ខាងក្រោយតំបន់ដីក្រេហេងក្រហ្ខងដោយសារគ្រាប់បែក មន្ទីរពេទ្យធំបង្គួរមួយបង្ហាញខ្លួននៅកណ្តាលរដ្ឋធានីកាប៊ុល ប្រទេសអាហ្វហ្គានីស្ថាន ជាមន្ទីរពេទ្យជំនាញខាងជួយសង្គ្រោះសត្វចិញ្ចឹមដែលរងគ្រោះដោយសារសង្គ្រាម ។ ក្រោយធ្វើសកម្មភាពជិត៧ឆ្នាំ មន្ទីរពេទ្យតែមួយគ្មានពីរក្នុងលោកនេះសង្គ្រោះឆ្កែ ឆ្មា ដែលត្រូវរបួសឬវង្វេងម្ចាស់ បានរាប់ពាន់ក្បាល និងបានបញ្ជូនពួកវាឱ្យទៅជួបជុំម្ចាស់ដើមវិញ ។
ឆ្កែ ឆ្មា រាប់ពាន់ក្បាលមានផ្ទះថ្មី
មន្ទីរពេទ្យចម្លែកនេះមានឈ្មោះ Nowzad ឬ Nowzad do Pen Farthing ដែលអតីតយុទ្ធជនអង់គ្លេសម្នាក់ឈ្មោះ Pen Farthing ផ្តើមគំនិតបង្កើតទ្បើង ដោយដាក់ឱ្យដំណើរការក្រោមការគ្រប់គ្រងដឹកនាំរបស់លោកស្រីវេជ្ជបណ្ឌិត Louise Hastie ។ មូលហេតុអតីតយុទ្ធជនអង់គ្លេស Pen Farthing ផ្តើមគំនិតបង្កើតមន្ទីរពេទ្យចម្លែកនេះទ្បើង ព្រោះគាត់អាទ្បោះអាល័យឆ្កែសម្លាញ់របស់គាត់ឈ្មោះ Nowazd ដែលបានរួមសុខទុក្ខជាមួយគាត់ក្នុងរយៈពេលគាត់ចូលរួមប្រយុទ្ធនៅអាហ្វហ្គានីស្ថាន ។
លោកស្រីវេជ្ជបណ្ឌិត Louise Hastieបញ្ជាក់ប្រាប់ថា «មន្ទីរពេទ្យ Nowzad ដំណើរការបានជិត៧ឆ្នាំហើយ ។ ក្នុងរយៈពេលនោះមន្ទីរពេទ្យថែទាំព្យាបាលឆ្កែ ឆ្មា បានរាប់ពាន់ក្បាល ។ ឆ្កែនិងឆ្មាទាំងនោះ ភាគច្រើនជាសត្វដែលតាមម្ចាស់ទៅអាហ្វហ្គានីស្ថានធ្វើសង្គ្រាមប្រយុទ្ធជាមួយពួកតាលីបង់ ។ ក្រោយពេលព្យាបាលជាសះស្បើយ ឆ្កែខ្លះ ឆ្មាខ្លះ ត្រូវបានផ្ញើទៅអង់គ្លេស ខ្លះផ្ញើទៅអាមេរិក អូស្ត្រាលី អាហ្វ្រិកខាងត្បូង កាណាដា គឺបើម្ចាស់វានៅប្រទេសណា ផ្ញើទៅប្រទេសនោះឱ្យវាជួបជុំម្ចាស់ដើមវិញ ។
សព្វថ្ងៃក្នុងមន្ទីរពេទ្យសល់តែឆ្មា៥០ក្បាល ឆ្កែ៣០ក្បាល និងលាមួយក្បាល ។ សត្វលានោះត្រូវរបួសធ្ងន់ ដោយសាររអិលជើងធ្លាក់ពីទីទួលពេលវាកំពុងដឹកជញ្ជូនសម្ភារ ហើយត្រូវបានបុគ្គលិកសង្គ្រោះជាជនជាតិកាណាដាម្នាក់បញ្ជូនវាមកព្យាបាលនៅទីនេះ។ វាបានទទួលការព្យាបាលពិសេសរយៈពេល១ខែមកហើយ គឺ១ថ្ងៃម៉ាស្សាវា២ដង និងប្រើប្រាស់រមៀតលាបលើមុខរបួស ។ ចំណីរបស់វាយើងផ្តល់ឱ្យវាបន្លែច្រើនមុខ ដើម្បីវាឆាប់មានកម្លាំងកំហែង ។ សព្វថ្ងៃវាជាសះស្បើយបាន៩០ភាគរយហើយ ។ បច្ចុប្បន្នឆ្កែឈ្មោះ Moxle អាយុ៧ខែ កំពុងរង់ចាំធ្វើដំណើរទៅអាមេរិក ។
