ខេត្តស្ទឹងត្រែង ៖ សត្វផ្សោតមួយក្បាលទៀតហើយ បានបាត់បង់ជីវិតនៅលើដងទន្លេមេគង្គ ត្រូវឆ្មាំអភិរក្សប្រទះឃើញ នៅវេលាម៉ោងប្រមាណ៣ទៀបភ្លឺ ថ្ងៃទី១៤ ខែមិថុនា ឆ្នាំ២០២១ ស្ថិតក្នុងភូមិអន្លង់ស្វាយ ឃុំព្រះរំកិល ស្រុកបុរីអូរស្វាយសែនជ័យ។ ការបាត់បង់នូវវត្តមានសត្វផ្សោតខាងលើ ត្រូវគេចាត់ទុកថាបានបាត់នូវធនធានពូជសត្វមួយប្រភេទដ៏កម្រលើពិភពលោក។
សត្វផ្សោត១ក្បាលនោះ មានទម្ងន់រហូតដល់ទៅ១៨០ គីឡូក្រាម ត្រូវបានគេប្រទះឃើញអណ្តែតទឹកនៅកណ្តាលដងទន្លេមេគង្គ ហើយត្រូវគេសង្ស័យបាត់បង់ជីវិតដោយសារការធ្វើនេសាទ ដោយប្រើឧបករណ៍ល្មើសច្បាប់។ ទោះបីយ៉ាងណានៅមិនទាន់មានការបញ្ជាក់ច្បាស់ពីមូលហេតុនៅឡើយទេ។
ករណីនេះជាករណីថ្មីមួយទៀតបន្ទាប់កាលពីព្រឹកថ្ងៃ២២ ខែមេសា ឆ្នាំ២០២១ ឆ្មាំប៉ុស្ដិ៍អន្លង់ឈើទាលចុះល្បាត បានប្រទះឃើញសត្វផ្សោតមួយក្បាលទម្ងន់១០០គីឡូក្រាម ត្រូវគេប្រទះឃើញងាប់អណ្តែតទឹកស្ថិតនៅភូមិអន្លង់ស្វាយ ឃុំព្រះរំកិល ស្រុកបូរីអូរស្វាយ សែនជ័យនោះដែរ៕ ដោយ ៖ រ៉ូ សាលី
ចែករំលែកព័តមាននេះ