ខេត្តកណ្ដាល ៖ បុរសវ័យចំណាស់ល្មោភកាមម្នាក់ បានធ្វើសកម្មភាពរំលោភម្តាយក្មេកអាយុ៨៤ឆ្នាំនៅលើផ្ទះ ពេលប្រពន្ធតាមទាន់ចុះរត់គេចខ្លួនបាត់មួយព្រឹក ហើយប្រពន្ធបានទៅប្តឹងសមត្ថកិច្ចនគរបាលប៉ុស្តិ៍រដ្ឋបាលគគីរតាមស្រាវជ្រាវរហូតឈានដល់ចាប់ឃាត់ខ្លួនជនសង្ស័យបានកាលពីវេលាម៉ោង៥ និង២០នាទីល្ងាច ថ្ងៃទី៣០ វិច្ឆិកា ២០១៥ នៅចំណុចភូមិចន្លក់ ឃុំគគីរ ស្រុកកៀនស្វាយ ខេត្តកណ្ដាល ។
យោងតាមរបាយការណ៍របស់សមត្ថកិច្ចបានឲ្យដឹងថា ជនសង្ស័យដែលឃាត់ខ្លួនបាននេះឈ្មោះ ស្រី ដាវី ភេទប្រុស អាយុ៥៤ឆ្នាំ ជនជាតិខ្មែរ រស់នៅភូមិ-ឃុំកើតហេតុ ។ ចំពោះការឃាត់ខ្លួននេះគឺធ្វើឡើងទៅតាមពាក្យបណ្ដឹងរបស់ស្ត្រីឈ្មោះ ឌិន នឹម អាយុ៥១ឆ្នាំ ត្រូវជាប្រពន្ធរបស់ជនសង្ស័យ ដោយចោទប្រកាន់ថា កាលពីថ្ងៃទី៣០ វិច្ឆិកា ២០១៥ វេលាម៉ោងប្រហែល៨ និង៣០នាទីព្រឹក ជនសង្ស័យដែលជាប្តីរបស់ខ្លួនបានឡើងទៅលើផ្ទះរបស់ស្ត្រីវ័យចំណាស់ឈ្មោះ រស់ ញ៉េស ហៅសុខ អាយុ៨៤ឆ្នាំ ជាស្ត្រីមេម៉ាយ រស់នៅម្នាក់ឯងក្នុងភូមិ-ឃុំជាមួយគ្នា ត្រូវជាម្តាយក្មេកជនសង្ស័យ និងត្រូវជាម្តាយបង្កើតរបស់ស្ត្រីជាប្រពន្ធ ។ ខណៈពេលឡើងទៅដល់លើផ្ទះ ឃើញស្ត្រីជាម្តាយក្មេកអង្គុយនៅក្នុងផ្ទះម្នាក់ឯង ឱកាសល្អក៏ចាប់គាត់ផ្តួលទៅលើរនាបផ្ទះ រួចធ្វើសកម្មភាពរំលោភតែម្តង ។ ខណៈនោះស្ត្រីឈ្មោះ ឌិន នឹម ត្រូវជាប្រពន្ធឡើងមកទាន់ បុរសល្មោភកាមជាប្តីបានផ្អាកសកម្មភាពស្ទុះលើកខោស្លៀកដើរចុះមកដី ជិះម៉ូតូគេចខ្លួនបាត់តែម្តង ហើយស្ត្រីជាប្រពន្ធមិនសុខចិត្តក៏រត់មកដាក់ពាក្យបណ្ដឹងនៅប៉ុស្តិ៍នគរបាលរដ្ឋបាលគគីរ ចុះទៅធ្វើការស្រាវជ្រាវរហូតចាប់ខ្លួនជនសង្ស័យបាននៅល្ងាចថ្ងៃដដែលយកមកប៉ុស្តិ៍ដើម្បីធ្វើការសាកសួរ ។
បន្ទាប់ពីសួរនាំរួច សមត្ថកិច្ចបានកសាងសំណុំរឿងបញ្ជូនជនសង្ស័យទៅកាន់អធិការដ្ឋាននគរបាលស្រុកកៀនស្វាយដើម្បីចាត់ការបន្តតាមនិតិវិធីច្បាប់ ៕
ចែករំលែកព័តមាននេះ