- ភ្នំពេញ
ភ្នំពេញ៖ បើទោះបីជាកម្ពុជាយើង ប្រឈមនឹងការឆ្លងរាតត្បាតជំងឺកូវីដយ៉ាងណាក៏ដោយ តែសកម្មភាពអភិវឌ្ឍន៍ និងការដ្ឋានសំណង់ នៅតែបន្តរៀងរាល់ថ្ងៃ។ ការអភិវឌ្ឍន៍ និងការដ្ឋានសំណង់បុរីផ្ទះល្វែងទាំងអស់នេះ នាំឲ្យមានសកម្មភាពដឹកជញ្ជូនដី ដីខ្សាច់…
ភ្នំពេញ៖ បើទោះបីជាកម្ពុជាយើង ប្រឈមនឹងការឆ្លងរាតត្បាតជំងឺកូវីដយ៉ាងណាក៏ដោយ តែសកម្មភាពអភិវឌ្ឍន៍ និងការដ្ឋានសំណង់ នៅតែបន្តរៀងរាល់ថ្ងៃ។ ការអភិវឌ្ឍន៍ និងការដ្ឋានសំណង់បុរីផ្ទះល្វែងទាំងអស់នេះ នាំឲ្យមានសកម្មភាពដឹកជញ្ជូនដី ដីខ្សាច់ គ្រួសថ្ម មិនថានៅភ្នំពេញ ឬនៅតាមបណ្តាខេត្តនោះឡើយ។
ការដឹកជញ្ជូនដី ដីខ្សាច់ គ្រួសថ្មនេះហើយ បង្កឲ្យផ្លូវជាតិ ផ្លូវបេតុង មិនថា នៅភ្នំពេញ ឬនៅតាមបណ្តាខេត្តទេ បានប្រែក្លាយជាផ្លូវដីហុយ ដោយសារតែឡានធំៗដឹកជញ្ជូនទាំងអស់នោះ មិនបានគ្របបិទបាំងត្រឹមត្រូវ។
យ៉ាងណាក៏ដោយ កាលពីព្រឹកថ្ងៃទី២២ ខែមិថុនា ឆ្នាំ២០២១ កម្លាំងសណ្តាប់ខណ្ឌសែនសុខ បានបោសសំអាត និងកៀរកើបដីលើកំណាត់ផ្លូវ១០១៩ ឬមហាវិថីភ្នំពេញ-ហាណូយ ចាប់ពីចំណុចមហាវិថីឈ្នះឈ្នះ ឬផ្លូវទំនប់ កប់ស្រូវ ដល់ស្តុប៩២ ស្ថិតក្នុងសង្កាត់ឃ្មួញ ខណ្ឌសែនសុខ រាជធានីភ្នំពេញ។ កំណាត់ផ្លូវនេះ ពោរពេញដោយធូលីដី ដែលធ្លាក់ចេញពីឡានដឹកដី ដឹកខ្សាច់ គ្រួសថ្មរាប់រយពាន់គ្រឿង ក្នុង ១ថ្ងៃៗ។
ផ្លូវជាតិ ផ្លូវបេតុង គ្របដណ្តប់ដោយធូលីដីហុយទ្រលោម បានកើតឡើងយូរខែឆ្នាំមកហើយ ហើយក៏មិនមែនតែ នៅមហាវិថីភ្នំពេញ-ហាណូយទេ គឺនៅមហាវិថីឈ្នះឈ្នះ ឬផ្លូវទំនប់កប់ស្រូវ លើស្ពានព្រែកព្នៅ ផ្លូវក្រវ៉ាត់ក្រុង ខាងផ្លូវ ៦០ម៉ែត្រ បឹងទំពន់ ឬមហាវិថីសម្តេច ហ៊ុន សែន ផ្លូវស្ពានព្រែកសំរោង ក្រុងតាខ្មៅ ជាដើម គឺពោរពេញដោយដីខ្សាច់ និងធូលីដី ដែលធ្លាក់មកពីឡានធំៗ បង្កជាដីហុយ ពិបាកធ្វើដំណើរជាខ្លាំង។
