រាជធានីភ្នំពេញ ៖ បុរសម្នាក់ដែលតាមការអះអាងពីកន្លែងកើតហេតុថាជាមេការ និងជាសន្តិសុខផ្សារឯករាជ្យ២ ត្រូវបានប៉ូលិសការិយាល័យប្រឆាំងគ្រឿងញៀនរាជធានីភ្នំពេញ សហការជាមួយប៉ូលិសប៉ុស្ដិ៍ចោមចៅ
រាជធានីភ្នំពេញ ៖ បុរសម្នាក់ដែលតាមការអះអាងពីកន្លែងកើតហេតុថាជាមេការ និងជាសន្តិសុខផ្សារឯករាជ្យ២ ត្រូវបានប៉ូលិសការិយាល័យប្រឆាំងគ្រឿងញៀនរាជធានីភ្នំពេញ សហការជាមួយប៉ូលិសប៉ុស្ដិ៍ចោមចៅ ធ្វើការឃាត់ខ្លួនបន្ទាប់ពីស៊ើបដឹងថា បានរកស៊ីជួញដូរ ចែកចាយ និងប្រើប្រាស់គ្រឿងញៀននៅក្នុងផ្សារខាងលើ និងនៅតំបន់ជុំវិញនោះយ៉ាងសកម្មបំផុត ព្រមទាំងដកហូតបានកាំភ្លើងខ្លីម៉ាករ៉ូឡូចំនួន២ដើម និងគ្រាប់ជាង១០គ្រាប់ រួមទាំងវត្ថុតាងគ្រឿងញៀន និងឧបករណ៍ប្រើប្រាស់មួយចំនួនផងដែរ ។
ប្រតិបត្តិការនេះបានធ្វើឡើងកាលពីវេលាម៉ោង៥ និង៣០នាទីល្ងាច ថ្ងៃទី១៨ ខែវិច្ឆិកា ឆ្នាំ២០១៥ នៅក្នុងបន្ទប់លេខ២១៦ ជាន់ទី២ ផ្សារឯករាជ្យ២ ស្ថិតក្នុងភូមិព្រៃព្រីងខាងជើង សង្កាត់ចោមចៅ ខណ្ឌពោធិ៍សែនជ័យ រាជធានីភ្នំពេញ ។
ជនសង្ស័យដែលត្រូវសមត្ថកិច្ចចាប់ខ្លួនឈ្មោះ ឈូក ចំរើន ភេទប្រុស អាយុ៣៥ឆ្នាំ មុខរបរជាមេការ និងជាសន្តិសុខផ្សារឯករាជ្យ២ ស្នាក់នៅក្នុងបន្ទប់ខាងលើ មានស្រុកកំណើតនៅក្នុងភូមិកំពង់ធំ សង្កាត់លេខ៣ ក្រុងស្ទឹងសែន ខេត្តកំពង់ធំ ។
ខណៈពេលចាប់ខ្លួនជនសង្ស័យ សមត្ថកិច្ចដកហូតបានអាវុធខ្លីម៉ាករ៉ូឡូចំនួន២ដើម ដែលក្នុងនោះ១ដើមមានគ្រាប់ចំនួន៦គ្រាប់ និងមានលេខ៥២២៦៣០១៥២៣ និង១ដើមទៀតមានគ្រាប់ចំនួន៥គ្រាប់ មានលេខ៣៨S, កុំព្យូទ័រឡេបថបម៉ាកASUS ១គ្រឿង និងទូរស័ព្ទដៃ៤គ្រឿង ព្រមទាំងឧបករណ៍វេចខ្ចប់គ្រឿងញៀនមួយចំនួនទៀត ។
តាមប្រភពព័ត៌មានបានឲ្យដឹងថា មុនឈានដល់ការឃាត់ខ្លួនជនសង្ស័យខាងលើ កម្លាំងសមត្ថកិច្ច នៃការិយាល័យប្រឆាំងគ្រឿងញៀន ស្នងការដ្ឋាននគរបាលរាជធានីភ្នំពេញ បានធ្វើការស្រាវជ្រាវ ហើយបានទទួលព័ត៌មានពីប្រជាពលរដ្ឋនៅតំនប់នោះដែលបានដឹងពីសកម្មភាពរបស់ជននោះ ដែលបានធ្វើការជួញដូរគ្រឿងញៀនយ៉ាងសកម្មនៅក្នុងផ្សារឯករាជ្យ២ និងតំបន់ជុំវិញនោះ ។ បន្ទាប់ពីទទួលបានព័ត៌មាននោះហើយ កម្លាំងសមត្ថកិច្ចបានចុះសហការជាមួយកម្លាំងប៉ូលិសប៉ុស្ដិ៍ចោមចៅ ចូលទៅធ្វើការឃាត់ខ្លួនជនសង្ស័យ និងបានឆែកឆេរក្នុងបន្ទប់ស្នាក់នៅរកឃើញវត្ថុតាងខាងលើ និងអាវុធដែលដកហូតមានដល់ទៅ២ដើម ដែលសង្ស័យថា ជាអាវុធខុសច្បាប់ទៀតផង ។
ក្រោយពេលចាប់ខ្លួន ជនសង្ស័យ និងវត្ថុតាងដែលដកហូត ត្រូវបាននាំទៅសាកសួរ និងកសាងសំណុំរឿងបញ្ជូនទៅតុលាការចាត់ការតាមច្បាប់ ៕
ចែករំលែកព័តមាននេះ