រាជធានីភ្នំពេញ ៖ រោងចក្រហ្គ្រេនធ្វីន អ៊ីនធើណេសិនណល(ខេមបូឌា) ភីអិលស៊ី ហៅរោងចក្រ QMI ត្រូវបានក្រុមគ្រូពេទ្យស្ម័គ្រចិត្តសម្តេចតេជោ រកឃើញកម្មករកម្មការីនីវិជ្ជមានកូវីដ១៩ ជាបន្តបន្ទាប់ ចំនួន២៩៦នាក់ ក្នុងរយៈពេល៣ថ្ងៃ ។
បន្ទាប់ពីផ្ទុះកូវីដរោងចក្របានជូនដំណឹងអោយកម្មករកម្មការីនីឈប់សំរាកចំនួន២ថ្ងៃផងដែរ ។ រោងចក្រហ្គ្រេនធ្វីន អ៊ីនធើណេសិនណល(ខេមបូឌា)ភីអិលស៊ី ហៅរោងចក្រQMI ជារោងចក្រកាត់ដេរសំលៀកបំពាក់ដ៏ធំមួយ ស្ថិតនៅទីប្រជុំជន និងផ្សារក្នុងភូមិ ត្រពាំងពោធិ៍ សង្កាត់ចោមចៅទី៣ ខណ្ឌពោធិ៍សែនជ័យ រាជធានីភ្នំពេញ ដែលមានកម្មករកម្មការីនីប្រមាណជិត៤ពាន់នាក់ ។
តាមអាជ្ញាធរមូលដ្ឋានបានអោយដឹងថា រោងចក្រកាត់ដេរនេះត្រូវបានក្រុមគ្រូពេទ្យរកឃើញកម្មករ វិជ្ជមានកូវីដ១៩ ជាបន្តបន្ទាប់ ហើយចាប់ផ្តើមធ្វើតេស្តជាទ្រង់ទ្រាយធំលើកម្មករ កម្មាការីនីទាំងអស់ក្នុងរយៈពេល៣ថ្ងៃ រកឃើញមានវិជ្ជមានចំនួន២៩៦នាក់ ។
តាមព័ត៌មានអោយដឹងទៀតថា នៅក្នុងរយៈពេល២ថ្ងៃដំបូង គីថ្ងៃទី០៤ និង០៥ ខែមិថុនា រោងចក្របានអោយកម្មករកម្មការីនីទៅធ្វើតេស្ត នៅព្រៃទា រកឃើញចំនួន៨២នាក់ ។
ដោយឡែក នៅថ្ងៃទី០៦ ខែមិថុនាម្សិលនេះ ក្រុមគ្រូពេទ្យ បានយកសំណាកធ្វើតេស្តនៅក្នុងទីតាំងរោងចក្ររហូតដល់យប់ជ្រៅ ហើយបានរកឃើញវិជ្ជមានកូវីដ១៩ ចំនួន២១៤នាក់ ក្នុងចំណោមអ្នកធ្វើតេស្តចំនួន២៨១១នាក់។
នៅរសៀលថ្ងៃទី០៦ ខែមិថុនានេះ បង្កអោយមានការភ្ញាក់ផ្អើល យ៉ាងខ្លាំង ខណៈពេលដែលរថយន្តជាច្រើនគ្រឿងបានចេញចូលដឹកអ្នកជំងឺយកទៅព្យាបាលនៅដឺព្រេមៀរ សិនធើសែនសុខ រហូតដល់ម៉ោងប្រមាណជិត១២យប់ទើបអស់ ។
សរុបទាំងអស់ អ្នកវិជ្ជមានដែលរកឃើញ នៅក្នុងរោងចក្រហ្គ្រេនធ្វីន អ៊ីនធើណេសិនណល(ខេមបូឌា)ភីអិលស៊ី ហៅរោងចក្រ QMI នេះចំនួន២៩៦នាក់ ។ បន្ទាប់ពីផ្ទុះវិជ្ជមានជាទ្រងទ្រាយធំនៅព្រឹកថ្ងៃទី០៧ ខែមិថុនា ឆ្នាំ២០២១នេះ រោងចក្រក៏បានជូនដំណឹង អោយកម្មករ កម្មការីនី ឈប់សំរាកចំនួន២ថ្ងៃ (ថ្ងៃច័ន្ទ , អង្គារ) ទី៧,៨ ហើយចូលធ្វើការវិញ នៅថ្ងៃពុធទី០៩ ខែមិថុនា ឆ្នាំ២០២១ ។
ទន្ទឹមនោះ អាជ្ញាធរនៅព្រឹកថ្ងៃទី០៧ ខែមិថុនានេះដែរ អាជ្ញាធរភូមិ សង្កាត់ ក៏បានស្រាវជ្រាវ រកអ្នកពាក់ព័ន្ធដោយផ្ទាល់ និងប្រយោល ដើម្បីចលនា អោយទៅយកសំណាក់នៅភូមិក្បាលដំរី សង្កាត់កាកាប២ ខណ្ឌ ពោធិ៍សែនជ័យ ។
តាមអាជ្ញាធរ បានអោយដឹងថា លោកមានការលំបាកខ្លាំងណាស់ ក្នុងការរកអ្នកពាក់ព័ន្ធព្រោះកម្មករកម្មការីនី ដែលមានវិជ្ជមានទាំងនោះ ស្នាក់នៅពុំពិតប្រាកដនៅតាមផ្ទះជួលខ្លះ នៅក្បែររោងចក្រនិងខ្លះទៀតនៅតំបន់ឆ្ងាយៗ ។
ម្យ៉ាងទៀត ពុំដឹងអោយប្រាកដថា កម្មករ ទាំងនោះបានទៅប៉ះពាល់ជួបប្រាស្រ័យទាក់ទងជាមួយបងប្អូនមិត្តភក្កិ នៅទីណាខ្លះ ឡើយ ? ៕
ចែករំលែកព័តមាននេះ