- សៀមរាប
ខេត្តសៀមរាប៖ ក្នុងរយៈពេល ១០ថ្ងៃ ក្នុងដើមខែមិថុនានេះ នៅខេត្តសៀមរាប ដែលជាតំបន់ទេសចរណ៍ប្រាង្គប្រាសាទអង្គរដ៏ល្បីល្បាញរបស់កម្ពុជា បានឆ្លងរាលដាលជំងឺកូវីដ១៩ ចូលក្នុងសហគមន៍ កើនឡើងរហូតដល់ ២២៣នាក់…
ខេត្តសៀមរាប៖ ក្នុងរយៈពេល ១០ថ្ងៃ ក្នុងដើមខែមិថុនានេះ នៅខេត្តសៀមរាប ដែលជាតំបន់ទេសចរណ៍ប្រាង្គប្រាសាទអង្គរដ៏ល្បីល្បាញរបស់កម្ពុជា បានឆ្លងរាលដាលជំងឺកូវីដ១៩ ចូលក្នុងសហគមន៍ កើនឡើងរហូតដល់ ២២៣នាក់…
ខេត្តសៀមរាប៖ ក្នុងរយៈពេល ១០ថ្ងៃ ក្នុងដើមខែមិថុនានេះ នៅខេត្តសៀមរាប ដែលជាតំបន់ទេសចរណ៍ប្រាង្គប្រាសាទអង្គរដ៏ល្បីល្បាញរបស់កម្ពុជា បានឆ្លងរាលដាលជំងឺកូវីដ១៩ ចូលក្នុងសហគមន៍ កើនឡើងរហូតដល់ ២២៣នាក់ ដោយធ្វើអោយចំនួនសរុបឡើងដល់ ៣៤៤នាក់ នៅក្នុងខេត្តសៀមរាទាំងមូល។ ភាពធ្ងន់ធ្ងរនៃការឆ្លងរាលដាលកូវីដ១៩ នឹងជះឥទ្ធិពល អាក្រក់ដល់វិស័យទេសចរណ៍ ដែលមានសារសំខាន់ ជាអាយុជីវិតនៃខេត្តនេះ ក៏ដូចជាប្រទេសកម្ពុជា។
ដោយពិចារណាទៅលើសារសំខាន់ខ្លាំងនៃខេត្តសៀមរាប សម្រាប់វិស័យទេសចរណ៍ និងសេដ្ឋកិច្ចរបស់ប្រទេស វាតម្រូវអោយមានការចាត់វិធានការមានប្រសិទ្ធភាពបំផុត តាមដែលអាចធ្វើទៅបាន ដើម្បីទប់ស្កាត់ការរាលដាលនៃមេរោគកូវីដ១៩។
រដ្ឋបាលខេត្តសៀមរាប បានប្រកាសថា គិតត្រឹមថ្ងៃទី១០ ខែមិថុនា ឆ្នាំ២០២១ នៅខេត្តសៀមរាប មានអ្នកវិជ្ជមានជំងឺកូវីដ-១៩ សរុបចំនួន ៣៤៤នាក់ បានព្យាបាលជាសះស្បើយចំនួន ១០៦នាក់ ស្លាប់ ២នាក់ និង ២៣៦នាក់ កំពុងសម្រាកព្យាបាល នៅមន្ទីរពេទ្យបង្អែកខេត្តសៀមរាប។
ចំពោះមុខការឆ្លងរាលដាលក្នុងសហគមន៍ទ្រង់ទ្រាយធំនេះ រដ្ឋបាលខេត្តសៀមរាប បានចាត់វិធានការ ឆ្លើយតបបន្ទាន់ តាមរយៈការបិទខ្ទប់តំបន់ឆ្លងទាំងនោះ ធ្វើតេស្តអ្នកពាក់ព័ន្ធ ហើយអ្នករកឃើញឆ្លង នាំយកទៅព្យាបាល និងអ្នកពាក់ព័ន្ធ ត្រូវធ្វើចត្តាឡីស័ក។
រដ្ឋបាលខេត្តសៀមរាប ក៏បានបន្តប្រកាសអំពាវនាវដល់បងប្អូនប្រជាពលរដ្ឋ ដែលបានពាក់ព័ន្ធដោយផ្ទាល់ ឬដោយប្រយោលជាមួយអ្នកវិជ្ជមាន សូមរួសរាន់ធ្វើចត្តាឡីស័ក តាមផ្ទះក្នុងក្រុមគ្រួសាររៀងៗខ្លួន ឱ្យបានគ្រប់ ១៤ថ្ងៃ ដោយមិនត្រូវពាក់ព័ន្ធ និងប៉ះពាល់ជាមួយអ្នកដទៃជាដាច់ខាត ក្នុងករណីមិនអនុវត្តកាតព្វកិច្ចចត្តាឡីស័ក រដ្ឋបាលខេត្ត នឹងចាត់វិធានការផ្លូវច្បាប់ ចំពោះបុគ្គលទាំងឡាយណា ដែលលើ្មសនឹងវិធានសុខាភិបាលនេះ។
