ខេត្តបាត់ដំបង ៖ កម្លាំងចម្រុះប្រចាំគោលដៅព្រំប្រទល់ស្រុកមោងប្ញស្សី និងស្រុកបាកាន ខេត្តពោធិសាត់ ផ្លូវជាតិលេខ៥ បានឃាត់រថយន្តដឹកអ្នកដំណើរមួយគ្រឿង កាលពីយប់ថ្ងៃទី០៨ មិថុនា ដើម្បីត្រូតពិនិត្យ ហើយបានធ្វើតេស្តរហ័សរកឃើញអ្នកដំណើរម្នាក់មាន« វិជ្ជមានកូវីដ១៩»។ រីឯអ្នករួមដំណើរចំនួន២០នាក់ រាប់ទាំងអ្នកបើកបររថយន្តបានជាប់ពាក់ព័ន្ធនឹងអ្នកជំងឺនោះ។
មន្ត្រីប្រចាំគោលដៅបានឱ្យដឹងថា រថយន្តដឹកអ្នកដំណើរនោះរបស់ក្រុមហ៊ុន«ជីអេហ្វធី» ដឹកអ្នកដំណើរពីរាជធានីភ្នំពេញ ឆ្ពោះមកកាន់ខេត្តបាត់ដំបង តែត្រូវបានកម្លាំងប្រចាំគោលដៅខាងលើ កាក់ត្រូតពិនិត្យសុខភាពទាំងយប់។ មន្ត្រីដដែលបាននិយាយថា នៅពេលក្រុមគ្រួពេទ្យធ្វើតេស្តរហ័ស គេបានរកឃើញយុវជនម្នាក់ឈ្មោះ ចិន ជឿត អាយុ២៣ឆ្នាំ រស់នៅភូមិជ្រៃរុន ឃុំប្ញស្សីក្រាំង ស្រុកមោងប្ញស្សី មាន«វិជ្ជមានកូវីដ១៩» រីឯអ្នករួមដំណើរចំនួន២០នាក់ទៀត រាប់ទាំងអ្នកបើកបររថយន្តផង បានជាប់ពាក់ព័ន្ធនឹងអ្នកជំងឺ ហើយត្រូវបានក្រុមការងារសម្រេចឲ្យ
ចត្តាឡីស័កទាំងអស់។
ជាមួយនឹងការរកឃើញអ្នកដំណើរឆ្លងកូវីដ១៩ម្នាក់ខាងលើនេះ លោក ទេព ហន អភិបាលស្រុកមោងប្ញស្សីបានថ្លែងថា ក្រោយពីមន្ត្រីសុខាភិបាលរកឃើញអ្នកដំណើរម្នាក់ មានឆ្លងកូវីដ១៩ យើងបានបញ្ជូនអ្នកធ្វើដំណើរទាំងអស់ ទៅកាន់មណ្ឌលចត្តាឡីស័កនៅអនុវិទ្យាល័យមោងឬស្សីភ្លាមៗ។ លោកអភិបាលស្រុករូបនេះ បានប្រាប់ពីប្រវត្តិ អ្នកឆ្លងកូវីដ១៩ ឈ្មោះ ចិន ជឿត ក្រោយពីបានសាកសួរជំហានដំបូងថា យុវជនរូបនេះបានទៅលេងបងប្អូន នៅភ្នំពេញប្រហែលកន្លះខែកន្លងមកនេះ ហើយពេលត្រឡប់មកវិញជិះរថយន្តដឹកអ្នកដំណើរខាងលើ មកដល់ត្រិមគោលដៅត្រួតពិនិត្យ ស្រុកមោងឬស្សី ត្រូវកម្លាំងសមត្ថកិច្ចកាក់ត្រូតពិនិត្យសុខភាពក៍រកឃើញមានវិជ្ជមានកូវីដ១៩តែម្ដង។
លោក ទេព ហន បានបញ្ជាក់ថា ក្នុងចំណោមអ្នកធ្វើដំណើរទាំងអស់ រួមទាំងអ្នកបើកបរម្នាក់ផងមាន១៥នាក់ ត្រូវបានដាក់ឲ្យធ្វើចត្តាឡីស័ក តែអ្នកវិជ្ជមានកូវីដ១៩ម្នាក់ ត្រូវដាក់ព្យាបាលដោយឡែក នៅក្នុងមណ្ឌល អនុវិទ្យាល័យមោងឬស្សី ។ ចំណែក៥នាក់ទៀត មានទាំងអ្នកបើកបរម្នាក់ផង ត្រូវបានអនុញ្ញាតឲ្យបន្តដំណើរ ព្រោះពួកគេមានប័ណ្ណចាក់វ៉ាក់សាំងការពារ តែតម្រូវឲ្យធ្វើចត្តាឡីស័កនៅផ្ទះរៀងៗខ្លួន។
សូមបញ្ជាក់ផងដែរថា សម្រាប់ខេត្តបាត់ដំបង គិតមកត្រឹមថ្ងៃទី០៨ខែមិថុនា សមរភូមិកូវីដ១៩ បានរកឃើញអ្នកឆ្លងជំងឺកូវីដ១៩ សរុបចំនួន៤៤៣នាក់ហើយ ក្នុងនោះ មានអ្នកជំងឺចំនួន១៦២នាក់បានជាសះស្បើយ រីឯអ្នកជំងឺ០២នាក់បានស្លាប់ ខណ:អ្នកជំងឺចំនួន២៧៩នាក់កំពុងសម្រាកព្យាបាលនៅឡើយ៕
ចែករំលែកព័តមាននេះ