ភ្នំពេញ៖ នេះជាការចាប់ផ្តើមថ្មីទៀត ដើម្បីរំដោះចិញ្ចើមផ្លូវពីក្រុមអ្នកលក់ឡាន។ នោះគឺរដ្ឋបាលខណ្ឌដូនពេញ ក្នុងរាជធានីភ្នំពេញ បានសម្រេចដាក់ចេញជាគោលការណ៍ ដោយមិនអនុញ្ញាតឲ្យដាក់តាំងលក់ ឬចតរថយន្តគ្រប់ប្រភេទ នៅលើទ្រូងផ្លូវ និងចិញ្ចើមផ្លូវសាធារណៈជាដាច់ខាត។ អាជ្ញាធរ បានតម្រូវឲ្យក្រុមអ្នកលក់រថយន្ត ត្រូវរើចេញពីចិញ្ចើមផ្លូវក្នុងទឹកដីខណ្ឌដូនពេញ ជាកំហិត ត្រឹមថ្ងៃទី១២ ខែមិថុនា ឆ្នាំ២០២១។
សេចក្តីជូនដំណឹង ស្តីពី ការបញ្ឈប់ការដាក់តាំងលក់រថយន្ត នៅលើទ្រូងផ្លូវ និងចិញ្ចើមផ្លូវសាធារណៈ ក្នុងមូលដ្ឋានខណ្ឌដូនពេញ ចុះថ្ងៃទី៨ ខែមិថុនា ឆ្នាំ២០២១ បង្ហាញថា រដ្ឋបាលខណ្ឌដូនពេញ កន្លងមក បានចុះអនុវត្តការរៀបចំសណ្តាប់ធ្នាប់ និងរបៀបរៀបរយនៅលើទ្រូងផ្លូវ និងចិញ្ចើមផ្លូវសាធារណៈ បានស្អាតជាប្រចាំ។ ប៉ុន្តែនៅក្រោយពេលបញ្ចប់ការបិទខ្ទប់រាជធានីភ្នំពេញមក រដ្ឋបាលខណ្ឌ បានសង្កេតឃើញថា មានបងប្អូនប្រជាពលរដ្ឋមួយចំនួនតូច បានយករថយន្តមកដាក់តាំងលក់នៅលើទ្រូងផ្លូវ និងចិញ្ចើមផ្លូវសាធារណៈ ដែលធ្វើឲ្យបាត់បង់សោភ័ណភាព សណ្តាប់ធ្នាប់ របៀបរៀបរយសាធារណៈ និងបណ្តាលឲ្យមានការកកស្ទះចរាចរណ៍ តាមដងផ្លូវយ៉ាងខ្លាំង។
សេចក្តីជូនដំណឹងរបស់រដ្ឋបាលខណ្ឌដូនពេញ ចុះហត្ថលេខាដោយលោក សុខ ពេញវុធ អភិបាលខណ្ឌ បានលើកឡើងថា ដើម្បីរក្សាបាននូវសណ្តាប់ធ្នាប់ របៀបរៀបរយ សោភ័ណភាព និងជាប្រយោជន៍សាធារណៈ រដ្ឋបាលខណ្ឌដូនពេញ សម្រេចដាក់ចេញជាគោលការណ៍ ៣ចំណុច៖ ១-មិនអនុញ្ញាតឲ្យមានការដាក់តាំងលក់ និងចតរថយន្តគ្រប់ប្រភេទ នៅលើទ្រូងផ្លូវ និងចិញ្ចឹមផ្លូវសាធារណៈ ជាដាច់ខាត ចាប់ពីពេលនេះតទៅ។ ២-រដ្ឋបាលខណ្ឌដូនពេញ ទុកពេល ៣ថ្ងៃ គិតចាប់ពីថ្ងៃជូនដំណឹងនេះ រហូតដល់ថ្ងៃទី១២ ខែមិថុនា ឆ្នាំ២០២១ ដើម្បីឲ្យលោក-លោកស្រីយករថយន្ត ចេញពីទីតាំងខាងលើនេះ ជាកំហិត។ ៣-ក្នុងករណី ម្ចាស់រថយន្ត នៅតែមិនអនុវត្តតាមសេចក្តីជូនដំណឹង ក៏ដូចជាការណែនាំរបស់រដ្ឋបាលខណ្ឌដូនពេញទេ នោះរដ្ឋបាលខណ្ឌដូនពេញ នឹងចុះអនុវត្តវិធានការរដ្ឋបាល ដោយមិនទទួលខុសត្រូវ រាល់ការខូចខាតបាត់បង់ទ្រព្យសម្បត្តិលោក-លោកស្រីឡើយ។
