ក្នុងទំហំទឹកប្រាក់ ៣ ទៅ៤ពាន់លានដុល្លារ បើយើងនិយាយកំណើនវិញ អត់ធ្លាក់ទេ»។
លោកបន្ដថា ការនាំចេញ ខាវ អាវ ទៅក្រៅប្រទេស ស្នើនឹងប្រហែលឆ្នាំ២០២០ ហើយទំនិញមិនមែន ខាវ អាវ កើន៥២% ក្នុងបរិក្ខារកូវីដ-១៩នេះ។ លោកថា ក្នុងនោះ កម្ពុជាក៏បានជួបបញ្ហាមួយចំនួន ដូចជាវិស័យទេសចរណ៍ ជាដើម។
លោកបញ្ជាក់បន្ថែមថា «ក្នុងរយៈពេល៥ខែនេះ យើងបង្ហាញថា ទប់ទល់បាន មិនធ្លាក់ខ្លាំងពេកទេ ប៉ុន្ដែបើធៀបអ្វីដែលយើងគ្រោងទុកពីដើមឆ្នាំមក ៤% នេះមានការប៉ះពាល់ហើយ ប៉ុន្ដែការប៉ះពាល់នេះ យើងត្រូវរង់ចាំដល់ចុងឆ្នាំទៀត បើសិនជាងើបបានជាសេដ្ឋកិច្ច ក្នុងអំឡុងខែ៩ ឬខែ១០វិញ ដូច្នេះ យើងនៅតែមានសង្ឃឹមថា ៤%នេះ ឆ្នាំនេះ នៅតែសម្រេចបាន ប៉ុន្ដែអាស្រ័យនៃការផ្ទុះរបស់យើង នៅរយៈពេលប៉ុន្មាន បើផ្ទុះរហូតរបៀបនេះពិបាក»។
ជាងនេះទៅទៀត រដ្ឋលេខាធិការប្រចាំការ ក្រសួងសេដ្ឋកិច្ច ក៏បានលើកឡើងទៀតថា កម្ពុជានៅតែចាត់ទុកប្រទេសចិន ជាប្រភពសំខាន់ដ៏សំខាន់សម្រាប់កម្ពុជា ក្នុងការរុញកំណើនសេដ្ឋកិច្ចជាតិរបស់កម្ពុជា តាមរយៈ ពាណិជ្ជកម្ម ទេសចរណ៍ និងកិច្ចសហការផ្សេងៗទៀត ជាដើម៕
ចែករំលែកព័តមាននេះ