រាជធានីភ្នំពេញ ៖ កាលពីថ្ងៃទី២៧ វិច្ឆិកា ឆ្នាំ២០១៥ សមាគមសិល្បករខ្មែរដឹកនាំដោយលោកសុះ ម៉ាច បានចូលរួមពិធីបុណ្យសពមាតាលោកខៀវ កាញារីទ្ធ រដ្ឋមន្ត្រីក្រសួងព័ត៌មាន ។
អ្នកសិល្បៈចូលរួមគោរពវិញ្ញាណក្ខន្ធនាឱកាសនោះមានលោកសុះ ម៉ាច, លោកទុំ សារុត ហៅនាយឃ្លោក, លោកកុយ ស៊ីឌឿន, លោកអឹុម ជីវ៉ា, លោកម៉ាដូណា, អ្នកនាងស៊ុន ណារីម៉ូនីកា, អ្នកស្រីថុង ស៊ីវទៀង, អ្នកស្រីត្រឡុង កាណារ៉ូ, លោកគន់ រៀមរតនៈ, កញ្ញាដួង មានិច និងតារាមួយចំនួនទៀត ។
តំណាងសិល្បករបានថ្លែងថា «យើងទាំងអស់គ្នាសូមចូលរួមមរណទុក្ខជាមួយលោកខៀវ កាញារីទ្ធ ដែលបាត់បង់អ្នកម្តាយគ្មានថ្ងៃវិលត្រឡប់ ។ ការចូលរួមលើកទឹកចិត្តគ្រាមានទុក្ខនេះ ជាទឹកចិត្តខ្មែរស្រឡាញ់ខ្មែរ មានកិច្ចការអ្វីមានតែអ្នកជិតខាងគ្នាជួយមុនគេ ។ ម្យ៉ាងទៀតលោកខៀវ កាញារីទ្ធ បានជួយដោះស្រាយបញ្ហាជាច្រើនសម្រាប់អ្នកសិល្បៈ ដូចជា ជូនអំណោយអ្នកសិល្បៈ ចាស់ៗ ។ ជួយទប់ស្កាត់ភាពយន្តបរទេសមិនឱ្យចាក់ផ្សាយក្នុងម៉ោងពិសេស និងអំពាវនាវឱ្យអ្នកផលិតភាពយន្តខ្មែរ សម្រិតសម្រាំងស្នាដៃសម្រាប់បញ្ចាំងនៅម៉ោងពិសេស ទាក់ទាញទស្សនិកជន» ។
មាតាលោកខៀវ កាញារីទ្ធ ទទួលមរណភាពកាលពីថ្ងៃទី២៦ វិច្ឆិកា ក្នុងជន្មាយុ៨៨ឆ្នាំដោយជរាពាធ ហើយសពដង្ហែទៅបូជានៅឈាបនដ្ឋានវត្តលង្កាកាលពីព្រឹកថ្ងៃអាទិត្យ ទី២៩ វិច្ឆិកា ឆ្នាំ២០១៥៕
ចែករំលែកព័តមាននេះ