អ្នកកាសែតអីុតាលី កាន់តែក្លាយជាមុខសញ្ញាត្រូវគំរាមយកជីវិត ច្រើនឡើងៗ ពីពួកម៉ាហ្វ៊ីយ៉ា ដោយសារអត្ថបទសរសេរហែកកកាយឧក្រិដ្ឋកម្មរបស់ពួកគេ ។ របាយការណ៍ ថ្មីៗនេះរបស់គណៈកម្មការប្រឆាំងម៉ាហ្វ៊ីយ៉ារបស់សភាអីុតាលី បានឱ្យដឹងថា ជាមធ្យមក្នុងរយៈពេល២ថ្ងៃ…
អ្នកកាសែតអីុតាលី កាន់តែក្លាយជាមុខសញ្ញាត្រូវគំរាមយកជីវិត ច្រើនឡើងៗ ពីពួកម៉ាហ្វ៊ីយ៉ា ដោយសារអត្ថបទសរសេរហែកកកាយឧក្រិដ្ឋកម្មរបស់ពួកគេ ។ របាយការណ៍ ថ្មីៗនេះរបស់គណៈកម្មការប្រឆាំងម៉ាហ្វ៊ីយ៉ារបស់សភាអីុតាលី បានឱ្យដឹងថា ជាមធ្យមក្នុងរយៈពេល២ថ្ងៃ មាន៣ករណីគំរាមសម្លាប់អ្នកកាសែត ។
ចុងឆ្នាំ២០១៤ អ្នកកាសែតអីុតាលីម្នាក់ឈ្មោះ Roberto Saviano បានសរសេរសៀវភៅមានចំណងជើង Gomorrah ពណ៌នាលម្អិតពីការប្រយុទ្ធបង្ហូរឈាមគ្នាយ៉ាងកោលាហលរបស់ពួកម៉ាហ្វ៊ីយ៉ាសាហាវឃោរឃៅពីក្រុមនៅក្រុង Naples ។ សៀវភៅនោះចេញលក់ភ្លាមក្លាយជាសៀវភៅលក់ដាច់បំផុតនៅអីុតាលី ។ ប៉ុន្តែតម្លៃនៃភាពល្បីល្បាញដែល Roberto Saviano ត្រូវសងវិញ មានទំហំធំសម្បើម គឺត្រូវពួកម៉ាហ្វ៊ីយ៉ាកាត់ទោសប្រហារជីវិតឱ្យបានដាច់ខាត ធ្វើឱ្យអ្នកកាសែតរូបនេះត្រូវពឹងប៉ូលិសជួយការពារខ្លួន បន្ទាប់ពីរកជួលផ្ទះដើម្បីប្តូរទីលំនៅអត់បាន ។ Roberto Saviano ត្រូវបង្ខំចិត្តជ្រកតាមស្ថានីយប៉ូលិស អស់ពីស្ថានីយមួយដល់ស្ថានីយមួយ ។ មុនពេលចូលជ្រកនៅតាមស្ថានីយប៉ូលិស រូបគេសាកល្បងដោះស្រាយដោយខ្លួនឯង គឺជួលផ្ទះគេនៅឆ្ងាយពីផ្ទះឪពុកម្តាយ ប៉ុន្តែគ្រប់ម្ចាស់ផ្ទះជួលដែលដឹងរឿង អត់អ្នកណាហ៊ានជួលឱ្យសោះ ព្រោះខ្លាចគ្រោះថ្នាក់ដល់ខ្លួនឯង ។ វៀរលែងតែម្ចាស់ផ្ទះណាអត់ទាន់ដឹងរឿងទើបព្រមជួលឱ្យ លុះជួលបានមួយថ្ងៃ ឬពីរថ្ងៃដឹងរឿងនេះតាមក្រោយក៏ប្រញាប់ប្រញាល់អង្វរ Roberto Saviano ឱ្យចេញទៅវិញឱ្យឆាប់ គឺកាន់តែឆាប់កាន់តែល្អ ។
ចំពោះ Roberto Saviano ទោះបីធ្លាក់ខ្លួនក្នុងស្ថានភាពស្ទើរអស់ផ្លូវដើរដូច្នេះក្តី គេនៅតែប្តេជ្ញាចិត្តប្រឆាំងពួកម៉ាហ្វ៊ីយ៉ាដល់ទីបញ្ចប់ អត់រាថយដាច់ខាត ។ គេចេញផ្សាយសៀវភៅទីពីរទៀត មានចំណងជើង «ផ្ទុយពីការស្លាប់ រូបភាពជីវិតនៅក្រុង Naples» ជាសៀវភៅពណ៌នាពីជនរងគ្រោះដោយសារឧក្រិដ្ឋកម្មរបស់ពួកម៉ាហ្វ៊ីយ៉ានៅក្រុង Naples ។ មិនតែប៉ុណ្ណោះ រូបគេសន្យាជាមួយអ្នកអានរបស់ខ្លួនថា នឹងចេញផ្សាយសៀវភៅទីបីទៀត ជាសៀវភៅបកអាក្រាតការសហការគ្នារវាងម៉ាហ្វ៊ីយ៉ាម៉ិចស៊ិក និងម៉ាហ្វ៊ីយ៉ាអីុតាលី ។ កាសែត Guardian បានឱ្យដឹងថា សព្វថ្ងៃអ្នកកាសែតអីុតាលីប្រហែល២០នាក់ កំពុងស្ថិតក្រោមការការពារពីកម្លាំងប៉ូលិស, បើគ្មានប៉ូលិសជួយការពារទេ អ្នកកាសែតទាំងនោះមុខជាអស់ជីវិតដោយសារការសងសឹករបស់ពួកម៉ាហ្វ៊ីយ៉ា ។
