រាជធានីភ្នំពេញ៖ស្ថិតក្នុងដំណាក់កាលកម្ពុជាក៏ដូចជាពិភពលោកជួបវិបត្តិដោយសារជំងឺកូវីដ១៩ ក្រៅពីធ្វើឱ្យសេដ្ឋកិច្ចមានការធ្លាក់ចុះ ការរស់នៅនិងទម្លាប់របស់ពលរដ្ឋត្រូវបានផ្លាស់ប្តូរជាវេជ្ជមាន ដើម្បីចៀសផុតពីការឆ្លងនៃជំងឺកូវីដ១៩។ ក្នុងនោះសកម្មភាពឬទម្លាប់ធ្វើប្រតិបត្តិការធនាគារមាននិន្នាការកើនឡើងយ៉ាងឆាប់រហ័សតាមរយៈមធ្យាបាយឌីជីថលនៅពេលដែលកូវីដ១៩កំរាមកំហែងដល់សុខភាពសាធារណៈដូចនាពេលសព្វថ្ងៃនេះ។
ប្រធានសមាគមធនាគារបានសង្កេតឃើញថាប្រជាពលរដ្ឋមានការផ្លាស់ប្តូរទម្លាប់អំពីការធ្វើប្រតិបត្តិការធនាគារ ដែលកាលពីមុនកម្ពុជាមិនទាន់មានការឆ្លងឬកើតនូវជំងឹកូវីដ១៩ក្នុងប្រទេស គឺអតិថិជនទៅដកឬដាក់ប្រាក់របស់ខ្លួននៅតាមបញ្ជរ តែមកដល់សព្វថ្ងៃនេះប្រើតាមមធ្យោបាយឌីជីថលរហូតដល់៩០%។
លោកបណ្ឌិត អ៊ិន ចាន់នី ប្រធានសមាគមធនាគារនិងជាប្រធាននាយកប្រតិបត្តិនៃធនាគារអេស៊ីលីដា មានប្រសាសន៍ថា ជំងឺកូវីដ១៩ចូលមក បានធ្វើឱ្យមានការផ្លាស់ប្តូរទម្លាប់អតិថិជន ដែលកាលពីដើមគាត់ចូលមកដកសាច់ប្រាក់នៅតាមបញ្ជរ តែមកដល់ឥលូវគាត់លែងសូវដកតាមនេះហើយ ។នៅពេលសព្វថ្ងៃអតិថិជនដកសាច់ប្រាក់មានប្រមាណតែ១០% ហើយ៩០%ប្រើតាមប្រព័ន្ធឌីជីថល ដែលគេហៅប្រើសេវាស្វ័យប្រតិបត្តិការ, ប្រើតាមMobile Appនិងប្រើតាម ATMជាដើម។តួយ៉ាងនៅធនាគារអេស៊ីលីដាក្នុងមួយខែអតិថិជនធ្វើប្រតិបត្តិការ១០ពាន់លានប្រតិបត្តិការ។
លោកបណ្ឌិតគូសបញ្ជាក់ថា «អតិថិជនធ្វើប្រតិបត្តិការចំនួន១០ពាន់លានប្រតិបត្តិការក្នុងមួយខែៗតាមមធ្យោបាយឌីជីថល។មានន័យថាមួយថ្ងៃៗមានប្រហែល១០០លានប្រតិបត្តិការ រាប់ទាំងការដកនិងដាក់ប្រាក់។៧០%ធ្វើប្រតិបត្តិការនៅបញ្ជរនៃ១០០លានប្រតិបត្តិការនៅបញ្ជរ ហើយ៣០%ឬ៣០លានដុល្លារអាមេរិកធ្វើតាមមធ្យោបាយ ឌីជីថលនិងATM»។
លោកបណ្ឌិតលើកឡើងថា ការធ្វើប្រតិបត្តិការតាមមធ្យាយាយឌីជីថលរួមនិងATM នៅពេលមិនទាន់មានជំងឺកូវីដ១៩(២០១៩)មានប្រមាណ៧០% ប៉ុន្តែចំនួនប្រតិបត្តិការនេះបានកើនដល់៩៣% បើប្រៀបធៀបនាពេលប្រទេសមានជំងឺកូវីដ១៩។ការកើនឡើងនេះដោយសារតែប្រជាពលរដ្ឋមានការប្រុងប្រយ័ត្នឬគិតគូដល់សុខភាព ទើបធ្វើឱ្យការធ្វើប្រតិបត្តិការតាមឌីជីថលកើនយ៉ាងឆាប់រហ័ស។
លោកបណ្ឌិតសង្កត់ធ្ងន់ថា «និន្នាការទៅថ្ងៃខាងមុខ ទម្លាប់នេះនឹងមានជារហូតហើយ ទោះបីស្ថានភាពសង្គមវិលមករកស្ថានភាពដូចដើមក៏ដោយ ក៏ប្រជាជនឬអតិថិជនប្រើប្រាស់នៅមិនដូរទម្លាប់ ព្រោះការប្រើមធ្យោបាយតាមឌីជីថលនេះ បានធ្វើឱ្យគាត់ចំណេញឬសន្សំបាននៅពេលវេលា អីចឹងគាត់មិនចាំបាច់ធ្វើដំណើរមកគ្រឹះស្ថានធនាគារទេបើគាត់មាន Mobile App មាននៅតាមផ្ទះ តាមហាងឬកាន់ជាប់នឹងដៃ»៕
ចែករំលែកព័តមាននេះ