ខេត្តកណ្ដាល ៖ រថយន្តបែនដឹកដីធុនយក្ស១គ្រឿងដែលជាកម្មសិទ្ធិរបស់ក្រុមហ៊ុនដឹកដី SCG បានខូច ហើយមិនបានរករថយន្តផ្សេងទៀតអូសដាក់ទៅកៀនខាងនោះទេ គឺបានចតទុកនៅលើទ្រូងផ្លូវតែម្ដង
ដោយមិនបានដាក់ភ្លើងបំភ្លឺជាសញ្ញាប្រុងប្រយ័ត្នសម្រាប់អ្នកដំណើរនោះឡើយធ្វើឱ្យម៉ូតូ១គ្រឿងម៉ាកហុងដាឌ្រីម សេ១២៥ បើកបរដោយបុរសម្នាក់ទៅដល់មើលមិនឃើញក៏បានបុកពីក្រោយរថយន្តនោះយ៉ាងពេញទំហឹងបណ្ដាលឲ្យបែកក្បាលស្លាប់ភ្លាមៗនៅនឹងកន្លែងក្នុងថ្លុកឈាម។
ឧប្បត្តិហេតុគ្រោះថ្នាក់ចរាចរណ៍នោះបានកើតឡើងកាលពីវេលាម៉ោង៧ និង២០យប់ ថ្ងៃទី២៤ វិច្ឆិកា ២០១៥ នៅលើកំណាត់ផ្លូវជាតិលេខ៤១ ត្រង់ចំណុចភូមិព្រៃចំការ ឃុំលំហាច ស្រុកអង្គស្នួល ខេត្តកណ្ដាល។
រថយន្តបង្កនោះម៉ាក ហ៊ីយ៉ាន់ដាយ ពណ៌ស ពាក់ស្លាកលេខ ស្វាយរៀង3A-1309 បើកបរដោយបុរសម្នាក់មិនស្គាល់ឈ្មោះ ព្រោះក្រោយពេលកើតហេតុបានរត់គេចខ្លួនបាត់ស្រមោល ប៉ុន្តែរថយន្តនោះត្រូវបានគេស្គាល់ថា ជាកម្មសិទ្ធិរបស់ក្រុមហ៊ុនដឹកដូ SCG ចំណែកជនរងគ្រោះដែលស្លាប់ឈ្មោះ ចក់ សារិទ្ធ ភេទប្រុស អាយុ៣៧ឆ្នាំ មុខរបរជាកម្មករ មានទីលំនៅក្នុងភូមិក្រាំងទាវ ឃុំវាល ស្រុកគងពិសី ខេត្តកំពង់ស្ពឺ ៕
ចែករំលែកព័តមាននេះ