រាជធានីភ្នំពេញ៖ បើទោះបីជាស្ថានភាពនៃជំងឺកូវីដ១៩នៅក្នុងប្រទេសកម្ពុជាមិនទាន់បានធូរស្រាលឡើងវិញក្ដី តែរដ្ឋបាលខេត្តកែបបានត្រៀមខ្លួនក្នុងការទទួលភ្ញៀវទេសចរជាតិ និងអន្តរជាតិឡើងវិញនៅក្រោយវិបត្តិកូវីដ ដោយគ្រោងកែលម្អរណីយដ្ឋានឆ្នេរខ្សាច់កម្សាន្តសាធារណៈកម្រិតខ្ពស់ចំនួន២កន្លែងបន្ថែមទៀត ។
យោងតាមកិច្ចប្រជុំមួយកាលពីថ្ងៃទី០៨ មិថុនា ២០២១នេះ លោកសោម ពិសិដ្ឋអភិបាលខេត្តកែប បានឱ្យដឹងថា បើទោះបីជាយើងកំពុងជួបនូវស្ថានភាពប្រយុទ្ធប្រឆាំងនឹងជំងឺកូវីដ-១៩ ក៏ដោយ តែយើងមិនភ្លេចសកម្មភាពអភិវឌ្ឍន៍ខេត្តដែរ ព្រោះខេត្តកែប ជាគោលដៅទេសចរណ៍ ដែលរាជរដ្ឋាភិបាលកំណត់ទិសដៅជាខេត្តទេសចរណ៍សំរាកលំហែរប្រណីតកម្រិតខ្ពស់នាពេលអនាគត ។
លោកបន្តថា ដើម្បីឆ្ពោះទៅសម្រេចបាននូវចក្ខុវិស័យរបស់រាជរដ្ឋាភិបាល យើងត្រូវតែខិតខំបំពេញបន្ថែមនូវសម្បទាទេសចរណ៍ ជាពិសេសទីតាំងសម្រាកលម្ហែ តំបន់ឆ្នេរខ្សាច់កំសាន្ត តំបន់អេកូទេសចរណ៍ ជាដើម។លោកថា៖« ចំពោះមុខ គណៈកម្មារអភិវឌ្ឍតំបន់ឆ្នេរ កំពុងសិក្សាទីតាំងធ្វើការអភិវឌ្ឍន៍កែលម្អរមណីយដ្ឋានឆ្នេរខ្សាច់កម្សាន្តសាធារណៈកម្រិតខ្ពស់ ចំនួនពីរកន្លែងបន្ថែមទៀត ទីមួយគឺទីតាំងឆ្នេរខ្សាច់កំសាន្ត ស្តិតនៅភូមិថ្មី សង្កាត់ព្រៃធំ ក្រុងកែប និងទី២ កែលម្អឆ្នេរខ្យាច់ធម្មជាតិអង្កោល ស្ថិតនៅភូមិអង្កោល ឃុំអង្កោល ស្រុកដំណាក់ចង្អើរខេត្តកែប ទីតាំងទាំងពីរនេះ និងអភិវឌ្ឍន៍ប្រែក្លាយ តំបន់ទេសចរណ៍ដ៏ទាក់ទាញ មានសួនច្បារ ដងផ្លូវធំៗ និងមានគន្លងផ្លូវសម្រាប់ជិះកង់ និងថ្មើជើងផងដែរ» ។
លោកស្នើអោយក្រុមការងារពាក់ព័ន្ធ ត្រូវពន្លឿនសិក្សាទីតាំងនេះអោយបានលឿន និងធ្វើការសហការគ្នាជាមួយក្រុមការងារអន្តរក្រសួង នៃគណៈកម្មការអភិវឌ្ឍតំបន់ឆ្នេរ និងអ្នកពាក់ព័ន្ធគ្រប់លំដាប់ថ្នាក់ ដើម្បីអោយគម្រោងមួយនេះឆាប់ទទួលបានជោគជ័យ ដេីម្បីលើកកម្ពស់គុណភាពទេសចរណ៍ និងជួយអោយប្រជាពលរដ្ឋមានការងារធ្វើបន្ថែមទៀត សំដៅលើកស្ទួយជីវភាពគ្រួសារប្រជាពលរដ្ឋកាន់តែប្រសើរឡើងថែមទៀត។
មួយរយៈចុងក្រោយនេះ ខេត្តកែប ហាក់ទទួលបានភ្ញៀវទេសចរច្រើនបន្ទាប់ពីខេត្តកំពត ហើយអ្នកវិនិយោគជាតិនិងអន្តរជាតិក៏កំពុងសម្លឹងមើលឱកាសវិនិយោគនៅក្នុងទឹកដីនៃឆ្នេរសមុទ្រមួយនេះផងដែរ ដោយបច្ចុប្បន្ន មានអ្នកស្វែងរកទិញដីធ្លីនៅជាប់មាត់សមុទ្រនិងនៅតំបន់ភ្នំដើម្បីត្រៀមអភិវឌ្ឍន៍ជាលំនៅឋានលំហែកាយសណ្ឋាគារ រីសត ជាដើម ។
បើតាមអ្នកជំនាញអចលនទ្រព្យប្រចាំខេត្តនេះ លោកងិន ភារម្យបានឱ្យដឹងថា តាមរយៈគម្រោងអភិវឌ្ឍន៍របស់រដ្ឋបាលខេត្តកែបក្នុងការកែលម្អរមណីយដ្ឋានឆ្នេរខ្សាច់បន្ថែមនេះ នឹងជំរុញឱ្យមានការវិនិយោគបន្ថែមទៀតនៅក្នុងទឹកដីខេត្តជាប់មាត់សមុទ្រមួយនេះ ។
លោកច្រឹក សុខនីមប្រធានសមាគមអ្នកវាយតម្លៃនិងភ្នាក់ងារអចលនវត្ថុកម្ពុជាក៏បានលើកឡើងថា កំពតនិងកែបជាតំបន់រមណីយដ្ឋានក្បែរគ្នា ហើយតំបន់ឆ្នេរនៃខេត្តទាំងនេះកំពុងតែហុចសក្ដានុពលខ្ពស់សម្រាប់ការវិនិយោគ ។
លោកបន្តថា ផ្លូវធ្វើដំណើរពីភ្នំពេញ ទៅកាន់រមណីយដ្ឋាននៃខេត្តទាំងនេះ ក៏បានជួសជុលកែលម្អឡើងវិញបានល្អប្រសើរ ដែលធ្វើឱ្យទេសចរនិងវិនិយោគអាចធ្វើដំណើរបានស្រួលនិងប្រើរយៈពេលខ្លីក្នុងការធ្វើដំណើរផងដែរ ។ នៅពេលអនាគតតំបន់ទាំងនេះ នឹងមានសក្ដានុពលខ្ពស់ក្នុងការវិនិយោគលើលំនៅឋានលំហែកាយ ព្រោះទីតាំងនេះមានទាំងភ្នំ មានឆ្នេរ មានជ្រោះ និងព្រៃឈើច្រើនផងដែរ ៕
ចែករំលែកព័តមាននេះ