ឮគេស្រែកថា «ភ្លើងឆេះ» លោកយាយរើសអេតចាយម្នាក់បានត្រឹមស្ទុះហៅចៅរត់ចេញក្រៅ
- ភ្នំពេញ
រាជធានីភ្នំពេញ ៖ អគ្គិភ័យបានឆាបឆេះផ្ទះប្រជាពលរដ្ឋអស់ចំនួន៣ខ្នង និងសំភារៈប្រើប្រាស់ស្ទើរទាំងស្រុង ដែលហេតុការណ៍នេះ
រាជធានីភ្នំពេញ ៖ អគ្គិភ័យបានឆាបឆេះផ្ទះប្រជាពលរដ្ឋអស់ចំនួន៣ខ្នង និងសំភារៈប្រើប្រាស់ស្ទើរទាំងស្រុង ដែលហេតុការណ៍នេះបង្កឲ្យមានការភ្ញាក់ផ្អើលកើតឡើងកាលពីវេលាម៉ោង៩និង២០នាទីយប់ថ្ងៃទី១១ ខែមិថុនា ឆ្នាំ២០២១ នៅក្នុងសហគមន៍៤ ភូមិដំណាក់ត្រយឹង សង្កាត់ចោមចៅទី២ ខណ្ឌពោធិ៍សែនជ័យ ។
ផ្ទះដែលត្រូវអគ្គិភ័យឆាបឆេះទាំង៣ខ្នងខាងលើ ហើយផ្ទះទាំង៣ខ្នងនោះមានទំហំខុសគ្នា ដោយផ្ទះទី១-ជាផ្ទះដែលមានភ្លើងឆេះមុនគេ មានទំហំ៣ម៉ែត្រគុណ៣ម៉ែត្រ ជាផ្ទះឈើ ប្រក់ស័ង្កសី ផ្ទះទី២-មានទំហំ៥ម៉ែត្រគុណនឹង៤ម៉ែត្រ ជាផ្ទះថ្មខាងក្រោម ឈើលើ ប្រក់ស័ង្កសី (ម្ចាស់ផ្ទះទាំង២ខ្នងនេះមិននៅផ្ទះនោះទេ ហើយក៏មិនស្គាល់ឈ្មោះដែរ) និងផ្ទះទី៣-ជាផ្ទះលោកយាយម្នាក់ អាយុ៧៣ឆ្នាំដែលកំពុងរស់នៅមានទំហំ៤ម៉ែត្រកន្លះគុណនឹង៣ម៉ែត្រ សង់ពីឈើប្រក់សង្ក័សី រងការខូចខាតស្ទើរទាំងស្រុង ។
តាមប្រភពពត៌មានពីលោកយាយជាម្ចាស់ផ្ទះរងគ្រោះឈ្មោះ ស៊ុន រឿន អាយុ៧៣ឆ្នាំ មុខរបរដើររើសអេតចាយ បានអោយដឹងថា ផ្ទះដែលបង្កហេតុមុនគេ គឺផ្ទះដែលនៅកណ្តាលគេ ហើយផ្ទះខាងលើមិនមានមនុស្សរសនៅនោះទេ គឺចាក់សោទុកចោល ចំណែកម្ចាស់ផ្ទះទៅរស់នៅឯក្រុងព្រះសីហនុបាត់ទៅហើយ ។ ចំណែកផ្ទះមួយទៀតនៅបន្ទាប់ក៏មិនមានមនុស្សរស់នៅដែរ ប៉ុន្តែម្ចាស់ឧស្សាហ៍មកលេងម្តងៗ និងទើបមកលេងផងដែរ ។ ចំណែកឯផ្ទះរបស់លោកយាយជាផ្ទះទី៣នៅខាងគេ ។
តាមប្រភពដដែលបានបន្តទៀតថា នៅមុនពេលកើតហេតុ គាត់កំពុងតែដេកជាមួយចៅស្រី ក៏ស្រាប់តែឮសំឡេងប្រជាពលរដ្ឋស្រែកថាភ្លើងឆេះ គាត់ក៏ស្ទុះចេញមក ស្រាប់តែឃើញភ្លើងឆាបឆេះដល់ជញ្ជាំងផ្ទះរបស់គាត់បាត់ទៅហើយ ភ្លាមៗនោះគាត់បានហៅចៅស្រីចេញ មិនបានប្រមូលអីវ៉ាន់បានច្រើននោះទេ គឺត្រូវភ្លើងឆេះខ្ទេចអស់ទៅហើយ ។
តាមប្រភពពត៌មានពីប្រជាពលរដ្ឋនៅកន្លែងកើតហេតុបានអោយដឹងថា ទីតាំងផ្ទះឆេះដើមហេតុមុនគេ ពួកគាត់ដាក់ការសង្ស័យមានក្មេងជក់ថ្នាំញៀ.ននៅទីនោះជាញឹកញាប់ ព្រោះផ្ទះខាងលើគ្មានមនុស្សរស់នៅទេ ពេលដែលកំពុងឆាបឆេះភ្លាមៗ ប្រជាពលរដ្ឋនាំគ្នាជួយពន្លត់ដោយម្នាក់ៗយកធុងមកដួសទឹកជះអណ្តាតភ្លើង ហើយប្រជាពលរដ្ឋមួយចំនួនទៀតបានទាក់ទងទៅសមត្ថកិច្ចហៅរថយន្តពន្លត់អគ្គីភ័យមកជួយពន្លត់ភ្លាមៗ ។
សមត្ថកិច្ចនគរបាលប៉ុស្តិ៍ចោមចៅទី២ បានបញ្ជាក់ទៀតថា ពេលអគ្គីភ័យឆាបឆេះភ្លាមៗ រថយន្តពន្លត់អគ្គីភ័យរបស់ស្នងការរាជធានីភ្នំពេញបានចុះមកជួយអន្តរាគមន៍ភ្លាមៗ ដោយមានរថយន្តពន្លត់អគ្គីភ័យចុះមកជួយពន្លត់ចំនួន៣គ្រឿង និងប្រើរយៈពេលពន្លត់ជាងមួយម៉ោង ទើបភ្លើងរលត់ទាំងស្រុង៕
ចែករំលែកព័តមាននេះ