ឯកឧត្តម ស៊ុយ សែម រដ្ឋមន្ត្រីក្រសួង រ៉ែ និងថាមពល បានឱ្យដឹងថា ដុំមាសទី២ របស់កម្ពុជា ចម្រាញ់ចេញពីរោងចក្រចម្រាញ់រ៉ែមាស នៅតំបន់អូរខ្វាវ នៃខេត្តមណ្ឌលគិរី បានចេញជារូបរាង និងមានទម្ងន់សរុប
រាជធានីភ្នំពេញ ៖ ឯកឧត្តម ស៊ុយ សែម រដ្ឋមន្ត្រីក្រសួង រ៉ែ និងថាមពល បានឱ្យដឹងថា ដុំមាសទី២ របស់កម្ពុជា ចម្រាញ់ចេញពីរោងចក្រចម្រាញ់រ៉ែមាស នៅតំបន់អូរខ្វាវ នៃខេត្តមណ្ឌលគិរី បានចេញជារូបរាង និងមានទម្ងន់សរុប ៥,៨ គីឡូ ។
បើតាមរូបភាពដុំមាសទី២ ដែលមានទម្ងន់ជិត ៦ គីឡូ ដែលកោះសន្តិភាពទទួលបាន គឺមានពណ៌ស្រស់ស្អាត ភ្លឺពណ៌មាស និងមានចារជាអក្សរឡាតាំង «OKV 0002» លើដុំមាសនោះផងដែរ ។ រូបភាពមួយទៀត គឺជារូបភាពដុំមាសទី២ របស់កម្ពុជា ដាក់ថ្លឹងលើជញ្ជីងបង្ហាញពីទម្ងន់របស់មាស ឃើញហើយពិតជារំភើប និងមានមោទនភាពខ្លាំងចំពោះប្រជាជាតិខ្មែរ ។
សូមរម្លឹកថា កាលពីថ្ងៃទី២១ មិថុនា ២០២១ កន្លងទៅ កម្ពុជាបានរៀបចំពិធីកាត់ខ្សែបូសម្ភោធដាក់ឱ្យដំណើរការរោងចក្រចម្រាញ់រ៉ែមាស នៅតំបន់អូរខ្វាវ នៃខេត្តមណ្ឌលគិរី ក្រោមអធិបតីភាពឯកឧត្តម ស៊ុយ សែម, ឯកឧត្តម សាយ សំអាល់ រដ្ឋមន្ត្រីក្រសួងបរិស្ថាន និងមន្ត្រីជាន់ខ្ពស់រាជរដ្ឋាភិបាលច្រើនរូបទៀត រួមជាមួយនឹងខាងតំណាងស្ថានទូតអូស្ត្រាលីប្រចាំនៅកម្ពុជា ។
ឯកឧត្តមរដ្ឋមន្ត្រី ស៊ុយ សែម ថ្លែងនៅក្នុងពិធីបើកដំណើរការចម្រាញ់មាសលើកដំបូង របស់ក្រុមហ៊ុន Renaissance Minerals (Cambodia) Limited នៅតំបន់អូរខ្វាវ ការដ្ឋានអាជីវកម្ម និងរោងចក្រចម្រាញ់រ៉ែមាស មានសមត្ថភាពជីកយករ៉ែឆៅប្រមាណជិត ២លានតោន ក្នុងមួយឆ្នាំ និងចម្រាញ់ចេញជាដុំមាសកម្រិត៩០ភាគរយ ។ ការដ្ឋានអាជីវកម្ម និងរោងចក្រចម្រាញ់រ៉ែមាស នឹងស្រូបទាញកម្លាំងពលកម្មសរុបប្រមាណ៤៦២នាក់ ក្នុងនោះមានជនជាតិខ្មែរប្រមាណ៤២៧នាក់ និងបរទេស៣៥នាក់ ហើយអាចទាញចំណូលប្រមាណ១៨៥លានដុល្លារសហរដ្ឋអាមេរិក ក្នុងមួយឆ្នាំ ដែលក្នុងនោះចំណូលថវិកាជាតិពីសួយសារ និងសារពើពន្ធផ្ទាល់មានប្រមាណ៤០លានដុល្លារសហរដ្ឋអាមេរិក ។
នៅថ្ងៃទី២១ ខែមិថុនា នេះ កម្ពុជាបានចាប់ផ្តើមបើកដំណើរការចម្រាញ់មាសលើកដំបូងហើយនៅតំបន់អូរខ្វាវ ស្រុកកែវសីមា ខេត្តមណ្ឌលគិរី ជាទិវាប្រវត្តិសាស្ត្រមួយដែលទើបតែកើតមានក្នុងព្រះរាជាណាចក្រកម្ពុជា សម័យតេជោសែន ៕
ចែករំលែកព័តមាននេះ