ចំពោះវិធានការថ្មី ដើម្បីរំដោះចិញ្ចើមផ្លូវនេះ ត្រូវបានមហាជន ទាំងអ្នកដំណើរ និងជាពិសេសនៅលើបណ្ដាញសង្គមហ្វេសប៊ុកជាច្រើន បានបង្ហាញការគាំទ្រ ជាខ្លាំង។ ការលុបបំបាត់ការដាក់តាំងឡានលក់នៅលើទ្រូងផ្លូវ និងចិញ្ចើមផ្លូវ គឺមិនត្រឹមតែអាចលើកកម្ពស់សោភ័ណភាព សណ្តាប់ធ្នាប់ របៀបរៀបរយសាធារណៈ កកស្ទះចរាចរណ៍ តាមដងផ្លូវប៉ុណ្ណោះទេ តែមហាជន អាចមានផ្លូវដើរ លើចិញ្ចើមផ្លូវ ជៀសវាងគ្រោះថ្នាក់ចរាចរណ៍ បានថែមទៀត។
គេនៅចាំបានថា កាលពីប៉ុន្មានឆ្នាំមុន គឺអាជ្ញាធរខណ្ឌដូនពេញនេះហើយ ក៏បានចាត់វិធានការ ឈប់ឲ្យដាក់ឡានតាំងលក់លើទ្រូងផ្លូវតាមសួនច្បារចាប់ពីមុខស្ថានីយរថភ្លើង រហូតដល់ផ្សារចាស់ និងតាមផ្លូវនានា នៅជិតវត្តភ្នំ។ វិធានការកាលណោះ ភ្លាមៗ មានប្រសិទ្ធភាព។ តែដល់យូរៗទៅ អ្នកលក់ឡាន របៀបគួកជេ បានចូលមកលក់នៅផ្លូវជិតៗនោះ រាប់ទាំងផ្លូវមុខអតីតសាលាខណ្ឌដូនពេញ ក៏មានអ្នកលក់ឡាន លក់ពេញផ្លូវដែរ។
បន្តិចក្រោយមក រដ្ឋបាលរាជធានីភ្នំពេញ ក៏បានប្រកាសឈប់ឲ្យមានការដាក់តាំងលក់ឡាន តាមផ្ទះល្វែង ពិសេសនៅម្តុំផ្សារដេប៉ូ ដែលការលក់ឡានតាមផ្ទះល្វែងនេះ ក៏បានបង្កការកកស្ទះចរាចរណ៍មិនតិចឡើយ ដោយសារតែឡានទាំងអស់នោះ បានចតលើចិញ្ចើមផ្លូវពេញហើយ ក៏ហៀរដល់ទ្រូងផ្លូវថែមទៀត។ មកដល់ពេលនេះ ការលក់ឡាននៅតាមផ្ទះល្វែង នៅតែបន្តដល់សព្វថ្ងៃ។
យុទ្ធនាការរំដោះចិញ្ចើមផ្លូវពីអ្នកលក់ដូរ ក្នុងរាជធានីភ្នំពេញ ក៏ត្រូវបានអាជ្ញាធររាជធានីភ្នំពេញ បានប្រកាសអនុវត្តយូរឆ្នាំមកហើយ តាំងពីជំនាន់លោក ប៉ា សុជាតិវង្ស ជាអភិបាលរាជធានីភ្នំពេញ និងលោក ឡុង ឌីម៉ង់ ជាអ្នកនាំពាក្យរដ្ឋបាលរាជធានីភ្នំពេញ។ ប៉ុន្តែមកដល់ពេលនេះ ក៏នៅតែមិនអាចសម្រេចបានទាំងស្រុង នៅឡើយដែរ។
លើកនេះទៀត អាជ្ញាធរខណ្ឌដូនពេញ ក៏បានដាក់ផែនការថ្មី រំដោះចិញ្ចើមផ្លូវពីក្រុមអ្នកលក់ឡាន។ វិធានការថ្មីនេះ ពិតជាអាចសម្រេចបាន បើសិនជាអាជ្ញាធរសមត្ថកិច្ច អនុវត្តដូចអ្វីដែលបានអនុវត្តកន្លងមក នៅតាមផ្លូវសួនច្បារស្ពាននាគ អតីតទីលានប្រជាធិបតេយ្យ ឬសួនច្បារផ្សារចាស់ នៅជិតវត្តភ្នំពេញ។
