យុវជន២ក្រុមនាំគ្នាចូលហាងផឹកស៊ីបានមួយសន្ទុះ ផ្អើលកោះពេជ្រ
- ភ្នំពេញ
បើតាមសេចក្តីរាយការណ៍បានឱ្យដឹងថា យុវជន២ក្រុមបាននាំគ្នាចូលទៅផឹកស៊ីក្នុងហាង «ផាំ ខីន» ហើយគ្រាន់តែសម្លឹងមើលមុខគ្នាទៅវិញទៅមក ក៏ក្លាយជា
រាជធានីភ្នំពេញ ៖ បើតាមសេចក្តីរាយការណ៍បានឱ្យដឹងថា យុវជន២ក្រុមបាននាំគ្នាចូលទៅផឹកស៊ីក្នុងហាង «ផាំ ខីន» ហើយគ្រាន់តែសម្លឹងមើលមុខគ្នាទៅវិញទៅមក ក៏ក្លាយជាហិ.ង្សាវាយតប់គ្នាផ្អើលពេញក្នុងហាងតែម្តង រហូតបង្កឱ្យមានការភ្ញាក់ផ្អើលដល់សមត្ថកិច្ចមូលដ្ឋានចុះអន្តរាគមន៍ឃាត់ខ្លួនបានម្នាក់យកទៅសួរនាំ កាលពីវេលាម៉ោង១០និង២០នាទីយប់ ថ្ងៃទី៩ ខែមិថុនា ឆ្នាំ២០២១ នៅត្រង់ចំណុចហាងផឹកស៊ី «ផាំ ខីន» ស្ថិតនៅក្នុងទីក្រុងកោះពេជ្រ សង្កាត់ទន្លេបាសាក់ ខណ្ឌចំការមន។
តាមប្រភពព័ត៌មានពីសមត្ថកិច្ចមូលដ្ឋានបានឲ្យដឹងថា នៅមុនពេលកើតហេតុ គឺមានយុវជនជាក្មេងស្ទាវ២ក្រុម ក្នុងនោះមួយក្រុមមានគ្នា១០នាក់ មានទាំងស្រី ទាំងប្រុស បានចូលទៅផឹកស៊ីជួបជុំគ្នានៅខាងក្នុងហាងកើតហេតុ និងបានអង្គុយតុក្បែរគ្នាថែមទៀតផង។ ខណៈពេលផឹកស៊ីបានមួយសន្ទុះក្រោយមក ក្រុមយុវជនជាក្មេងស្ទាវទាំង២ក្រុមនោះបានមើលមុខគ្នាទៅវិញទៅមក ធ្វើឲ្យក្រុមយុវជនម្ខាងដែលជាភាគីបង្កបានងើបដើរចេញពីតុទៅធ្វើការសួរនាំក្រុមយុវជនម្ខាងទៀតដែលជាភាគីរងគ្រោះ ធ្វើឱ្យបង្កទៅជាហិ.ង្សា រួចវាយតប់គ្នាពេញក្នុងហាងធ្វើឲ្យភ្ញៀវដែលនៅខាងក្នុងហាងរត់ចែកជើងគ្នា និងបណ្តាលឲ្យនារីម្នាក់ដែលជាគ្នីគ្នាក្រុមយុវជនរងគ្រោះរងរបួសពកក្បាលទៀតផង។
សមត្ថកិច្ចបន្តថា ភ្លាមៗនោះ ក៏មានប្រជាពលរដ្ឋបានរាយការណ៍ជូនសមត្ថកិច្ចមូលដ្ឋាន ដើម្បីឲ្យជួយធ្វើការអន្តរាគមន៍។ លុះពេលដែលកម្លាំងសមត្ថកិច្ចមូលដ្ឋានចុះទៅដល់ ក៏បានធ្វើការឃាត់ខ្លួនយុវជនម្នាក់ដែលជាអ្នកបង្ក ចំណែកឯបក្ខពួកជាច្រើននាក់ទៀតបានរត់គេចខ្លួនបាត់ស្រមោលតែម្តង។
តាមសម្តីពីនារីរងគ្រោះបានរៀបរាប់ប្រាប់ទាំងទឹកភ្នែកថា នៅមុនពេលកើតហេតុ នាង និងមិត្តភក្តិប្រុស-ស្រីដែលមានគ្នាជិត១០នាក់ បាននាំគ្នាចូលទៅហូបចុចលេងនៅខាងក្នុងហាងផឹកស៊ីកើតហេតុ។ ពេលចូលហូបចុកកំសាន្តលេងបានមួយសន្ទុះ មិត្តភក្ដិប្រុសម្នាក់ដែលមកជាមួយនាងក៏បានដើរទៅបន្ទប់ទឹក ស្រាប់តែបក្ខពួកក្រុមយុវជនបង្កមាន២ទៅ៣នាក់ក៏បានដើរទៅកៀក.កមិត្តភក្ដិប្រុសរបស់នាងចូលទៅក្នុងបន្ទប់ទឹកនោះតែម្តង។
នារីរងគ្រោះខាងលើបន្តថា លុះពេលទៅដល់ក្នុងបន្ទប់ទឹកហើយ បក្ខពួកក្រុមយុវជនជាក្មេងស្ទាវបង្កទាំងនោះក៏បានសួរទៅមិត្តភក្តិប្រុសនាងថា «ម៉េចក៏ហែងមើលមុខអញម៉េះ ហែងចង់មានរឿងមែន» និងបានគំរាមឲ្យឆាប់ចេញពីហាងកើតហេតុ បើមិនចង់មានរឿង។ បន្ទាប់ពីនិយាយរួច មិត្តភក្ដិនាងក៏បានដើរចេញពីបន្ទប់ទឹកវិញ និងបានប្រាប់គ្នីគ្នាពីសម្តីដែលបក្ខពួកក្រុមក្មេងបង្កបាននិយាយមកកាន់ខ្លួន។ បន្តិចក្រោយមក ដោយពួកនាងមិនចង់មានរឿងរ៉ាវ បំរុងហៅឲ្យគេគិតលុយ ដើម្បីចាកចេញពីហាងនោះ តែមិនទាន់នឹងបានគិតលុយផង ក៏ស្រាប់តែក្រុមក្មេងស្ទាវបង្កទាំងនោះ បាននាំគ្នាមកវាយពួកនាងតែម្តង។
ក្រោយពេលកើតហេតុ យុវជនម្នាក់ដែលជាបក្ខពួកក្រុមក្មេងស្ទាវបង្ក រួមជាមួយភាគីរងគ្រោះត្រូវបានសមត្ថកិច្ចនាំទៅធ្វើការសាកសួរនៅប៉ុស្តិ៍នគរបាលរដ្ឋបាលទន្លេបាសាក់ រួចភាគីទាំង២ក៏បានសម្របសម្រួលមិនប្តឹងផ្ដល់គ្នានោះទេ ហើយសមត្ថកិច្ចក៏បានធ្វើការអប់រំណែនាំ និងបានដោះលែងឲ្យត្រឡប់ទៅផ្ទះវិញតែម្តង៕
ចែករំលែកព័តមាននេះ