ជំនួបជើងទី២ វគ្គជម្រុះពានរង្វាន់ World Cup 2022 នៅបារ៉ែន កម្ពុជាចាញ់អ៊ីរ៉ាក់ ១-៤
បារ៉ែន ៖ ក្រុមជម្រើសជាតិកម្ពុជា នៅតែពុំទាន់ស្គាល់ជ័យជម្នះក្នុងការប្រកួតជម្រុះពានរង្វាន់បាល់ទាត់ពិភពលោក FIFA World
បារ៉ែន ៖ ក្រុមជម្រើសជាតិកម្ពុជា នៅតែពុំទាន់ស្គាល់ជ័យជម្នះក្នុងការប្រកួតជម្រុះពានរង្វាន់បាល់ទាត់ពិភពលោក FIFA World Cup 2022 ពូល C ឡើយ បន្ទាប់ពីបន្ដបរាជ័យក្រោមថ្វីជើងក្រុមខ្លាំងអ៊ីរ៉ាក់ ដោយលទ្ធផល ៤-១ មុននេះបន្ដិច នៅកីឡដ្ឋាន Al Muharraq នាប្រទេសបារ៉ែន ។
ជំនួបជើងទី២ លើទឹកដីកណ្ដាលនេះ ក្រុមឈរចំណាត់ថ្នាក់ពិភពលោកលេខ ៦៨ អ៊ីរ៉ាក់ បានស៊ុតនាំមុខកម្ពុជា ១គ្រាប់មុន តាំងពីនាទីទី១ ដោយកីឡាករ Ali Mohanad មុនពួកគេបន្ថែម ២គ្រាប់ទៀត ដោយកីឡាករ Bashar Resan និងកីឡាករ Ali Adnan នៅនាទី២៤ និងនាទី២៧ ។
ចូលដល់តង់ទី២ ក្រុមគោព្រៃកម្ពុជា បានសហការគ្នាកាន់តែល្អប្រសើរ រហូតវាយបកបាន ១គ្រាប់វិញ នៅនាទី៥៥ ដោយខ្សែការពារ សឿយ វិសាល ។ អ្វីដែលពិសេស គេឃើញលោក Keisuke Honda អ្នកចាត់ការទូទៅក្រុមជម្រើសជាតិកម្ពុជា បានផ្ដល់ឱកាសឲ្យកីឡាករវ័យក្មេងជាច្រើនរូប បង្ហាញខ្លួនក្នុងការប្រកួតដ៏ធំនេះ ពិសេសកីឡាករវ័យ ១៧ឆ្នាំ ឡេង ណូរ៉ា ។
ប៉ុន្ដែគួរឲ្យសោកស្ដាយនៅចុងម៉ោង បន្ទាប់ពីការលើកបាល់ជ្រុង បានបង្កឱកាសឲ្យកីឡាករ Safaa Hadi តែតបំប៉ោងសំណាញ់ទីក្រុមជម្រើសជាតិកម្ពុជា ១គ្រាប់ទៀត នៅនាទី៩០+៣ ហើយអាជ្ញាកណ្ដាលក៏ផ្លុំកញ្ចែបញ្ចប់ការប្រកួត ដោយជ័យជម្នះបានទៅក្រុមជម្រើសជាតិអ៊ីរ៉ាក់ ក្នុងលទ្ធផលបច្ចេកទេស ៤-១ តែម្ដង ៕
នេះគឺជាបរាជ័យលើកទី៦ ក្នុងចំណោម ៧ប្រកួតរបស់ក្រុមគោព្រៃកម្ពុជា បន្ទាប់ពីប្រកួតបើកឆាកពូល C ស្មើក្រុមភ្ញៀវហុងកុង ១-១ កាលពីដើមខែកញ្ញា ឆ្នាំ២០១៩ ។ ប៉ុន្ដែមុនត្រឡប់មកមាតុភូមិវិញ ក្រុមជម្រើសជាតិកម្ពុជា នៅសល់ការប្រកួតបង្គ្រប់កិច្ចវគ្គជម្រុះពានរង្វាន់បាល់ទាត់ពិភពលោក ១ប្រកួតទៀត ដោយត្រូវជួបក្រុមខ្លាំងអ៊ីរ៉ង់ នារាត្រីថ្ងៃទី១១ ខែមិថុនាខាងមុខ នៅប្រទេសបារ៉ែនដដែល ៕
ចែករំលែកព័តមាននេះ