រាជធានីភ្នំពេញ ៖ នៅព្រឹកថ្ងៃទី១០ មិថុនា ២០២១ ផ្ទះបណ្តែតទឹក បែចិញ្ចឹមត្រី ផ្ទះតូចៗ និងសំណង់មិនរៀបរយនៅលើផ្ទៃទឹកទន្លេសាប នៅក្នុងមូលដ្ឋានសង្កាត់ព្រែកព្នៅ…
រាជធានីភ្នំពេញ ៖ នៅព្រឹកថ្ងៃទី១០ មិថុនា ២០២១ ផ្ទះបណ្តែតទឹក បែចិញ្ចឹមត្រី ផ្ទះតូចៗ និងសំណង់មិនរៀបរយនៅលើផ្ទៃទឹកទន្លេសាប នៅក្នុងមូលដ្ឋានសង្កាត់ព្រែកព្នៅ ខណ្ឌព្រែកព្នៅ រាជធានីភ្នំពេញ ត្រូវបានម្ចាស់កំពុងតែរុះរើបណ្តើរៗហើយ ចំណែកមួយចំនួនទៀតក៏បានត្រៀមខ្លួន ដោយចាប់ត្រីយកទៅលក់ និងរកផ្ទះជួលរួចដែរ ប៉ុន្តែគេសង្កេតឃើញថា ការរុះរើនោះ គឺមានតែមួយចំនួនតូចតែប៉ុណ្ណោះ ហើយមួយចំនួនធំទៀត ពុំទាន់រុះរើទៅតាមការជូនដំណឹងរបស់អាជ្ញាធរខណ្ឌឡើយ ។ រីឯការរុះរើផ្ទះបណ្តែតទឹកទៀតសោត ក៏បានមកសង់ថ្មីទៀត នៅតាមច្រាំងទន្លេ ទៅវិញ «ម្ចាស់ផ្ទះបណ្តែតទឹក និងបែចិញ្ចឹមត្រីលើផ្ទៃទឹកនៅព្រែកព្នៅកំពុងរុះរើបណ្តើរៗ ហើយមកធ្វើតាមមាត់ច្រាំងវិញ» ។
កាលពីថ្ងៃទី០៧ ខែមិថុនា ឆ្នាំ២០២១ បើតាមការផ្តល់បទសម្ភាសន៍ ជាមួយអ្នកសារព័ត៌មានក្នុងស្រុក ជនជាតិវៀតណាមម្នាក់និយាយថា រស់នៅស្រុកខ្មែរយូរហើយ ហើយថា បើដឹងថា រស់នៅខុសច្បាប់ ចុះកាលពី២០ឆ្នាំមុន ម៉េចមិនដេញ ? មកដេញអីពេលនេះ ។ សូមទស្សនាវីដែអូឃ្លីបដើមទាំងស្រុង មានដូចខាងក្រោម ៖
យោងតាមសេចក្តីជូនដំណឹងរបស់រដ្ឋបាលរាជធានីភ្នំពេញ ដែលចុះហត្ថលេខាដោយលោក ឃួង ស្រេង អភិបាលរាជធានីភ្នំពេញ បានឲ្យដឹងថា កន្លងមកមានជនឱកាសនិយមមួយចំនួន បានលបលួចធ្វើបែចិញ្ចឹមត្រី ផ្ទះបណ្តែតទឹក ផ្ទះតូចៗ និងសំណង់មិនរៀបរយនៅលើផ្ទៃទន្លេ ហើយកន្លែងខ្លះបានប្រែក្លាយជាកន្លែងស្នាក់នៅដោយខុសច្បាប់យ៉ាងអាណាធិបតេយ្យ ដែលបង្កឱ្យបាត់បង់សណ្តាប់ធ្នាប់ ប៉ះពាល់ដល់ផ្លូវនាវាចរ ប៉ះពាល់ដល់ប្រព័ន្ធអេកូឡូហ្ស៊ីមានចរន្តទឹកហូរ គោករាក់ ពិសេសការប្រើប្រាស់ ចំណីសម្រាប់ចិញ្ចឹមត្រី និងការបញ្ចេញកាកសំណល់ ការបន្ទោបង់ពាសវាលពាសកាលក្នុងទន្លេ ធ្វើឲ្យខូចខាតយ៉ាងធ្ងន់ធ្ងរដល់ជីវៈចម្រុះក្នុងទឹក ខូចគុណភាពទឹក បំពុល បរិស្ថាន និងប៉ះពាល់ដល់សោភ័ណភាពរាជធានីភ្នំពេញ ព្រមទាំងប៉ះពាល់ដល់សុខភាព នៃប្រជាពលរដ្ឋដែលបានប្រើប្រាស់ទឹកមិនស្អាតផងដែរ ។
សេចក្តីជូនដំណឹង បានឲ្យដឹងទៀតថា ចំពោះមុខ ដើម្បីរក្សាបរិស្ថាន ជីវៈចម្រុះ គុណភាពទឹក និងលុបបំបាត់បាតុភាពអសកម្មខាងលើ រដ្ឋបាលរាជ ធានីភ្នំពេញ តម្រូវឱ្យម្ចាស់បែចិញ្ចឹមត្រី ផ្ទះបណ្តែតទឹក ម្ចាស់ផ្ទះតូចៗ និងម្ចាស់សំណង់មិនរៀបរយនៅលើផ្ទៃទន្លេទាំងអស់ ត្រូវរុះរើ ឬចល័តចេញជាបន្ទាន់ ដោយទុករយៈ ពេល០១ (មួយ) សប្ដាហ៍ គិតចាប់ពីកាលបរិច្ឆេទចេញសេចក្តីជូនដំណឹងនេះតទៅ ។ ផុតរយៈពេលនេះ រដ្ឋបាលរាជធានីភ្នំពេញនឹងចាត់វិធាន ការរដ្ឋបាលដោយពុំទទួល ខុសត្រូវរាល់ការខូចខាត ឬការបាត់បង់ណាមួយឡើយ ហើយក្នុងករណីរឹងរូស អាជ្ញាធរមូលដ្ឋាន និងមន្ត្រីជំនាញនឹងកសាងសំណុំរឿងបញ្ជូនទៅតុលាការតាមផ្លូវ ច្បាប់។ទន្ទឹមនឹងនេះ រដ្ឋបាលរាជធានីភ្នំពេញស្នើបងប្អូនប្រជាពលរដ្ឋប្តូរទម្លាប់ពីការចិញ្ចឹមត្រីតាមបែលើផ្ទៃទន្លេ នៅភូមិសាស្ត្ររាជធានីភ្នំពេញមកចិញ្ចឹមត្រីតាមស្រះវិញ ៕
ចែករំលែកព័តមាននេះ