កុំលះបង់ជីវិតមួយថ្ងៃៗទៅគិតរឿងឥតប្រយោជន៍ ឬទៅកើតទុក្ខខ្សឹកខ្សួលចំពោះអ្នកមានកិលេសណាម្នាក់នោះ ធ្វើបែបហ្នឹងវាមិនមានតម្លៃអ្វីទេ ហើយក៏កុំចាំបាច់ខឹងស្អប់អី្វ ត្រូវចេះឲ្យអភ័យ កុំចំណាយជីវិតក្នុងរឿងឥតបានការ ត្រូវយកជីវិតមកសងគុណម៉ែឪយើង ឬអ្នកដែលគេធ្លាប់មានគុណដទៃៗទៀតមកលើយើង ធ្វើអ្វីៗឲ្យមានប្រយោជន៍ដល់ខ្លួនឯង ដល់សង្គមជាតិ ព្រះសាសនា កុំបន្ថោកជីវិតខ្លួនឯងឲ្យសោះ មានជីវិតត្រូវតែមានសង្ឃឹមជានិច្ច ។
យើងកើតទាន់ព្រះពុទ្ធសាសនាត្រូវដឹងថា ជីវិតមានតម្លៃណាស់ ស្មើនឹងអរិយមគ្គមានអង្គ៨ជាផ្លូវទៅកាន់ព្រះនិព្វានឯណោះណា ! សូមកុំកាត់ផ្ដាច់ឧបនិស្ស័យរបស់ខ្លួន ត្រូវខិតខំបន្តឧបនិស្ស័យឲ្យបានសម្រេច កុំចាញ់ឧបសគ្គក្នុងជីវិតនេះឡើយ ឧបសគ្គមិនឈ្នះសេចក្ដីព្យាយាមទេ នេះជាដំណើរផ្លូវរបស់យើងម្នាក់ៗ ក្រោកឡើងដើរតទៅទៀត ម្នាក់ឯងក៏ត្រូវតែដើរដែរ គឺត្រូវតែឆ្ពោះទៅមុខជានិច្ចទើបជីវិតមានពន្លឺរស្មី ។
បើនិយាយតាមផ្លូវព្រះពុទ្ធសាសនា ជីវិតមនុស្សយើងទាំងអស់គ្នានេះមានតម្លៃជាងអ្វីៗទាំងអស់ មានតម្លៃត្រង់យើងកើតមកទាន់ព្រះរតនត្រ័យបានធ្វើបុណ្យបំពេញទានដោយបរិបូណ៌ ដូច្នេះគប្បីយកជីវិតទៅបូជាចំពោះព្រះត្រ័យរតន៍ទើបបានសម យកព្រះពុទ្ធ ព្រះធម៌ ព្រះសង្ឃជាទីពឹងទីរឭក នោះជីវិតនឹងបានសុខ ចម្រើនក្នុងលោកទាំងពីរមិនខាន ៕ សាន សារិន
ចែករំលែកព័តមាននេះ