នៅខែនេះ ជាខែភ្លៀងផង គឺបែកម៉ាំ។ នេះក៏ដោយសារតែឡានដឹកដី និងដឹកខ្សាច់ ដែលគ្មានគ្របបិទបាំង បង្កឲ្យដី និងខ្សាច់ធ្លាក់រាយប៉ាយពេញផ្លូវ។ មិនត្រឹមតែហុយទ្រលោមទេ គឺធូលីដី និងដីខ្សាច់នៅលើផ្លូវជាតិ ផ្លូវបេតុង ទាំងនោះ ក៏អាចបង្កហានិភ័យ ជាគ្រោះថ្នាក់ចរាចរណ៍ ដល់អ្នកធ្វើដំណើរ ពិសេសអ្នកធ្វើដំណើរតាមកង់ និងម៉ូតូ។
យ៉ាងណាក៏ដោយ តាមផ្លូវទាំងអស់នោះ បើសិនជាមានកម្មវិធី ដែលសម្តេចតេជោ ហ៊ុន សែន ត្រូវអញ្ជើញ ធ្វើដំណើរឆ្លងកាត់តាមផ្លូវអស់ទាំងនោះ គឺផ្លូវអស់ទាំងនោះ ត្រូវគេបោសសម្អាត បាញ់ទឹកលាង ដោយគ្មានសំរាម និងគ្មានធូលីដីសោះឡើយ។ ប៉ុន្តែក្នុងអំឡុងពេលប៉ុន្មានខែចុងក្រោយ ពេលកូវីដរាតត្បាតនេះ សកម្មភាពបោស សម្អាត ពិនិត្យមើលផ្លូវ ហាក់ដូចជាស្ងប់ស្ងាត់ដែរ។
ក្រៅពីដី និងខ្សាច់ ដែលជ្រុះលើផ្លូវទាំងអស់នោះហើយ ក៏នៅមានឡានដឹកដី និងដឹកខ្សាច់ទាំងនោះទៀតសោត បានបើកលឿនៗ ដែលអាចបង្កគ្រោះថ្នាក់ថែមទៀតផង។
ករណីទាំងអស់នេះ ទាមទារឲ្យអាជ្ញាធរសមត្ថកិច្ច ពិសេសអាជ្ញាធរខណ្ឌស្រុកក្រុងរាជធានីខេត្ត ត្រូវតែដោះស្រាយ និងទប់ស្កាត់ឡានដឹកដី ដឹកខ្សាច់ ដែលបង្កឲ្យផ្លូវជាតិ ផ្លូវកៅស៊ូ ផ្លូវបេតុង ក្លាយជាផ្លូវដីហុយទ្រលោម ដែលអាច នឹងបង្កគ្រោះថ្នាក់ជាយថាហេតុណាមួយ។
អាជ្ញាធរសមត្ថកិច្ច គួរតែកំណត់ឲ្យម្ចាស់ការដ្ឋាន អ្នកម៉ៅការ និងម្ចាស់ឡានដឹកដី ដឹកខ្សាច់ទាំងអស់នោះ ត្រូវទទួលខុសត្រូវ។ ឡានដឹកដី ដឹកខ្សាច់ មុនចេញពីរណ្តៅដី ឬកន្លែងដឹកខ្សាច់ ត្រូវបាញ់លាងសម្អាតកង់ឡាន ហើយមានតង់កៅស៊ូគ្របបិទដី និងខ្សាច់លើឡានទាំងអស់នោះ ដើម្បីធានាថា មិនធ្លាក់ដី និងខ្សាច់ ឬក៏គ្រួសថ្ម មកលើផ្លូវឡើយ នៅពេលដឹកជញ្ជូន។ រៀងរាល់ថ្ងៃ ត្រូវមានឡានទឹក បាញ់លាងសម្អាតតាមផ្លូវ ដែលឡានដឹកដី ដឹកខ្សាច់ទាំងនោះ បើកឆ្លងកាត់។ បើមិនបានរាល់ថ្ងៃ ក៏សូម ១សប្តាហ៍ម្តងក៏បាន។
ក្នុងករណីម្ចាស់ការដ្ឋាន អ្នកម៉ៅការ និងម្ចាស់ឡានដឹកដី ដឹកខ្សាច់ទាំងអស់នោះ មិនធ្វើទេ គឺអាចចេញតែថ្លៃឈ្នួល ហើយអាជ្ញាធរសមត្ថកិច្ចមូលដ្ឋាន តាមខណ្ឌស្រុកក្រុង ឬឃុំសង្កាត់ ជាអ្នករ៉ាប់រង ដោយជួលភ្នាក់ងារបោសសម្អាតបាញ់លាងផ្លូវ ឬក៏ប្រើកងកម្លាំងប្រជាការពារ ធ្វើការងារនេះ ហើយផ្តល់ប្រាក់កម្រៃសមរម្យ ដែលក្រុមហ៊ុន អ្នកម៉ៅការ និងអ្នកបើកបរឡានដឹកដី ដឹកខ្សាច់ទាំងអស់នោះ ជាអ្នកបង់ថ្លៃរាល់ការចំណាយ។