ឆ្កែព្រិលសអាហ្វហ្គានិស្ថានមួយក្បាលក៏កំពុងរង់ចាំចេញពីប្រទេសរបស់ខ្លួនទៅរស់នៅបស្ចិមប្រទេស ខណៈឆ្កែឈ្មោះ William រង់ចាំទៅប្រទេសអេស្ប៉ាញ ឆ្កែឈ្មោះ Holly ទៅប្រទេសអង់គ្លេស គឺឱ្យតែប្រាក់ឧបត្ថម្ភមន្ទីរពេទ្យ Nowzad មកដល់គ្រប់គ្រាន់ពេលណា ពួកវាបានធ្វើដំណើរចេញទៅពេលនោះភ្លាម» ។
លោកស្រីវេជ្ជបណ្ឌិត Louse HatTie និយាយបន្ត «សព្វថ្ងៃលើទឹកដីអាហ្វហ្គានីស្ថានមានឆ្កែប្រមាណ៨.០០០ក្បាល ពុលដោយក្លិនរំសេវក្នុងសង្គ្រាម ដូច្នេះមន្ទីរពេទ្យត្រូវមានកម្មវិធីជួយទប់ស្កាត់ជំងឺឆ្កែឆ្កួត ដែលកម្មវិធីនេះរួមមានការពន្យល់អប់រំកុមារា កុមារី អាហ្វហ្គានីស្ថានឱ្យយល់របៀបការពារខ្លួនចំពោះមុខឆ្កែអនាថា និងមានអាកប្បកិរិយាអាណិតអាសូរវាផង។ ដូចយ៉ាងឆ្កែមួយក្បាលដែលគេដាក់ឈ្មោះថាAtish ក៏ជាឆ្កែអនាថាដែរ ។ Atish របួសពេញខ្លួនដោយសារភាពយង់ឃ្នងនៃសង្គ្រាម ។ វាត្រូវបានបុគ្គលិកសង្គ្រោះម្នាក់ប្រទះឃើញតាមចិញ្ចើមផ្លូវក៏នាំវាមកឱ្យមន្ទីរពេទ្យ Nowzad ជួយសង្គ្រោះ ។ សព្វថ្ងៃវាបានធូរស្រាលគ្រាន់បើហើយ» ។
ការងារកណ្តាលសភាពការណ៍សន្តិសុខមិនអំណោយផល
លោកស្រីវេជ្ជបណ្ឌិត Louise Hastieនិយាយដោយលំបាកចិត្តថា «មន្ទីរពេទ្យ Nowzad ចំណាយប្រាក់ក្នុង១ខែអស់ប្រមាណ១០.០០០ផោន ចំណាយសម្រាប់បញ្ជូនសត្វមួយក្បាលទៅប្រទេសក្រៅអស់៤.០០០ផោន ខណៈសភាពការណ៍សន្តិសុខនៅអាហ្វហ្គានីស្ថានពេលនេះកាន់តែអាក្រក់ទៅ បង្កការលំបាកកាន់តែខ្លាំងចំពោះសកម្មភាពរបស់មន្ទីរពេទ្យNowzad។ ការចាប់ជម្រិត ការលបវាយឆ្មក់កើនទ្បើងជានិច្ច។ កាលពីពេលថ្មីកន្លងមកនៅរដ្ឋធានីកាប៊ុលមានការបំផ្ទុះគ្រាប់បែក៨ដង បណ្តាលឱ្យមនុស្ស ស្លាប់ និងរបួសជាង១០០នាក់ ។ សព្វថ្ងៃជនបស្ចិមប្រទេសជាច្រើនចេញអស់ពីអាហ្វហ្គានីស្ថានហើយ ប៉ុន្តែខ្ញុំនៅតែប្តេជ្ញាចិត្តមិនទៅណាទាំងអស់ ។ ខ្ញុំសុខចិត្តលះបង់ការងារទទួលបានប្រាក់ខែច្រើន មកធ្វើការងារស្ម័គ្រចិត្តនេះ ។ មនុស្សមិនតិចទេថាខ្ញុំ «ឆ្កួត» តែអ្នកណាថាអីថាទៅខ្ញុំអត់ខ្វល់ ។ ខ្ញុំនៅតែនៅទីនេះ ទោះបីខ្ញុំជាមនុស្សចុងក្រោយក៏ដោយ» ។
តាមការបញ្ជាក់របស់លោកស្រីវេជ្ជបណ្ឌិត Louise Hastie មានការវាយប្រហារកើតទ្បើងក្បែរមន្ទីរពេទ្យ Nowzad ជាញឹកញាប់ ។ ថ្មីៗនេះការវាយប្រហារមួយធ្វើសំដៅគេហដ្ឋានលោកវេជ្ជបណ្ឌិតជនជាតិអាហ្វ្រិកខាងត្បូងដែលនៅជាប់របងមន្ទីរពេទ្យ បណ្តាលឱ្យគ្រួសារលោកវេជ្ជបណ្ឌិតស្លាប់អស់រលីង ។ បន្ទាប់ពីការវាយប្រហារនោះ មីនមួយគ្រាប់ត្រូវទាហានអាហ្វហ្គានីស្ថានរកឃើញនិងដោះយកចេញនៅត្រង់ផ្លូវចូលមន្ទីរពេទ្យ ៕
ចែករំលែកព័តមាននេះ