ខេត្តកំពង់ចាម៖ គ្រោះធម្មជាតិ ភ្លៀងខ្យល់កន្ត្រាក់ ៣លើក បានធ្វើឲ្យលំនៅដ្ឋានរបស់ប្រជាពលរដ្ឋ រងការខូចខាតរបើកដំបូល ជញ្ជាំង ដែលបានកើតឡើងក្នុងអំឡុងខែឧសភា និងមិថុនា នៃដើមរដូវវស្សា បានធ្វើឲ្យលំនៅដ្ឋានប្រជាពលរដ្ឋ នៅតាមបណ្ដាឃុំនានា ក្នុងស្រុកកងមាស ចំនួនជិត ២០០ខ្នង រងការខូចខាត។
ដោយមានការយកចិត្តទុកដាក់ពីសំណាក់ឯកឧត្តម អ៊ុន ចាន់ដា អភិបាលខេត្ត បាននាំយកអំណោយដ៏ថ្លៃថ្លារបស់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ផ្តល់ជូនប្រជាពលរដ្ឋចំនួន ៣៨គ្រួសារ មកពីឃុំចំនួន៣ ក្នុងស្រុកកងមាស ដែលរងការខូចខាតលំនៅដ្ឋាននាកន្លងទៅថ្មីៗ។
សកម្មភាពមនុស្សធម៌នេះ បានធ្វើឡើង នាព្រឹកថ្ងៃទី១១មិថុនា ២០២១។ ជាមួយនោះអាជ្ញាធរ បានឲ្យប្រជាពលរដ្ឋយកចិត្តទុកដាក់បន្ថែមទៀត ចំពោះវិធានការការពានូវគ្រោះមហន្តរាយធម្មជាតិ។
អាជ្ញាធរមូលដ្ឋាន បានឲ្យដឹងថា ក្នុងអំឡុងខែឧសភានិងខែមិថុនា ឆ្នាំ២០២១ កន្លងទៅនេះ ខ្យល់កន្ត្រាក់បានបង្កមហន្តរាយនៅស្រុកកងមាស ដល់ទៅ ៣លើកផ្ទួនៗ បណ្តាលឲ្យប៉ះពាល់ដល់លំនៅដ្ឋានប្រជាពលរដ្ឋសរុបចំនួន ១៨៦ខ្នង។ ក្នុងនោះ ខូចខាតកម្រិតធ្ងន់ ៣៥គ្រួសារ កម្រិតមធ្យម ៦៦គ្រួសារ និងកម្រិតស្រាល ៨៥គ្រួសារ ហើយត្រូវបានសាខាកាកបាទក្រហមកម្ពុជា ខេត្តកំពង់ចាម ផ្តល់ជំនួយមនុស្សធម៌ភ្លាមៗ ជាបន្តបន្ទាប់ ក្រោមវត្តមានឯកឧត្តមប្រធានគណៈកម្មាធិការ និងថ្នាក់ដឹកនាំសាខា ដោយធ្វើឡើងមិនប្រកាន់ពូជសាសន៍ពណ៌សម្បុរ និងនិន្នាការនយោបាយនោះទេ។
មានមតិទៅកាន់ប្រជាពលរដ្ឋ ឯកឧត្តម អ៊ុន ចាន់ដា អភិបាលខេត្ត និងជាប្រធានគណៈកម្មាធិការសខា បានសម្តែងនូវការសោកស្តាយជាពន់ពេក ជាមួយក្រុមគ្រួសាររងគ្រោះទាំងអស់ ចំពោះ មហន្តរាយធម្មជាតិ ដែលកើតឡើងដោយមិននឹកស្មានដល់ បង្កអោយមានការខូចខាត លំនៅដ្ឋានរបស់បងប្អូន ជាមួយនោះអាជ្ញាធរ មិនបានមើលរំលងនោះទេ គឺបានចាត់ចែងតំណាងឱ្យចុះស្រង់ទិន្នន័យនៃការខូចខាតជាបន្ទាន់។
