ទីបំផុត! តុលាការសម្រេចឃុំខ្លួនតារាសម្តែង អេដ វីន នៅពន្ធនាគារព្រៃ.ស
- ភ្នំពេញ
នៅមុននេះបន្តិច ចៅក្រម សើបសួរនៃសាលាដំបូងរាជធានីភ្នំពេញបានសម្រេចឃុំខ្លួន ជនជាប់ចោទតារាសម្តែងឈ្មោះ អេដ វីន នៅមណ្ឌលអប់រំកែប្រែ ម ១ ។
រាជធានីភ្នំពេញ ៖ នៅមុននេះបន្តិច ចៅក្រមសើបសួរនៃសាលាដំបូងរាជធានីភ្នំពេញ បានសម្រេចឃុំខ្លួន ជនជាប់ចោទតារាសម្តែងឈ្មោះ អេដ វីន នៅមណ្ឌលអប់រំកែប្រែ ម១ (ពន្ធនាគារព្រៃស) ហើយ ។ ប្រភពព័ត៌មានពីតុលាការក្រុងភ្នំពេញបានឱ្យដឹងថា ចៅក្រមសើបសួរនៃសាសាដំបូងរាជធានីភ្នំពេញ លោក សាន្ត ប៊ុនធឿន បានសម្រេច ឃុំខ្លួនតារាសម្តែងប្រុសនេះនៅពន្ធនាគារព្រៃស ពាក់ព័ន្ធការប្រព្រឹត្តអំពើហឹង្សាកន្លងមក ។
លោក ប្លង់ សុផល ព្រះរាជអាជ្ញារង និងជាអ្នកនាំពាក្យអយ្យការអមសាលាដំបូងរាជធានីភ្នំពេញ បានឲ្យដឹងថា សំណុំរឿងជនជាប់ចោទតារាសម្តែងឈ្មោះ អេដ វីន តំណាងអយ្យការបើកការស៊ើបសួរចប់សព្វគ្រប់ហើយ កាលពីល្ងាចថ្ងៃទី២២ ខែមិថុនា ឆ្នាំ២០២១ ។
អ្នកនាំពាក្យបន្តថា សំណុំរឿងនេះ លោក វង្ស សាវ៉ាត ព្រះរាជអាជ្ញារង បើកការសាកសួរ និងបានចោទប្រកាន់ជនសង្ស័យជាផ្លូវការហើយចំនួន២បទល្មើស ។ ដោយបទល្មើសទី១- អំពើហិ.ង្សាប្រព្រឹត្តដោយសហព័ទ្ធ ឬអនីតិសង្វាសជន ដែលបទល្មើសនេះមានចែងតាមបញ្ញតិមាត្រា ២២២ នៃក្រមព្រហ្មទណ្ឌ។ អំពើហិ.ង្សាដោយចេតនា ត្រូវផ្តន្ទាទោសលើជនជាប់ចោទដាក់ពន្ធនាគារពី២ឆ្នាំទៅ៥ឆ្នាំ និងពិន័យជាប្រាក់ចូលថវិការដ្ឋពី៤លានទៅ១០លានរៀល ។ ចំណែកបទល្មើសទី២- ធ្វើឲ្យខូចខាតដោយចេតនា តាមបញ្ញតិមាត្រា ៤១០ នៃក្រមព្រទណ្ឌ ដែលអំពើប្រព្រឹត្តដោយចេតនាបំផ្លិចបំផ្លាញធ្វើឲ្យទ្រុឌទ្រោម ឬធ្វើឲ្យខូចខាតទ្រព្យសម្បត្តិរបស់អ្នកដទៃនោះ និងត្រូវផ្តន្ទាទោសលើជនជាប់ចោទ ដាក់ពន្ធនាគារពី៦ខែទៅ២ឆ្នាំ និងពិន័យជាប្រាក់ចូលថវិការដ្ឋពី១លានទៅ៤ លានរៀល ៕
សូមបញ្ជាក់ថា ការឃុំខ្លួនតារាសម្តែងប្រុសរូបនេះ គឺពាក់ព័ន្ធននឹងរឿងរ៉ាវផ្ទុះហិ.ង្សារវាងរូបលោក និងគូស្នេហ៍របស់លោក ដែលភាគីខាងស្រីបានបង្ហោះសារនិងរូបភាពជាច្រើនសន្លឹកដែលមានស្នាមជាំសឹងពេញដងខ្លួន និងមុខ និងបានតបង្ហោះសារថ្លែងពីការឈឺចាប់ និងប្រកាសចាត់វិធានការផ្លូវច្បាប់ចំពោះតារាសម្តែងប្រុសរូបនេះ ៕
ចែករំលែកព័តមាននេះ