របាយការណ៍របស់គណៈកម្មការប្រឆាំងម៉ាហ្វ៊ីយ៉ារបស់សភាអីុតាលី បានលើកឡើងថា ចាប់តាំងពីឆ្នាំ២០០៦រហូតដល់សព្វថ្ងៃមាន ២.០៦០ករណី ពួកម៉ាហ្វ៊ីយ៉ាគំរាមសម្លាប់អ្នកកាសែត ។ ធ្ងន់ជាងគេគឺ១០ខែដំបូងនៃឆ្នាំ២០១៤ ដោយរយៈពេលនោះមាន៤២១ករណីគំរាមសម្លាប់អ្នកកាសែត, គិតជាមធ្យម២ថ្ងៃមាន៣ករណីគំរាមសម្លាប់ ។ គេដឹងថា ការគំរាមសម្លាប់អ្នកកាសែតមានច្រើនរូបភាព មានតាំងពីហៅទូរស័ព្ទលាក់ឈ្មោះគំរាមសម្លាប់ ចំៗឬគំរាមសម្លាប់គ្រួសារ, ដុតរថយន្តអ្នកកាសែត, វាយប្រហារផ្ទះដែលអ្នកកាសែតរស់នៅ រហូតដល់ផ្ញើសំបុត្រគំរាមដោយមានដាក់គ្រាប់កាំភ្លើងក្នុងស្រោមសំបុត្រ។ តំបន់គ្រោះថ្នាក់ជាងគេសម្រាប់អ្នកកាសែតគឺ Sicily និង Calabria ទឹកដីផ្តល់កំណើតដល់ក្រុមម៉ាហ្វ៊ីយ៉ា២ក្រុមធំជាងគេ សាហាវជាងគេ គឺក្រុម Cosa Nostra និងក្រុម Nolrangheta ។ តាមសន្ទស្សន៍សេរីភាពកាសែតក្នុងឆ្នាំ២០១៤ គឺអីុតាលីជាប់ចំណាត់ថ្នាក់លេខ៧៣ក្នុងចំណោម១៨០ប្រទេស ។
ត្រឡប់មករឿងអ្នកកាសែត Roberto Saviano វិញ ។ ក្នុងការបង្ហាញខ្លួនដោយកម្របំផុតនៅចំពោះមុខការសម្ភាសរបស់អ្នកកាសែតដូចគ្នាកាលពីខែសីហា ២០១៥ Roberto Saviano បានឱ្យដឹងពីជីវិតរបស់ខ្លួនដែលកំពុងឆ្លងកាត់ដោយបញ្ជាក់ថា ខ្លួនបានប៉ូលិសជួយការពារយ៉ាងដិតដល់២៤ម៉ោងលើ២៤ម៉ោង ទោះចេញទៅក្រៅប្រទេសក៏ដោយ ។ ប៉ូលិសហាមខ្លួននិយាយទូរស័ព្ទទាក់ទងផ្ទាល់ជាមួយឪពុកម្តាយដើម្បីកុំឱ្យពួកគាត់មានគ្រោះថ្នាក់ ។ ប៉ុន្តែដោយសារមានអីុនធើរណេត និងការជួយជ្រោមជ្រែងអស់ពីចិត្តពីថ្លើមរបស់ប៉ូលិស ព្រមទាំងមិត្តភក្តិ ខ្លួននៅតែអាចទាក់ទងឪពុកម្តាយបានធម្មតា ។ និងអាចទាក់ទងពិភពខាងក្រៅបានជាធម្មតា មិនតែប៉ុណ្ណោះអាចតាមដានសកម្មភាពរបស់ពួកម៉ាហ្វ៊ីយ៉ាទៀតផង ។ Roberto Saviano បញ្ជាក់ច្បាស់ថា ខ្លួនមិនស្តាយក្រោយចំពោះការបកអាក្រាតសកម្មភាពរបស់ពួកម៉ាហ្វ៊ីយ៉ាទេ ហើយក៏មិនខ្លាចការចង់សម្លាប់របស់ពួកម៉ាហ្វ៊ីយ៉ាដែរ, ដាច់ខាតខ្លួននៅតែជ្រើសយកផ្លូវដែលធ្លាប់ដើរនេះដដែល ៕
ចែករំលែកព័តមាននេះ