រាជធានីភ្នំពេញ ៖ ពិតជាគ្រប់គ្នាសុទ្ធតែកំពុងជួបបញ្ហាហិរញ្ញវត្ថុ គ្មានថវិកាគ្រប់គ្រាន់ រកចំណូលមិនបាន ក៏ព្រោះតែជាង ១ ឆ្នាំកន្លះមកហើយដែលកូវីដ ១៩នៅតែបន្តកូរពិភពលោកឱ្យធ្លាក់ក្នុងសភាពលំបាក ។ បទពិសោធន៍ទាំងនេះបានធ្វើឱ្យមនុស្សជាច្រើនយល់ដឹងអំពីហានិភ័យ និងបញ្ហាសន្សំប្រាក់ ។ បើដូច្នេះ សូមស្តាប់ការបកស្រាយរបស់អ្នកជំនាញ អំពីហានិភ័យមិនសន្សំប្រាក់ និងសន្សំហើយតែនៅតែមានហានិភ័យ ។
លោក ង៉ែត ជូ អ្នកជំនាញផ្នែកសេដ្ឋកិច្ច និងជាអ្នកប្រឹក្សាឯករាជ្យ ថ្មីៗនេះបានប្រាប់សារព័ត៌មាន «កោះសន្តិភាព» ដូចនេះថា ក្នុងសម័យថ្មីដែលសេដ្ឋកិច្ចសាកលពោរពេញទៅដោយភាពមិនប្រាកដប្រជា មនុស្សជាច្រើនប្រឈមនឹងហានិភ័យហិរញ្ញវត្ថុធំៗចំនួន ៣ ដូចខាងក្រោម ៖
ហានិភ័យទី ១ មិនសន្សំប្រាក់ ៖
មនុស្សយើងម្នាក់ៗអ្វីដែលយើងមាន គឺនៅពេលដែលយើងចេញពីសាលា អ៊ីចឹងមានតែកម្លាំងកាយកម្លាំងប្រាជ្ញាទេ ដែលអាចយកទៅបំពេញការងារដើម្បីបានចំណូល ជាទូទៅ គឺសំដៅទៅលើអ្នកដែលមិនមានជាទ្រព្យសម្បត្តិ ឬកេរ្តិ៍ដែលបានមកពីឪពុកម្តាយចែកឱ្យ ។ ដូចនេះប្រសិនបើពេលដែលមានកម្លាំ មានប្រាជ្ញា អាចនៅធ្វើការកើត ហើយមានចំណូលនោះត្រូវសន្សំតាមលទ្ធភាពដែលអាចធ្វើទៅបាន ព្រោះថា អ្វីមួយកើតឡើង ឧទាហរណ៍ថា នៅពេលយើងបាត់បង់សមត្ថភាព ឬមានគ្រោះផ្សេងៗដោយប្រការណាមួយ ឬក៏ក្រុមហ៊ុនដែលយើងកំពុងធ្វើសព្វថ្ងៃប្រកាសក្ស័យធន់ នោះភ្លាមៗយើងនឹងបាត់សេដ្ឋកិច្ច ដូចនេះភ្លាមៗពិបាករកជំនួយណាស់ ។ ដូចនេះប្រសិនបើយើងមានប្រាក់សន្សំខ្លះ នោះយើងអាចមានថវិកាដោះស្រាយបានមួយគ្រានឹង ។
ហានិភ័យទី ២ សន្សំប្រាក់ដែរ ប៉ុន្តែមិនវិនិយោគ ៖
ត្បិតតែការសន្សំប្រាក់ជាការចាំបាច់ ប៉ុន្តែនៅពេលយើងសន្សំទៅ ដោយមិនបានប្រើប្រាស់ ដើម្បីឱ្យប្រាក់នោះបង្កើតប្រាក់មកវិញ ដូចនេះអាចនិយាយបានថា តម្លៃនៃលុយសន្សំរបស់យើងនឹងវាកាន់តែធ្លាក់ចុះរៀងរាល់ឆ្នាំ ។ នៅក្នុងប្រទេសកម្ពុជា ជាមធ្យមប្រហែលជា ៣ ភាគរយ មានន័យថា ១០០ ដុល្លារនៅឆ្នាំនេះ ដើម្បីទិញទំនិញបាននៅឆ្នាំក្រោយ អ៊ីចឹងទាល់តែមានលុយ ១០៣ ដុល្លារ មានន័យថា លុយធ្លាក់ថ្លៃ ៣ ភាគរយក្នុងមួយឆ្នាំៗ និងទំនិញឡើងថ្លៃ ។ ដូចនេះប្រសិនបើគ្រាន់តែសន្សំមិនបានចំណូលបន្ថែម ឬមិនកើតការប្រាក់ នោះជាហានិភ័យមួយដែរ ។ ពេលខ្លះយើងសន្សំដែរ ប៉ុន្តែវាមិនទាន់គ្រប់គ្រាន់ ហើយភ្លាមៗមានបញ្ហាបាត់បង់សមត្ថភាពពលកម្ម ឬបាត់បង់ប្រាក់ចំណូលនោះវានឹងធ្វើឱ្យយើងមានបញ្ហាផងដែរ ។
ហានិភ័យទី ៣ សន្សំ និងវិនិយោគ ប៉ុន្តែខ្វះចំណេះដឹង និងបញ្ញា ៖
អ្វីដែលសន្សំបានហើយយកទៅវិនិយោគដែរ ប៉ុន្តែការសន្សំដើម្បីវិនិយោគនឹងគឺខ្វះបញ្ញា ខ្វះចំណេះដឹង មិនចេះប្រើប្រាក់ឱ្យវាមានប្រសិទ្ធិភាព ឧទាហរណ៍ថា ត្រូវទទួលរងការបោកប្រាស់ពីអ្នកដទៃ ដូចគ្រប់គ្នាបានដឹងហើយថ្មីៗនេះ មានជាបញ្ហាច្រើនណាស់រឿងដាក់ហ៊ុនរកស៊ី ឬវិនិយោគជាដើម ទាំងនេះហើយដែលទាក់ទងនឹងបញ្ញា និងចំណេះដឹងដឹង ។ នៅក្នុងព្រះពុទ្ធសាសនា លោកថា អវិជ្ជាជាប្រភពនៃសេចក្តីទុក្ខ ធ្វើអ្វីក៏ដោយមិនថាទាំងការវិនិយោគ ទាំងការធ្វើការងារធម្មតាទេ ឬការគ្រប់គ្រងដឹកនាំគ្រួសារ សុទ្ធតែត្រូវការបញ្ញាទាំងអស់ ។ ដូចនេះការងារអ្វីក៏ដោយប្រសិនបើយើងមិនមានចំណេះដឹង យើងយកទៅវិនិយោគឆៅៗមិនបានទេ បញ្ញាធ្វើឱ្យយើងចេះគិត សេពគប់នរណាមានប្រយោជន៍ ប្រើលុយយ៉ាងម៉េចទើបវាមិនខាតបង់ ចេះវាយតម្លៃសមត្ថភាពគ្រប់គ្រងរបស់ក្រុមហ៊ុនដែលយើងចង់វិនិយោគជាមួយ ។ លោក ង៉ែត ជូ បានបន្ថែមថា គួរឈប់យល់ច្រឡំថា ការទិញផ្ទះពេលបច្ចុប្បន្នទុកលក់យកចំណេញ ឬទុកជួលថា ជាការវិនិយោគ ៕
ចែករំលែកព័តមាននេះ