រាជធានីភ្នំពេញ ៖ ទោះបីជាកូវីដ១៩ នៅតែជាបញ្ហានិងបង្កជាផលប៉ះពាល់ដល់សេដ្ឋកិច្ច អាជីវកម្មក្ដី តែវិស័យមួយចំនួនដែលទ្រទ្រង់ដល់កំណើនសេដ្ឋកិច្ចកម្ពុជា ត្រូវបានរំពឹងថានឹងមានកំណើនឡើងវិញនៅក្នុងឆ្នាំ២០២១នេះ ។នេះបើតាមព្រឹត្តិប័ត្រស្ថានភាពម៉ាក្រូសេដ្ឋកិច្ចកម្ពុជា ចេញផ្សាយកាលពីដើមសប្ដាហ៍កន្លងទៅនេះ ។
យោងតាមរបាយការណ៍នេះបន្តថាក្នុងឆ្នាំ២០២១នេះ វិស័យអចលនទ្រព្យនិងពាណិជ្ជកម្មត្រូវបានរំពឹងថា នឹងមានកំណើនឡើងវិញក្នុងរង្វង់២,៦ភាគរយ ខណៈឆ្នាំ២០២០កន្លងទៅវិស័យនេះបានធ្លាក់ចុះជាអវិជ្ជមានក្នុងរង្វង់ -៥,១ភាគរយ ក្នុងនោះវិស័យសំណង់រំពឹងថានឹងងើបឡើងវិញ ក្នុងអត្រា ៣,៣ភាគរយ ខណៈឆ្នាំមុនវិស័យសំណង់កម្ពុជាបានធ្លាក់ចុះរហូតដល់-៥,៣ភាគរយ ។
របាយការណ៍ដដែលក៏បានបង្ហាញទៀតថា ការនាំចូលសម្ភារៈសំណង់មកផ្គត់ផ្គង់ក៏ឃើញថាកាលពីឆ្នាំ២០២០កន្លងទៅ មានការធ្លាក់ចុះយ៉ាងខ្លាំងផងដែរ គឺប្រមាណ-១៩,១ភាគរយ ក្នុងនោះការនាំចូលដែកបានធ្លាក់ចុះ -៤២,៣ភាគរយ ការនាំចូលស៊ីម៉ងត៏ធ្លាក់-០,៩ភាគរយ និងការនាំចូលឧបករណ៍ជាងសំណង់ធ្លាក់ចុះ -៩,៧ភាគរយ ។ប៉ុន្តែសម្រាប់ឆ្នាំ២០២១នេះ អាចនឹងមាននឹងកំណើនឡើងវិញ ខណៈការសាងសង់បានចាប់ផ្ដើមបន្តឡើងវិញទោះបីជាមានការរាលដាលនៃកូវីដ១៩ក្ដី ។
ក្រៅពីវិស័យអចលនទ្រព្យ និងពាណិជ្ជកម្ម វិស័យដទៃទៀតក៏រំពឹងថានឹងមានកំណើនឡើងវិញដូចគ្នា ក្នុងនោះវិស័យឧស្សាហកម្មក៏ត្រូវព្យាករថានឹងកើនឡើងវិញក្នុងរង្វង់ ៤,១ភាគរយ ខណៈឆ្នាំមុនវាបានធ្លាក់ចុះ-២,២ភាគរយ ។ វិស័យភោជនីយដ្ឋាននិងសណ្ឋាគារនឹងមានកំណើនឡើងវិញ ក្នុងរង្វង់ ៣,៨ភាគរយស្របពេលឆ្នាំមុនវាបានធ្លាក់ចុះ-៩,៧ភាគរយ ។
បើតាមធនាគារអន្តរជាតិធំពីរប្រចាំកម្ពុជាក៏បានព្យាករពីកំណើនសេដ្ឋកិច្ចរបស់កម្ពុជាក្នុងឆ្នាំ២០២១នេះ ដោយនឹងមានកំណើនឡើងវិញជាវិជ្ជមាន ហើយវិស័យទ្រទ្រង់ដល់សេដ្ឋកិច្ចជាច្រើនក៏នឹងរំពឹងថាកើនឡើងជាវិជ្ជមានដូចគ្នា ។
បើតាមលោកច្រឹក សុខនីមប្រធានសមាគមអ្នកវាយតម្លៃនិងភ្នាក់ងារអចលនវត្ថុកម្ពុជាបានលើកឡើងថា ការវិនិយោគអចលនទ្រព្យនិងសំណង់នៅតែបន្តទោះស្ថិតនៅក្នុងវិបត្តិនិងការរីករាដាលនៃជំងឺកូវីដ១៩ក្ដី តែភាគច្រើននៃអ្នកវិនិយោគលើវិស័យជាវិនិយោគិនក្នុងស្រុកជំនួសឱ្យវិនិយោគិនបរទេស ដែលមិនអាចចូលមកបណ្ដាក់ទុនវិនិយោគនៅក្នុងប្រទេសកម្ពុជានៅពេលថ្មីៗនេះ ក៏ប៉ុន្តែវិនិយោគិនបរទេសជាពិសេសវិនិយោគិនជនជាតិចិន នឹងចូលមកកម្ពុជាដើម្បីស្វែងរកឱកាសវិនិយោគនានាឡើងវិញ ។
លោកបន្តថា វិនិយោគិនចិន នឹងចូលមកស្វែងរកការវិនិយោគទៅលើគម្រោងអចលនទ្រព្យនានា ជាពិសេសគម្រោងវិនិយោគនៅខេត្តព្រះសីហនុ និងខេត្តកោះកុង ព្រោះតំបន់ទាំងពីរនេះ គឺកំពុងមានសក្ដានុពលខ្ពស់ក្នុងការទាក់ទាញវិនិយោគិនទៅលើអចលនទ្រព្យ ៕
ចែករំលែកព័តមាននេះ