ករណីរកឃើញអ្នកឆ្លងជំងឺកូវីដ១៩ នៅក្នុងខេត្តរតនគិរី ដែលជាការផ្ទុះនៅក្នុងសហគមន៍២០កុម្ភៈ គឺទ្រង់ទ្រាយធំលើកដំបូង ដែលមានមនុស្សជាច្រើននាក់វិជ្ជមានកូវីដ១៩
ខេត្តរតនគិរី ៖ ករណីរកឃើញអ្នកឆ្លងជំងឺកូវីដ១៩ នៅក្នុងខេត្តរតនគិរី ដែលជាការផ្ទុះនៅក្នុងសហគមន៍២០កុម្ភៈ គឺទ្រង់ទ្រាយធំលើកដំបូង ដែលមានមនុស្សជាច្រើននាក់វិជ្ជមានកូវីដ១៩។
នៅក្នុងភូមិសាស្ត្រខេត្តរតនគិរី ក្រុមការងារឆ្លើយតបបន្ទាន់មន្ទីរសុខាភិបាលនៃរដ្ឋបាលខេត្តរតនគិរី នៅថ្ងៃទី១៨ និងថ្ងៃទី១៩ ខែមិថុនា ឆ្នាំ២០២១នេះ បានស្រាវជ្រាវរកឃើញករណីវិជ្ជមានកូវីដ១៩ ចំនួន១០៤នាក់ ដែលពាក់ព័ន្ធនឹងព្រឹត្តិការណ៍សហគមន៍២០កុម្ភៈនោះ។
រដ្ឋបាលខេត្តរតនគិរី មានកិត្តិយសជម្រាប និងអំពាវនាវដល់សារធារណជនទាំងអស់ថា តាមរយៈលទ្ធផលខាងលើ បង្ហាញថា ជំងឺកូវីដ១៩ បានកំពុងមានវត្តមានផ្ទុះរីករាលដាលដល់សហគមន៍ទ្រង់ទ្រាយធំ នឹងអាចរាលដាលបន្តបន្ទាប់ទៀត ដែលបង្កជាហានិភ័យដល់សុខភាពរបស់បងប្អូនប្រជាពលរដ្ឋនៅក្នុងខេត្ត។ សាធារណជនទាំងអស់ ដែលបានពាក់ព័ន្ធផ្ទាល់ និងប្រយោលជាមួយអ្នកជំងឺកូវីដ១៩ទាំងអស់ សូមស្ម័គ្រចិត្តទៅធ្វើតេស្តសំណាក ឬនៅដាច់ដោយឡែកពីអ្នកដទៃតាមដានសុខភាពជាប្រចាំផង។ បើមានសង្ស័យ សូមរាយការណ៍ភ្លាមទៅអាជ្ញាធរមានសមត្ថកិច្ចក្នុងមូលដ្ឋានទំនាក់ទំនងទូរស័ព្ទ០៩៧៥៩៥៧៧៨៨. ០៩២១២១៣៨៣. ០៩៧៧៧៥១២១២។
រដ្ឋបាលខេត្ត សង្ឃឹមយ៉ាងមុតមាំថា សាធារណជនទាំងអស់ និងចូលរួមអនុវត្តន៍ឱ្យបានម៉ឺងម៉ាត់ជាទីបំផុតនូវវិធានការ «៣កុំ ៣ការពារ» និងសហការជាមួយអាជ្ញាធរមានសមត្ថកិច្ច ដើម្បីបង្ការ និងទប់ស្កាត់ការឆ្លងរីករាលដាលនៃកូវីដ១៩ ចូលក្នុងសហគមន៍ និងក្រុមគ្រួសារបន្តទៀត។
ហើយការរកឃើញវិជ្ជមានកូវីដ១៩នោះ ភាគច្រើនកើតមាននៅក្នុងតំបន់ភូមិសាស្ត្រសង្កាត់ឡាបានសៀក, សង្កាត់បឹងកន្សែង ក្រុងបានលុង និងស្រុកបរកែវ ហើយអ្នកទាំងអស់នោះកំពុងស្ថិតក្នុងការសម្រាកព្យាបាល និងធ្វើចត្តាឡីស័កផងដែរ។
រដ្ឋបាលខេត្ត ក៏សូមជំរាបបងប្អូនប្រិយមិត្តភ្ញៀវទេសចរជាតិ និងអន្តរជាតិផងដែរ ដែលចង់មកកំសាន្តខេត្តរតនគិរីនោះ ឱ្យបានជ្រាបថា តំបន់កំសាន្តនានាក្នុងខេត្តរតនគិរី មិនទាន់ត្រូវបានអនុញ្ញាតឱ្យបើកបម្រើភ្ញៀវទេសចរនៅឡើយទេ ។ ជាពិសេសតំបន់រមណីយដ្ឋានប្រវត្តិសាស្ត្រ បឹងយក្សឡោមនោះតែម្តង និងតំបន់នានាក្នុងក្រុងបានលុង សមត្ថកិច្ចកំពុងយាមកាមដោយប្រុងប្រយ័ត្នផងដែរ រាល់ភ្ញៀវដែលចេញ-ចូលនៅតំបន់មួយចំនួននោះ៕
ចែករំលែកព័តមាននេះ