ក៏ប៉ុន្តែទន្ទឹមនឹងវិធានការរៀបចំសណ្តាប់ធ្នាប់របៀបរៀបរយតាមផ្លូវសាធារណៈនេះ អាជ្ញាធរសមត្ថកិច្ច ក៏ត្រូវតែស្អាតស្អំ។ មានន័យថា ការដាក់លក់ឡានតាមផ្លូវកន្លងមក រួមទាំងការយកផ្លូវធ្វើជាកន្លែងផ្ញើឡាន ផ្ញើម៉ូតូ នៅតាមផ្សារ ជាដើម បើសិនជាមិនមានការអនុញ្ញាតពីអាជ្ញាធរសមត្ថកិច្ចទេ ដោយមិនមានការបង់លុយឲ្យអាជ្ញាធរសមត្ថកិច្ចទេនោះ គឺមិនអាចទៅព័ទ្ធខ្សែផ្ញើកង់ម៉ូតូ និងដាក់ឡានលក់លើផ្លូវបាននោះឡើយ។
ម្យ៉ាងវិញទៀត ដើម្បីឲ្យវិធានការរំដោះផ្លូវពីក្រុមអ្នកលក់ឡានបានសម្រេច អាជ្ញាធរសមត្ថកិច្ច ត្រូវតែរៀបចំកន្លែងលក់ឡានសមរម្យណាមួយ ឬច្រើនកន្លែង ហើយតម្រូវឲ្យក្រុមអ្នកនិយមលក់ឡាន តាមផ្លូវទាំងអស់នោះ ចូលទៅលក់ក្នុងឃ្លាំង ដែលរៀបចំទាំងនោះ។ កន្លងមក អាជ្ញាធររាជធានីភ្នំពេញ បានរៀបចំឃ្លាំងលក់ឡាន នៅតំបន់អភិវឌ្ឍន៍ជ្រោយចង្វារ ដែលជាកន្លែងធំទូលាយ។ បើមានកន្លែងលក់ឡានតាមផ្ទះក្នុងក្រុង ក៏គួរតែរៀបចំដោយសណ្តាប់ធ្នាប់ ដោយមិនរំលោភលើចិញ្ចើមផ្លូវ និងទ្រូងផ្លូវទៀតនោះឡើយ។
ការត្រួតពិនិត្យ និងមើលផ្លូវ ក៏អាជ្ញាធរសមត្ថកិច្ច ត្រូវធ្វើជាប្រចាំក្នុងមូលដ្ឋានរបស់ខ្លួន។ បើមានការដាក់លក់ឡានឡើងវិញ នៅកន្លែងដែលហាមឃាត់ ត្រូវចាប់យកឡាន ទៅទុកនៅប៉ុស្តិ៍ប៉ូលិស ក្នុងរយៈពេលកំណត់ណាមួយ ហើយពិន័យម្ចាស់ឡាន ដោយគ្មានការលើកលែង។ អាជ្ញាធរសមត្ថកិច្ចខ្លួនឯង ក៏មិនត្រូវទៅយកលុយ ហើយបិទភ្នែកម្ខាង និងបើកភ្នែកម្ខាង បណ្តោយឲ្យមានការលក់ដូររំលោភចិញ្ចើមផ្លូវ និងទ្រូងផ្លូវតទៅទៀតនោះទេ។
អាជ្ញាធរសមត្ថកិច្ចក្នុងរាជធានីភ្នំពេញ ពិសេសនៅខណ្ឌដូនពេញ បានអនុវត្តមានប្រសិទ្ធភាពរួចមកហើយ លើការរៀបចំសណ្តាប់ធ្នាប់សាធារណៈ។ ចូរកុំភ្លេចថា មានផែនការល្អហើយ គឺត្រូវអនុវត្តផែនការល្អនោះ។ ពេលអនុវត្តផែនការនោះ ក៏ត្រូវតាមដានពិនិត្យលើការអនុវត្ត។ មានកំហុសកន្លែង កែសម្រួល។ បើអនុវត្តបានល្អហើយ ក៏ត្រូវទាមទារឲ្យមានការត្រួតពិនិត្យជាប្រចាំដែរ ទើបកិច្ចការនោះ សម្រេចបានតាមផែនការ៕
ចែករំលែកព័តមាននេះ