វេជ្ជបណ្ឌិតអេស្ប៉ាញម្នាក់ដែលបាត់ខ្លួន២០ឆ្នាំមុន ត្រូវអាជ្ញាធរប្រកាសថាស្លាប់បាត់ទៅហើយ បន្ទាប់ពីគ្មានដំណឹងសោះ ។ គួរឱ្យនឹកស្មានមិនដល់កាលពីពេល ថ្មីៗកន្លងមក វេជ្ជបណ្ឌិតរូបនោះត្រូវប្តី-ប្រពន្ធមួយគូដើរដកផ្សិតប្រទះឃើញរស់នៅក្នុងព្រៃ Tuscany ។
លោកកាឡូស សាន់ឆេស អទីសដេ សាឡាហ្សាគូ មានវ័យ៤៧ឆ្នាំ បាត់ខ្លួនពីផ្ទះក្នុងរាជធានី សេវីល (Seville) ប្រទេសអេស្ប៉ាញ ក្នុងឆ្នាំ១៩៩៦ បន្ទាប់ពីមានជំងឺធ្លាក់ទឹកចិត្តខ្លាំង ។ ក្រុមគ្រួសារបានចំណាយពេលច្រើនឆ្នាំមើលថែរក្សាលោកកាឡូស ប៉ុន្តែគ្មានលទ្ធភាពធ្វើឱ្យលោកប្រសើរឡើង ហើយនៅទីបំផុតបានបោះបង់លោកចោល ។ បន្ទាប់ពីបាត់ខ្លួនលោកកាឡូស នាពេលនោះ អាជ្ញាធរអេស្ប៉ាញបានប្រកាសថាលោកកាឡូស បាត់បង់ជីវិតនៅឆ្នាំ២០១០ ។
ទោះជាយ៉ាងណាក៏ដោយ កាលពីពេល ថ្មីៗកន្លងមក លោកកាឡូសត្រូវគេប្រទះឃើញរស់នៅក្នុងព្រៃជ្រៅប្រទេសអីុតាលី ដោយប្តី-ប្រពន្ធពីរនាក់ដែលជាអ្នកដើររកផ្សិត ។ ប្តី-ប្រពន្ធនោះពីដំបូងឡើយមិននឹកស្មានថាបានជួបមនុស្សទេ ពោលគឺរូបរាងរបស់លោកកាឡូសស្ទើរតែក្លាយជាតាឥសីម្នាក់នៅក្នុងព្រៃដោយមិនកាត់សក់ មានពុកមាត់វែង និងសម្លៀកបំពាក់មិនសមរម្យ ដូច្នេះធ្វើឱ្យពួកគេភ័យខ្លាច និងរត់ចេញទាំងរន្ធត់ ។ ពីរ-បីម៉ោងក្រោយមកពួកគេដើរចូលទៅវិញជាមួយនឹងអ្នកអភិរក្សព្រៃ ហើយលោកកាឡូសស្វាគមន៍ពួកគេដោយនិយាយថា «ខ្ញុំជាជនជាតិអេស្ប៉ាញ និងមានឈ្មោះថា កាឡូស ។ ខ្ញុំរស់នៅទីនេះតាំងពីឆ្នាំ១៩៩៧មកម្ល៉េះ។ ខ្ញុំមិនចង់រស់នៅក្នុងចំណោមហ្វូងមនុស្សនោះទេ តែឥឡូវនេះខ្ញុំចង់ចេញពីទីនេះ» ។
ប្តី-ប្រពន្ធ និងអ្នកអភិរក្សព្រៃបានសួរសំនួរមួយចំនួនដល់លោកកាឡូសចង់ដឹងពីអត្តសញ្ញាណ និងក្រុមគ្រួសាររបស់លោក ។ លោកកាឡូសបានបង្ហាញលិខិតឆ្លងដែនដែលមានរូបថត និងឈ្មោះរបស់លោក ។ ពួកគេបានយកស្មាតហ្វូនថតរូបលោកកាឡូស និងលិខិតឆ្លងដែនទៅបង្ហាញដល់អជ្ញាធរក្នុងតំបន់។ ទីបំផុតអាជ្ញាធរបានទាក់ទងទៅក្រុមគ្រួសាររបស់កាឡូស ។ «នេះហើយគឺជាកាឡូស គេនៅរស់ទេ…» ។ នេះជាសម្តីរបស់ក្រុមគ្រួសារកាឡូសក្រោយពីឃើញរូបថត និងលិខិតឆ្លងដែនរបស់លោក ។
ក្រុមគ្រួសារបានទៅដល់ព្រៃនោះ ហើយបានជួបប្តី-ប្រពន្ធដែលអះអាងថាបានជួបកាឡូសនោះ ។ ទោះជាយ៉ាងណាក្តី ពួកគេបានឃើញត្រឹមតែសម្បកកំប៉ុង និងតង់កញ្ចាស់មួយសម្រាប់ជ្រកកោនប៉ុណ្ណោះ ។ លោកកាឡូសបានរើទៅតំបន់ផ្សេងបាត់ហើយ ដោយមិនដឹងទីតាំងទេ ។ ចំណែកចៅហ្វាយក្រុងតំបន់ស្កាលីណូនិយាយថា «គ្មានសញ្ញាអ្វីពីកាឡូសទេ ។ តើនរណាដឹងថាគាត់ទៅដល់ទីណា » ៕
ចែករំលែកព័តមាននេះ