ខេត្តស្ទឹងត្រែង ៖ បង្គោលដែកពណ៌ក្រហមធំៗត្រូវបានគេប្រើប្រាស់រថយន្តស្ទូចបញ្ឈរឡើងនៅក្នុងបរិវេណរបងថ្មព័ទ្ធជុំវិញ រយៈពេលពីរថ្ងៃកន្លងមកនេះ ដោយមិនដឹងគ្រោងឆ្អឹងសសរដែកនោះ គេធ្វើឡើងសម្រាប់ធ្វើអ្វីនោះឡើយ តែប្រជាពលរដ្ឋក្បែនោះថា ទីតាំងដែលកំពុងដំណើរការសាងសង់ខាងលើ ស្ថិតនៅក្នុងបរិវេណផ្ទះវីឡា អ្នកមានស្តុកស្តំម្នាក់ឈ្មោះ មេ៉ង គង់ ជាថៅកែប្រមូលទិញជ័រទឹកនៅខេត្តស្ទឹងត្រែង។
សំណង់បង្គោលដែកដែលទើបបញ្ឈរសសរឡើងនោះ ស្ថិតនៅភូមិរាជនុកូល សង្កាត់ស្ទឹងត្រែង ឈាងខាងលិចផ្សារគីឡូ២ ក្រុងស្ទឹង
ត្រែង។ ប្រភពពីប្រជាពលរដ្ឋក្បែនោះអោយដឹងថា ពួកគាត់ពិតជាមានការភ្ញាក់ផ្អើល ខណៈសសរដែកខ្ពស់ធំៗបានបញ្ឈឡើងម្តងមួយៗ ជាប់
នឹងរបងផ្ទះពួកគាត់។ ពួកគាត់ភ័យខ្លាចអំពីហានិភ័យតទៅថ្ងៃមុខ ប្រសិនបើគេធ្វើឃ្លាំងដើម្បីស្តុកនិងរក្សាទុកជ័រទឹកនោះ ។
លោក ង៉ែត វីណេត មានលំនៅឋានជាប់របង់សំណង់នោះអោយដឹងថា កាលពីម្សិលមិញថ្ងៃទី៩ មិថុនា ២០២១ លោកបានទៅជូនដំណឹងដល់អាជ្ញាធរសង្កាត់ ហើយក៏៏បានចុះដល់ទីតាំងខាងលើ តែអាជ្ញាធរថា ពុំមានម្ចាស់សំណង់មកសុំច្បាប់ ឬជូនដំណឹងដល់អាជ្ញាធរនោះដែរ ។ទាក់ទិនសំណង់ ខាងប្រជាពលរដ្ឋបានលើកឡើងថា កាលពីពេលកន្លងទៅមានស្ថានីប្រេងសាំង និងហ្គាសក្បែនោះ ដោយសារខុសបច្ចេកទេស បានបង្កជាអគ្គិភ័យកើតឡើងកណ្តាលក្រុង បណ្តាលអោយមនុស្សរងរបួស និងខូចខាតទ្រព្យសម្បត្តិអ្នកជិតខាងផងដែរ ហើយផ្ទះលោក ម៉េង គង់ ក៏៏មានស្តុកជ័រទឹកផងដែរ ពេលនោះ ប្រជាពលរដ្ឋរស់នៅជិតខាងមានការកត់ស្លុតជាខ្លាំង ជាមួយអណ្តាតភ្លើងនិងផ្សែងខ្មួលខ្មាញ់ពណ៌ខ្មៅ ទើបពួកគាត់មានការបារម្ភ បើសិនជាសំណង់នោះជាឃ្លាំងស្តុកជ័រ។
លោក សាយ កុសល អភិបាលក្រុងស្ទឹងត្រែងបានបញ្ជាក់ថា សំណង់នោះមិនដឹងថា ជាសំណង់អ្វីឡើយ ព្រោះមុននិងពេលសាងសង់ពុំមានអ្នកជូនដំណឹងឡើយ ហើយទាក់ទងការសាងសង់នោះគឺពាក់ព័ន្ធខាងមន្ទីរដែនដី នគររូបនីយកម្មនិងសំណង់។
លោក មិញ ស៊ីចាយ ប្រធានមន្ទីរដែនដី នគររូបនីយកម្ម និងសំណង់អោយដឹងថា សំណង់នោះមិនមានអ្នកណាសុំច្បាប់ឡើយពេលនេះ លោកកំពុងចាត់មន្ត្រីជំនាញចុះទៅមើល៍ហើយ។ លោក ម៉េង គង់ ពុំអាចស្វែងរកការបំភ្លឺ ពាក់ព័ន្ធសំណង់ក្នុងបរិវេណផ្ទះរបស់លោកខាងលើនោះទេ។
ព័ត៌មានកោះសន្តិភាពនឹងមានផ្សាយជូនបន្ត ។
ចែករំលែកព័តមាននេះ