ខេត្តបន្ទាយមានជ័យ ៖ ប្រភពពីបន្ទាត់ព្រំដែនក្នុងស្រុកថ្មពួកបានឲ្យដឹងថា កាលពីរសៀលថ្ងៃទី៩ មិថុនា ២០២១ មានពលករប្រុសស្រីចំនួន១០នាក់ ត្រូវបានកម្លាំងប៉ុស្តិប្រាសាទត្បែងនៃនគរបាលការពារព្រំដែនគោកលេខ៨០៧ ធ្វើការទប់ស្កាត់មិនឲ្យឆ្លងដែនខុសច្បាប់ពីក្នុងចំការដំឡូង១កន្លែងជិតព្រំដែនខាងកើតភូមិប្រាសាទត្បែងប្រហែល៣គីឡូម៉ែត្រ ក្នុងឃុំបន្ទាយឆ្មា ស្រុកថ្មពួក ។
ពលករទាំងនេះ មិនត្រូវបានសមត្ថកិច្ចបង្ហាញអត្តសញ្ញាណនៅឡើយទេ ប៉ុន្តែប្រាប់ថា ពួកគេមកពីខេត្តចំនួន៤គឺខេត្តបន្ទាយមានជ័យ,បាត់ដំបង,ពោធិ៍សាត់ និងត្បូងឃ្មុំ ។
ជុំវិញករណីខាងលើ លោកវរសេនីយ៍ឯកឡុង សំណាង មេបញ្ជាការនគរបាលការពារព្រំដែនគោកលេខ៨០៧ប្រាប់តាមទូរស័ព្ទថា កម្លាំងប៉ុស្តិ៍ប្រាសាទត្បែងរបស់លោកពិតជាបានទប់ស្កាត់ពលករប្រុងលួចឆ្លងដែនក្នុងចំការដំឡូងមួយកន្លែង កាលពីរសៀលម្សិលមិញមែន ។ ហើយថាការទប់ស្កាត់នេះ បានធ្វើឡើងតាមគោលដៅនានាជាបន្តបន្ទាប់ ពិសេសគោរពតាមបទបញ្ជាដ៍ម៉ឺងម៉ាត់របស់លោកឧត្តមសេនីយ៍ទោ សិទ្ធ ឡោះ ស្នងការនគរបាលខេត្ត។
លោកបញ្ជាក់ថា ពលករទាំងនេះបានធ្វើការប្រគល់ជូនទៅខាងនគរបាលប៉ុស្តិ៍រដ្ឋបាលដើម្បីសាកសួរបន្ត។លោកវរសេនីយ៍ទោឈឿន គឹមឈុនអធិការនគរបាលស្រុកថ្មពួកប្រាប់តាមទូរស័ព្ទថា ពលករទាំង១០នាក់ខាងលើ ក្រោយទទួលបន្តពីខាងនគរបាលការពារព្រំដែនគោក លោកក៏បានឲ្យខាងជំនាញក្រោមឱវាទសាកសួរ និងធ្វើកំណត់ហេតុបន្ទាប់មកក៏បានអប់រំណែនាំមិនឲ្យឆ្លងដែនខុសច្បាប់ ព្រោះពេលជួបបញ្ហាណាមួយលើទឹកដីគេ និងគ្មានអ្នកទទួលខុសត្រូវឡើយ ហើយបានឲ្យពួកគេធ្វើកិច្ចសន្យាបន្ទាប់មកបានណែនាំឲ្យត្រឡប់ទៅធ្វើចត្តាឡីស័ក
ឯស្រុកកំណើតរៀងខ្លួនៗ៕
ចែករំលែកព័តមាននេះ