ឯកឧត្តម អ៊ុន ចាន់ដា ក៏បានពាំនាំប្រសាសន៍ផ្តាំផ្ញើសួរសុខទុក្ខពីសំណាក់ឯកឧត្តម ហ៊ុន ណេង ប្រធានកិត្តិយសសាខា ពិសេសសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ដែលតែងតែយកចិត្តទុកដាក់គិតគូរចំពោះសុខទុក្ខប្រជាពលរដ្ឋគ្រប់រូប ជនរងគ្រោះ ជនងាយរងគ្រោះ ដោយមិនរើសអើងឡើយ ហើយតែងបានចាត់តំណាងអោយចុះអន្តរាគមន៍ ផ្តល់ជំនួយសង្គ្រោះ ទាន់ពេលវេលា ស្របតាមទិសស្លោក ” ទីណាមានទុក្ខលំបាក ទីនោះមានកាកបាទក្រហមកម្ពុជា”។
ឯកឧត្តម អភិបាលខេត្ត បានអំពាវនាវ ដល់ប្រជាពលរដ្ឋទាំងអស់ សូមបង្កើនការថែទាំសុខភាព ការពារសុវត្ថិភាពផ្ទាល់ខ្លួនឲ្យបានគ្រប់ៗគ្នា ក្នុងការចូលរួមទប់ស្កាត់ ពីការឆ្លងនៃជំងឺកូវីដ-១៩ ទោះពេលក្នុងការបំពេញការងារ ឬប្រកបរបររកស៊ីផ្សេងៗ ឬទទួលបានការចាក់វ៉ាក់សាំងរួចហើយក្តី ក៏មិនត្រូវធ្វេសប្រហែស ឬមើលស្រាលបានឡើយ។ ជាងនេះទៅទៀត សូមកុំភ្លេចអនុវត្តនូវវិធានសុខាភិបាល និងវិធានការ ” ៣ការពារ និង ៣កុំ ” ឲ្យបានជាប់ជាប្រចាំ រួមនឹងការអនុវត្តន៍កាតព្វកិច្ចពាក់ម៉ាស់, ការលាងសំអាតដៃជាមួយសាប៊ូ ឬអាល់កុល ជែល អោយបានញឹកញាប់ និងកាតព្វកិច្ចរក្សាគម្លាតសុវត្ថិភាពបុគ្គល ស្របតាមសេចក្តីជូនដំណឹងរបស់ក្រសួងសុខាភិបាល ក្នុងអំឡុងពេលនៃការឆ្លងរាលដាល នៃវីរុស កូវីដ-១៩ បម្លែងថ្មី ដ៏កាចសាហាវ កុំឲ្យរីករាលដាលក្នុងសហគមន៍យើង។
ចំពោះអំណោយមនុស្សធម៌ដែលបានផ្ដល់គ្រួសាររងគ្រោះដោយសារខ្យល់កន្ត្រាក់ទាំង ៣៨គ្រួសារ គឺក្នុង ០១គ្រួសារៗទទួលបាន៖ អង្ករ ២៥គក្រ មី ១កេស ទឹកត្រី ១យួរ ទឹកស៊ីអ៊ីវ ១យួរ ត្រីខ ១០កំប៉ុង , ឃីត ១ ( មុង១ ភួយ១ សារុង១ ក្រមា១ )។ ដោយឡែកចំពោះថវិកាគឺបានផ្តល់ជូនតាមកម្រិតខូចខាត គឺ គ្រួសារដែលខូចខាតកម្រិតធ្ងន់ ចំនួន ០៦គ្រួសារ ០១គ្រួសារ ៗផ្តល់ជូនបន្ថែមតង់ ១ និថវិកា ៣០០,០០០ រៀល។ គ្រួសារខូចខាតកម្រិតមធ្យមចំនួន ៣២ គ្រួសារ ០១គ្រួសារៗផ្តល់ជូនថវិកា២០ម៉ឺនរៀល៕ ចាន់ ថេត
ចែករំលែកព័តមាននេះ