ខេត្តព្រះវិហារ ៖ ទីអារាមមួយកន្លែងដែលទើបកកើតថ្មី ឈ្មោះវត្តមរតកតេជោបុរីស្វារៈ ដែលជាទីអារាមផ្តួចផ្តើមសាងសង់ឡើងដោយរាជរដ្ឋាភិបាលកម្ពុជា ក្រោយពេលបង្កើតភូមិធម្មជាតិសម្តេចតេជោ ស្ថិតក្នុងឃុំស្រឯម ស្រុកជាំក្សាន្ត សម្រេចបាន៩០%ហើយ
ខេត្តព្រះវិហារ ៖ ទីអារាមមួយកន្លែងដែលទើបកកើតថ្មី ឈ្មោះវត្តមរតកតេជោបុរីស្វារៈ ដែលជាទីអារាមផ្តួចផ្តើមសាងសង់ឡើងដោយរាជរដ្ឋាភិបាលកម្ពុជា ក្រោយពេលបង្កើតភូមិធម្មជាតិសម្តេចតេជោ ស្ថិតក្នុងឃុំស្រឯម ស្រុកជាំក្សាន្ត សម្រេចបាន៩០%ហើយ នឹងសាងសង់បញ្ចប់ឆាប់ៗខាងមុខនេះ ។
លោក សួស យ៉ារ៉ា តំណាងរាស្ត្រខេត្តព្រះវិហារ បានថ្លែងក្នុងឱកាសដង្ហែអង្គកឋិនទានរបស់លោក និងអាជ្ញាធរខេត្តព្រះវិហារ រួមជាមួយក្រុមការងារអាជ្ញាធរពិសេសថ្នាក់ជាតិប្រចាំតំបន់ប្រាសាទព្រះវិហារ នៅថ្ងៃទី១៩ ខែវិច្ឆិកា ឆ្នាំ២០១៥ ថា ទីអារាមក៏ដូចជាសមិទ្ធផលជាច្រើន ដែលកកើតឡើងទាំងអស់នេះ ដោយមានការជ្រោមជ្រែងយ៉ាងខ្លាំងពីសំណាក់រាជរដ្ឋាភិបាលកម្ពុជា ខណៈដែលរាជរដ្ឋាភិបាលមានគោលនយោបាយប្តូរទីលំនៅប្រជាជនពីចំណុចភូមិគ១ ឃុំកន្ទួត ស្រុកជាំក្សាន្ត ដែលរស់នៅក្នុងតំបន់អភិរក្ស និងការពារដោយអាជ្ញាធរជាតិព្រះវិហារ ដើម្បីមករស់នៅក្នុងភូមិធម្មជាតិសម្តេចតេជោថ្មី ដែលកកើតឡើងក្នុងឆ្នាំ២០១០កន្លងទៅ ។ លោកក៏បានបញ្ជាក់ទៀតថា ទីអារាមខាងលើដែលកំពុងសាងសង់នៅពេលនេះសម្រេចបានលទ្ធផល ៩០%ហើយ នៅសល់តែ១០%ប៉ុណ្ណោះ នឹងសាងសង់បញ្ចប់នៅដើមឆ្នាំ២០១៦ខាងមុខនេះ និងរង់ចាំការផ្តល់កិត្តិយសដ៏ខ្ពង់ខ្ពស់ពីសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ធ្វើពិធីសម្ពោធដាក់ឲ្យប្រើប្រាស់ជាផ្លូវការក្នុងឆ្នាំ២០១៦នេះ ។
លោក អ៊ុន ចាន់ដា អភិបាលរងខេត្តព្រះវិហារ ជំនួសមុខឲ្យប្រជាពលរដ្ឋទាំងអស់ក្នុងភូមិធម្មជាតិសម្តេចតេជោ បានថ្លែងនូវអំណរគុណដ៏ជ្រាលជ្រៅដល់រាជរដ្ឋាភិបាលកម្ពុជា ដែលបានបង្កើតឡើងនូវសមិទ្ធផលនានាជាច្រើនដូចជា សាលារៀន មន្ទីរពេទ្យ វត្តអារាម ផ្លូវថ្នល់ខ្វាត់ខ្វែង នៅក្នុងភូមិថ្មីខាងលើនេះ ដែលធ្វើឲ្យប្រជាពលរដ្ឋមានភាពងាយស្រួលក្នុងការរស់នៅប្រកបរបរចិញ្ចឹមជីវិតរបស់ពួកគាត់ ។
សូមបញ្ជាក់ថា ការដង្ហែអង្គកឋិនទានខាងលើនេះ ជាលើកទី៦ហើយ ដែលដង្ហែចូលវត្តមរតកតេជោ បុរីស្វារៈ ស្ថិតក្នុងភូមិធម្មជាតិ ឃុំស្រឯម ស្រុកជាំក្សាន្ត ដែលបច្ច័យទាំងអស់បានមកពីការចូលរួមពីបណ្តាសប្បុរសជននានា ទាំងក្នុងនិងក្រៅប្រទេស រួមជាមួយស្ថាប័នរដ្ឋទាំងអស់ក្នុងប្រទេសកម្ពុជា ជាក់ស្តែងបច្ច័យដែលបានមកពីការដង្ហែអង្គកឋិនទាននៅថ្ងៃដែរសរុបចំនួន៩៩៩៩៩ដុល្លារអាមេរិក ៕
ចែករំលែកព័តមាននេះ