នៅពេលរកឃើញអ្នកឆ្លងកើនឡើងកាន់តែច្រើននេះ រដ្ឋបាលខេត្តសៀមរាប កាលពីថ្ងៃទី១០មិថុនា ឆ្នាំ២០២១ បានសម្រេចកំណត់ក្រហម ក្នុងភូមិចំនួនបួននៃសង្កាត់ស្រង៉ែ ក្រុងសៀមរាប និងអំពាវនាវដល់ អ្នកពាក់ព័ន្ធ អនុវត្តការធ្វើចត្តាឡីស័ក ដើម្បីតាមដានសុខភាព និងយកសំណាកធ្វើតេស្តស្រាវជ្រាវមេរោគកូវីដ-១៩។ តំបន់ក្រហម ដែលត្រូវបិទខ្ទប់ថ្មីនេះ គឺភូមិរការធំ ភូមិព្រៃធំ ភូមិចន្លោង និងភូមិស្រង៉ែ ក្នុងសង្កាត់ស្រង៉ែ ក្រុងសៀមរាប ខេត្តសៀមរាប។
កាលពីថ្ងៃទី៩ ខែមិថុនា ឆ្នាំ២០២១ រដ្ឋបាលខេត្តសៀមរាប បានសម្រេចកំណត់ «តំបន់ក្រហម» នៅឃុំកំពង់ឃ្លាំង ស្រុកសូទ្រនិគម «តំបន់លឿងទុំ» នៅឃុំគោកធ្លកក្រោម ស្រុកជីក្រែង និងឃុំដំដែក ស្រុកសូទ្រនិគម និង «តំបន់លឿង» នៅឃុំកំពង់ក្ដី ស្រុកជីក្រែង ក្នុងភូមិសាស្រ្តខេត្តសៀមរាប ដើម្បីទប់ស្កាត់ការឆ្លងរាលដាល ជំងឺកូវីដ-១៩។ ការកំណត់តំបន់ក្រហម តំបន់លឿងទុំ និងតំបន់លឿង ក្នុងឃុំទាំងនេះ ដោយសារតែមានប៉ូលិសនៅអធិការស្រុក និងក្រុមប្រឹក្សាឃុំជាច្រើននាក់ រកឃើញឆ្លងកូវីដ១៩ ចេញពីពិធីជួបជុំជប់លៀងមួយ នៅ ភោជនីយដ្ឋានមួយកន្លែង ក្នុងស្រុកសូត្រនិគម។
ដូច្នេះជារួម ចង់មិនចង់ ការឆ្លងរាលដាលជំងឺកូវីដ១៩ ជាថ្មីទៀត ក្នុងរយៈពេលចុងក្រោយ ឆ្លងចូលក្នុងសហគមន៍ទ្រង់ទ្រាយធំ នៅខេត្តសៀមរាប នៅឃុំមួយចំនួនក្នុងស្រុកសូត្រនិគម ស្រុកជីក្រែង និងនៅសង្កាត់មួយចំនួន នៅក្រុងសៀមរាបនេះ ពិតជាបង្កផលប៉ះពាល់កាន់តែខ្លាំងថែមទៀត លើវិស័យទេសចរណ៍ ដែលរងផលប៉ះពាល់រួចទៅហើយ នៅខេត្តប្រាង្គប្រាសាទប្រវត្តិសាស្ត្រដ៏ល្បីល្បាយរបស់កម្ពុជាយើងនេះ។
ទន្ទឹមនឹងវិធានការឆ្លើយតបបន្ទាន់ មានការបិទខ្ទប់កន្លែងផ្ទុះការឆ្លងរាតត្បាតកូវីដ បិទភូមិ បិទឃុំសង្កាត់ ជាតំបន់ក្រហម តំបន់លឿងទុំ និងតំបន់លឿង រដ្ឋបាលខេត្តសៀមរាបប ក៏បានចុះអនុវត្តផាកពិន័យដល់អាជីវករ នៅក្នុងផ្សារលើធំថ្មី និងបងប្អូនប្រជាពលរដ្ឋ ដែលមិនពាក់ម៉ាស់ និងពាក់មិនបានត្រឹមត្រូវ ដើម្បីរឹតបន្តឹង ក៏ដូចជាការកាត់ផ្តាច់ខ្សែចម្លងជំងឺកូវីដ-១៩ កាលពីថ្ងៃទី៩ ខែមិថុនា ឆ្នាំ២០២១។
