ខេត្តព្រៃវែង ៖ យុវជនកំហូចម្នាកត្រូវបានកម្លាំងនគរស្រុកចាប់ឃាត់ខ្លួនកសាងសំណុំរឿងបញ្ជូនទៅតុលាការ ដោយសារតែរូបគេយករូបប្រដាប់ភេទបាញ់ទៅអោយឪពុកម្ដាយនាងមើល ហើយគំរាមបង្ហោះជាសាធារណៈ បើមិនព្រមលើកនាងអោយគេ ។ យុវជនដែលត្រូវបានចាប់ខ្លួននេះ មានឈ្មោះពោ ពេជ អាយុ១៩ឆ្នាំ ត្រូវបានចាប់ខ្លួន កាលពីថ្ងៃទី៨ មិថុនា នៅនឹងផ្ទះរបស់គេ ក្នុងភូមិតាពូង ឃុំឬស្សីស្រុក ស្រុកពាមជរ ខេត្តព្រៃវែង។
លោកវរសេនីយ៍ឯក ជា ហេង អធិការនគរបាលស្រុកពាមជរបានអោយដឹងថា យោងតាមពាក្យបណ្តឹងរបស់ឪពុកម្តាយក្មេងស្រីរងគ្រោះ បានប្តឹងចោទយុវជនខាងលើថា បានថតរូបប្រដាប់ភេទកូនស្រី ហើយបាញ់រូបនោះទៅអោយឪពុកម្ដាយនាងមើល រួចគំរាមថា«បើមិនលើកកូនអោយគេទេ គេនឹងបង្ហោះរូបនោះចូលក្នុងបណ្តាញសង្គម» ។
ដោយទទួលបានពាក្យបណ្តឹងបែបនេះ ទើបកំលាំងនគរបាល ប៉ុស្តិ៍រដ្ឋបាលឃុំឬស្សីស្រុក ចុះទៅឃាត់ខ្លួនយុវជនខាងលើយកមកសួរនាំ ហើយរូបគេក៏បានឆ្លើយសារភាពថា «ពិតជាបានធ្វើដូចការចោទប្រកាន់មែន»។ លោកអធិការបានបញ្ជាក់ថា តាមចម្លើយរបស់យុវជននេះបានអះអាងថា រូបគេនិងក្មេងស្រីរងគ្រោះមានអាយុ១៧ឆ្នាំ គឺជាសង្សានឹងគ្នា ។ ហើយកន្លងមក រូបគេធ្លាប់បាននាំម្តាយចូលទៅស្តីដណ្តឹងនាងតាមផ្លូវច្បាប់ម្តងរួចមកហើយ ។
ប៉ុន្តែឪពុកម្តាយនាងមិនអោយ ទើបគេខឹងក៏បែកគំនិត លួចថតប្រដាប់ភេទនាង ហើយបាញ់ទៅអោយឪពុកម្ដាយនាងមើល ហើយបង្ខំ អោយ ព្រមលើកកូនអោយគេ ក៏មានរឿងបែបនេះទៅ។ បច្ចុប្បន្ន ជនសង្សយ័ឃាត់ខ្លួននៅស្នងការដ្ឋាននគរបាលខេត្ត ត្រៀមបញ្ជូនទៅតុលាការ ចាត់ការបន្ត។
ចែករំលែកព័តមាននេះ