បើសិនជាម្ចាស់ការដ្ឋាន អ្នកម៉ៅការ និងម្ចាស់ឡានដឹកដី ដឹកខ្សាច់ ថ្មគ្រួសទាំងអស់នោះ មិនព្រមអនុវត្តទេ គឺអាជ្ញាធរសមត្ថកិច្ច ត្រូវអនុវត្តវិធានការច្បាប់ ដោយបិទការដ្ឋានសាងសង់នោះ ផ្អាកដំណើរការជីកលក់អាចម៍ដី ផ្អាកអាជីវកម្មខ្សាច់ ហើយចាប់យកឡាន ដែលបង្កឲ្យមានដីហុយទាំងអស់នោះ យកទៅដាក់នៅខណ្ឌស្រុកក្រុង ហើយផាកពិន័យ ឲ្យលាងសម្អាតផ្លូវឲ្យស្អាតឡើងវិញ និងឈប់ឲ្យបើកបររកស៊ីតទៅទៀត។
វិធានទាំងនេះ ជារឿងសាមញ្ញ និងអាចធ្វើបាន ប្រសិនបើអាជ្ញាធរសមត្ថកិច្ច អនុវត្ត។ ខ្លាចតែអាជ្ញាធរសមត្ថកិច្ច ត្រូវរ៉ូវ ដើម្បីផលប្រយោជន៍អ្វីមួយ ហើយក៏បិទភ្នែកទេ ទើបផ្លូវជាតិ ផ្លូវកៅស៊ូ និងផ្លូវបេតុង បន្តក្លាយជាផ្លូវដីហុយទ្រលោម ក្នុងពេលដែលថ្នាក់ដឹកនាំ មិនបានធ្វើដំណើរឆ្លងកាត់លើផ្លូវអស់ទាំងនោះ។
ដោយឡែក ប្រជាពលរដ្ឋ អ្នករស់នៅតាមផ្លូវទាំងនេះ ក៏គួរតែចូលរួមសម្អាតមុខផ្ទះ មុខហាង មុខការ៉ាស់សាំង រៀងៗខ្លួនផង ព្រោះថា បើទុកកំណកដី ដីខ្សាច់លើផ្លូវមុខផ្ទះ ក៏ហុយចូលផ្ទះខ្លួនឯងដែរ។ ចូលរួមបន្តិចម្នាក់ៗ ខណៈអាជ្ញាធរសមត្ថកិច្ច ចាត់វិធានការដែរនោះ គឺផ្លូវយើង នឹងស្អាតឡើងវិញហើយ។
តែសំខាន់ជាងគេ អាជ្ញាធរសមត្ថកិច្ចតាមរាជធានីខេត្ត ពិសេសតាមខណ្ឌក្រុងស្រុក គួរតែចាត់ចែងបោសសម្អាតដី និងខ្សាច់ចេញពីផ្លូវ ដើម្បីការពារកុំឲ្យមានគ្រោះថ្នាក់ ដោយសារតែដី និងខ្សាច់ ជ្រុះធ្លាក់ពីឡាន បម្រើឲ្យការដ្ឋានឯកជនអស់ទាំងនោះ។ ម្យ៉ាងខែនេះ ជាខែភ្លៀងទៀត កាន់តែអាចបង្កគ្រោះថ្នាក់ ដល់អ្នកធ្វើដំណើរតាមម៉ូតូ ឬកង់។ យើងគួរតែការពារ ប្រសើរជាងព្យាបាល។ អនុសាសន៍សម្តេចតេជោ ដែលបញ្ជាឲ្យអាជ្ញាធរខេត្តរាជធានី ស្រុកខណ្ឌក្រុង «មើលផ្លូវ» នៅតែមានប្រសិទ្ធិភាពគ្រប់កាលៈទេសៈ និងគ្រប់ទីកន្លែង៕
ចែករំលែកព័តមាននេះ