រាជធានីភ្នំពេញ ៖ ក្រសួងសុខាភិបាលកម្ពុជា បានក្រើនរំឮកដល់អភិបាលរាជធានី-ខេត្ត នៅច្រកព្រំដែនទាំងអស់ ពង្រឹងការធ្វើតេស្តរកមេរោគកូវីដ១៩ ដោយឧបកណ៍តេស្តអង់ទីហ្សែនរហ័ស ។
យោងតាមលិខិតមួយច្បាប់របស់លោកម៉ម ប៊ុនហេង រដ្ឋមន្ត្រីក្រសួងសុខាភិបាលបានលោកជំទាវ អភិបាលនៃគណៈអភិបាលរាជធានី-ខេត្តទាំង២៥ ខ្ញុំសូមក្រើនរំលឹកបន្ថែមដើម្បីពង្រឹងការត្រួតពិនិត្យសុខភាពអ្នកដំណើរចូលមកកម្ពុជា ដោយធ្វើតេស្តអង់ទីហ្សែនរហ័ស។
លោករដ្ឋមន្ត្រីបានបញ្ជាក់ថា «ខ្ញុំសូមជម្រាបជូន ឯកឧត្តម លោកជំទាវ អភិបាលនៃគណៈ អភិបាលរាជធានី-ខេត្តទាំងអស់ជ្រាបថា ដើម្បីពង្រឹងការត្រួតពិនិត្យសុខភាពអ្នកដំណើរចូលមកកម្ពុជា តាមច្រកព្រំដែនទាំងផ្លូវអាកាស ផ្លូវគោក និងផ្លូវទឹក ត្រូវធ្វើតេស្តអង់ទីហ្សែនរហ័សឲ្យបានម៉ឺងម៉ាត់ ។
អ្នកជំងឺដែលមានវិជ្ជមានកូវីដ-១៩ ត្រូវបញ្ជូនទៅកាន់មន្ទីរពេទ្យដើម្បីព្យាបាល ចំណែកអ្នកដំណើរផ្សេងទៀត ដែលរួមដំណើរ ជាមួយអ្នកវិជ្ជមានកូដ-១៩ ត្រូវបញ្ជូនទៅកាន់មណ្ឌលចត្តាឡីស័ករយៈពេល ១៤ថ្ងៃ”។ លោកថា អភិបាលខេត្តនៅតាមព្រំដែនថៃ និងវៀតណាម ត្រូវប្រជុំជាមួយសមភាគីថៃ ឬវៀតណាម ដើម្បីស្នើសុំកិច្ចសហការក្នុងការពង្រឹងការធ្វើតេស្តរកមេរោគកូវីដ-១៩ ជូនដល់ពលករនិងប្រជាជនទូទៅ មុននឹងអនុញ្ញាតឲ្យមកកម្ពុជាវិញ៕
ចែករំលែកព័តមាននេះ