ការផ្សព្វផ្សាយពីវិធានការរបស់ប្រមុខរាជរដ្ឋាភិបាល ក៏ត្រូវធ្វើឡើងជាបន្តបន្ទាប់ គឺវិធានការ ៣កុំ និង៣ការពារ។ ៣កុំ គឺកុំនៅបន្ទប់បិទជិត-កុំនៅកន្លែងកុះករ-កុំប៉ះពាល់គ្នា និង ៣ការពារ-ត្រូវពាក់ម៉ាស់-ត្រូវលាងដៃ-ត្រូវរក្សា គម្លាតបុគ្គល។ អាជ្ញាធរខេត្តសៀមរាប ក៏បានផ្សព្វផ្សាយតាមឧឃោសនស័ព្ទ និងការបិទផ្សាយលិខិតប័ណ្ណទៀតផង។
ដូច្នេះនៅពេលនេះ អាជ្ញាធរខេត្ត បានចាត់វិធានការទប់ស្កាត់ និងការពារការឆ្លងរាលដាលរួចហើយ។ ជំហានបន្ទាប់ មានតែប្រជាពលរដ្ឋគ្រប់រូប មិនថា ចាស់ មិនថាក្មេងទេ ត្រូវតែបន្តចូលរួមអនុវត្តតាមវិធានការសុខាភិបាល ទប់ស្កាត់ការឆ្លងកូវីដ។ នោះគឺពាក់ម៉ាស់ រក្សាគម្លាតសុវត្ថិភាពសង្គម និងលាងសម្អាតដៃញឹកញាប់។ បើមិនចាំបាច់ កុំចេញក្រៅផ្ទះ ហើយការធ្វើទេសចរណ៍ ទៅដើរលេងនៅតំបន់ទេសចរណ៍នានា រាប់ទាំងប្រាង្គប្រាសាទអង្គរវត្តយើង ក្នុងអំឡុងពេលនេះ គួរតែផ្អាកសិន។ ចាំដល់កូវីដស្ងប់ស្ងាត់ ចាំយើងដើរលេង ក៏មិនទាន់យឺត ពេលឡើយ។
វិស័យទេសចរណ៍ គឺជាបេះដូងសេដ្ឋកិច្ចរបស់ខេត្តសៀមរាប បើសិនជាខេត្តនេះ នៅតែបន្តមានការរាលដាលខ្លាំងនៃកូវីដ១៩នោះ វានឹងបន្តធ្វើអោយថប់ដង្ហើមសេដ្ឋកិច្ចរបស់ខេត្ត។ វានឹងអាចបន្តធ្វើអោយសណ្ឋាគារ ផ្ទះសំណាក់ និងភោជនីយដ្ឋាន ត្រូវបិទទ្វារ ហើយប្រជាជនជាច្រើន បាត់បង់ការងារ និងមុខរបរ។
ដូច្នេះបើសិនជាយើងចង់ឃើញសេដ្ឋកិច្ច និងវិស័យទេសចរណ៍នៃខេត្តសៀមរាប ឆាប់ក្រោកចេញពីវិបត្តិយ៉ាងឆាប់រហ័ស តាមដែលអាចធ្វើទៅបាននោះ ទាំងអាជ្ញាធរ និងទាំងប្រជាជន ត្រូវតែចាត់វិធានការ និងចូលរួមយ៉ាងមានប្រសិទ្ធភាពបំផុត ដើម្បីគ្រប់គ្រងស្ថានភាពកូវីដ១៩យ៉ាងមានប្រសិទ្ធភាព។ ការចូលរួមក្នុងយុទ្ធនាការចាក់វ៉ាក់សាំង នៅពេលខេត្តសៀមរាប ចាប់ផ្តើមចាក់វ៉ាក់សាំង នាពេលឆាប់ៗខាងមុខ ក៏ជាមធ្យោបាយមួយ ក្នុងការទប់ស្កាត់ និងកាត់ផ្តាច់ការឆ្លងរាលដាលជំងឺកូវីដផងដែរ៕
ចែករំលែកព័តមាននេះ